'گوادر ءِ اے زرمبشت پہ بلوچستان ءَ رژنائی یے' واجہ عبدالحکیم لھڑی
کماشیں بلوچ راھشون واجہ عبدالحکیم لھڑی، گوادر ءَ لس مردمانی بنا کُتگیں زرمبشت ءَ دو روچ بیت کہ ھوار انت۔ گوستگیں روچاں واجہ ءَ گوار ءِ توار ءَ گوں گُلگدارے ءَ اے زرمبشت ءَ را بلوچستان ءِ ھاتر ءَ یک رژنائی یے گُشتگ۔ واجہ ءِ رد ءَ اے زرمبشت ایوک ادا آسر نہ بیت بلکیں سرجمیں بلوچستان ءِ زرمبشت جوڑ بیت۔ واجہ ءَ گُشتگ کہ اے اولی بَر انت کہ گوادر ءِ اے زرمبشت ءَ لس مھلوک ءِ تہ ءَ یکیں پتر ءَ بلوچ راج دوست ءُ دینی زانتکار ھم پت انت۔
واجہ ءَ اے دھر ءِ قوم پرستی سیاست ءُ چد ءُ پیسر ءِ قوم پرستی ءِ بابت ءَ گُشتگ کہ آ قوم پرستاں ون یونٹ پروشتگ ءُ بلوچستان ءَ را نام ءُ پجار دوار بکشاتگ بلے انوگیں وتگڑیں قوم پرست سودابازی ءِ سبب ءَ پارلیمنٹ ءَ سر بوتگ انت پمشکہ آ اے دلیری ءَ پیش داشت نہ کن انت کہ لس مردمانی تہ ءَ بہ نِند انت ءُ اے زرمبشت ءِ پلہ مرزی ءَ بکن انت۔
بلوچستان ءِ سرداری نظام ءِ بابت ءَ واجہ ءَ گُشتگ کہ سردای نظام بلوچ ءِ 11 ھزار سال ءِ گوستانک ءِ یک کسانیں وھدی یے بھرے بوتگ۔ ءُ سردار ءِ بُن گپ ذوالفقار علی بھٹو ءَ نامدار کنائیتگ بلے آ وت 75 سردارانی ھمراہ بوتگ ایوک خیر بخش مری، اکبر خان ءُ عطاء اللہ ءِ بگیری ءَ آئی ءَ سرداری ءِ نام کامرز کُتگ۔ واجہ عبدالحکیم ءَ گُشتگ کہ انو ھم اے وھد ءَ 2021 ءَ کُلیں سردار اسمبلیانی تہ ءَ انت۔
واجہ ءَ بلوچ راج ءُ ھاس ورناھانی نام ءَ کلوہ یے ءَ گُشتگ کہ آ چہ تُرس ءَ وتی دل ءَ بہ کَش انت ءُ نا امیت مہ بنت۔ واجہ ءِ رِد ءَ اے زرمبشت بلوچستان ءِ تہ ءَ یک رژنائی یے آرگ ءَ انت ءُ اشیی ءَ سرجمیں بلوچستان ءُ بلوچستان ءِ ھما بھر کہ بلوچستان ءَ سِندگ بوتگ انت اود ءَ ھم تالان کنگی انت۔
No comments:
Post a Comment