گوادر نندانک ءِ بیست ءُ چارمی روچ۔ مزاحمت ءِ سے نشان۔ مولانا واڑیلہ مستی خان

گوادر نندانک ءِ 24ئمی روچ

جاوید بلوچ 

گوادر نندانک ءِ 24 ئمی روچ انت۔ ھما لس مردم کہ آھانی دلاں اے نندانک ءُ زرمبشت ءِ بابت ءَ انھگت ءَ بے چاڑی ءُ وڑ وڑیں ھئیال چست بوتگ ات انت آ اے 24ئمی روچ ءَ یک برے پدا نزور تر ات انت۔ مردمانی جوزگ ءُ جوش دوار گندگ ءِ لائک ات۔ بیست ءُ چارمی روچ ءَ گوادر ءِ اے نندانک ءِ سرکماش واجہ مولانا ھدایت الرحمٰن بلوچ ءِ بنا کُتگیں لس مردمانی ھکانی جُنز ءِ تہ ءَ یک دگہ گیشی یے اے گندگ ءَ اتک کہ انچو کہ چِد ءُ ساری گوادر ءَ ھک بہ دئے ءُ مکران ءَ ھک بہ دئے زرمبشت بلوچستان ءَ ھک بہ دئے ءِ تہ ءَ مَٹ بوتگ ات بلے 24ئمی روچ ءَ مزاحمت ءِ اوگامانی ھمرائی ءَ اے زرمبشت ءَ سند ءِ بزگیں دریاورد ءُ بزگرانی ھم نماھندگی کُت۔

لس مھلوک ءِ ھما جوزگ ءُ جوش کہ دو روچ پیسر نزور تر اِتگ ات آ یک برے پدا اے دسمبر ءِ سارتی ءَ چو جون ءُ جولائی ءِ وڑ ءَ گرم تر اتگ ات۔ واجہ یوسف مستی خان ءِ آھگ ءَ گوں گمان بوت کہ اسٹیج ءِ سر ءَ  ھمے گندگ اتک کہ "مزاحمت ءِ 3 نشان، مولانا واڈیلہ مستی خان" ۔ گوادر ءَ ھک بہ دئے اے زرمبشت ءَ مردم انچو سیاسی شعور ءُ گپ جنگ ءِ ءُ دیم ءَ گُشگ ءِ سنچ ءُ سکت داتگ انت کہ نی لس بلوچ وتی دل ءِ گپ ھما وھد ءَ دیم ءَ گُشیت۔ انچو کہ اے زرمبشت ءِ بندات ءَ لس بلوچ نودربر، اھوالکار، دریاورد، ڈرائیور ءُ پوریاگراں اے زرمبشت وش آتک کُت، اشیی ءِ ھمراہ بوت انت ءُ اشیی ءَ گوں ھوار بوت انت ھمے وڑ ءَ 21ئمی روچ ءَ رند آھاں وتی لیکہ ءُ خدشاتانی دیم پہ دیم درشانی ھم کُت۔ نی کسے اشیی ءَ بد نیتی ءُ بے سریں تنقید گُشیت شر یا وتی گپ ءُ جُست کنگ ءِ ھک سرپد بیت شر۔ اے ھم مولانا ھدایت الرحمٰن بلوچ ءِ بنا کُتگیں زرمبشت ءُ جُنز ءِ یک مزنیں سوبمندی یے کہ لس مردم آھائی ءِ ھمراھداری ءَ ھم گون انت گوں ءُ آئی ءِ سر ءَ ایراد ءُ تنقید ھم کن انت۔ چِد ءُ پیسر ریاستی ردیں پالیسی، سردار ءُ مافیا، مُلا ءُ دینی ٹیکھدارانی سر ءَ تنقید کنگ ءِ رزا نہ بیتگ پمشکہ آھاں تنقید ءُ جُستاں چہ روچ ءِ مرچی ھم کُنّت انت۔ تئی سر ءَ دمان ءَ غداری ءُ مذھب بیزاری ءِ فتویٰ لگیت۔

ھمے لس مردمانی، پوریاگر ءُ بزگر ءُ ڈرائیورانی سبب ءَ اے تحریک لس بلوچ ءِ زرمبشت جوڑ بوتگ۔ ماسی زینی ءِ تہ ءَ ھمت اتکگ کہ آ گپ جنت۔ یک نودربرے جُست کنت ءُ ھرکس کد ءِ وت اشیی ءِ تہ ءَ ھوار انت۔ ایوک "مزاحمت ءِ 3 نشان، مولانا واڑیلہ ءُ مستی خان" اناں بلکیں اے زرمبشت ءِ درسیں تراناں دیم ایر کن ءُ گوشدار گڑا ادا یک برے پدا مزنیں مُدتے ءَ پد بلوچ آشوبی گواستانک ءِ تمردیں کارست ھمل ءِ جیھند، بالاچ ءِ کمان ءِ تیر ءُ میر کمبر ءِ ذکر اے کدّ ءَ مُچی ءِ دیم بار بار بوھگ ءَ انت۔ زی ایں روچ ءَ واجہ مستی خان ءِ پاگ ءَ گُش ئے اکبر خان ءِ دروشم دیم ءَ آرتگ ات۔ آئی پگر ءُ گپانی تہ ءَ ھئیر بکش ءُ اتاءاللہ ءُ آئی ءِ وابانی تہ ءَ غوث بخش گون اِت انت۔

اے زرمبشت ءِ 24ئمی روچ ءَ بلوچ چاگرد ءِ پیشانی ءَ سیاھیں داگ سردار ءُ سوداگرانی سیاہ کاریانی سر ءَ ھم گپ بوت۔ انچش کہ ریاستی جبر ءَ بلوچ مرچی اے کساس بزگ ءُ بدھال کُتگ انچو ادءِ سردار ءُ سوداگراں پہ وتی نپ ءُ سیتاں دائم گوں زوراکاں بلوچ ءِ سودا جتگ۔ ھمے سبب انت کہ مرچی آھانی پاداں کیچ ءُ وڑّھ ءَ چی فیصل آباد ءُ گجرانوالہ وَ نزیک انت بلے گوادر دور اِنت کہ ادا 24 روچ انت کہ لس بلوچ نشتگ انت۔ 

اے سوداگراں وت وَ پمشکہ ھمت نہ بیت کہ اشاں ایوک لس بلوچ ءِ سودا نہ جتگ بلکیں پہ وت ءَ دائم وتی وڑیں سوداگر شوھاز کُتگ۔ پمشکہ اے تیاب دپ ءِ بزگیں بلوچ ءَ اے پارٹیانی تہ ءَ وتی سر پیر کُتگ بلے پارٹی ءِ ٹکٹ ھما زردار ءَ دیگ بوتگ کہ آ گچین کاری ءِ وھد ءَ جَتگیں بیرک ءُ اکسانی زَرّاں دات بہ کنت۔ 

اے سردار ءُ سوداگر ءُ مُلایانی ھاموشی انگت سمج ءَ کیت چیاکہ آ نہ لوٹ انت کہ آھانی کاسگ آؤکیں گچین کاریاں ھالیگ بہ بیت ءُ پدا آ زان انت کہ اگاں ما چیزے کُت بہ کُتیں مرچی اے کساس مردم وت در نیاتکگ اِت انت ءُ یک لس بلوچانی زرمبشتے ودی نہ بوتگ ات۔ پمشکہ ایوک اے وت ھاموش نہ انت بلکیں اشانی داشتگیں گچین کاریانی وھد ءَ بیرک جنوکیں ءُ چیر دستیں نودربر گَل ھم ھاموش انت ءُ ندارگ چارگ ءَ انت کہ کدی اسلام آباد ءُ لاھور ءَ چی مُلاہ یے بئیت ءُ ادا واز بہ کنت پدا ما چہ ھونڈاں در کائینت ءُ وت ءَ پیش دار انت کہ مئے نامانی دیم بلوچ نودربر بِلّے نبشتہ اِنت بَلے مئے زور ءُ طاقت دگہ پارٹیانی کیسگ ءَ انت۔

 اشاں ابید دگہ لھتیں بلوچ راھشونانی ھاموشی ءِ بہ گندئے دو سبب بیت کن انت۔ یکے وَ ھمے کہ داں بلوچستان آزات نہ بیت مارا گوں پوریاگر، دریاورد، ڈرائیور ءُ بزگر ءِ درآئگ ءَ ھچ کار نیست۔ دومی اش کہ اے وڑیں زرمبشت ووٹانی واستہ راہ ساپ کن انت پمشکہ ادا بِلّے مُلا ءُ سوداگر بہ رو انت۔۔۔۔۔

گڑا راستی ھمیش انت کہ بلوچ ءِ نوکیں پدریچ ءِ ردوم گوں مزاحمت ءِ اوگام ءِ اِشکُنگ ءَ بوتگ۔ اے نسل ءَ غوث بخش، اکبر، عطاء اللہ ءُ ھیربخش ونتگ انت۔ اے نی زانت کہ آھانی نام گِر ءُ منوگر ءِ تہ ءَ مزنیں تپاوتے ھست مپشکہ اے لس بلوچ وتی راہ ءَ ءُ وتی زرمبشت ءَ وت دیم ءَ بارت۔ اگاں مولانا ھدایت الرحمٰن ھمت کنت ءُ سروکی ءَ کنت لس بلوچ ھدایت الرحمٰن ءِ پُشت اوشتیت۔ یکیں وھد ءَ اللہ اکبر ءِ ھم اگام ءَ بُرز کنت ءُ آشوب ءُ مزاحمت ءِ ھم نام ءَ گپت بلے سوداگریں سردار، دینی ٹیکھدار ءُ پندل سازیں زرداراں بے سوب کنت۔ نی لس بلوچ ءِ راہ گیشتگ۔ بلوچ ءِ پدریچ کسی پُشت نہ روت بلکیں کسے بلوچ ءِ گیشینتگیں راہ ءَ کیت گڑا آئی ءَ وتی دیم ءَ کنت۔ چوش کہ دوشی گِندگ ءَ اتک 

مزاحمت ءِ 3 نشان

مولانا، واڑیلہ مستی خان