ھوتی، یمن ءُ جنگ۔ جیڑہ چی اِنت؟
ھوتی کے انت ءُ یمن ءَ پرچا جنگ انت؟
منی دل ءَ ات کہ سرھال ءَ ھمے بُرز ءِ بکن آں بلے گُش ئے زاناں اے سرھال اے سرجمیں کسہ ءَ پھمگ ءَ بس نہ بیت۔ پمشکہ من سرھال مٹ کت۔
دوشمبے ءَ ھوریں عرب امارات ءِ شھر ابو دبئی ءِ بالی پٹے ءَ راکٹ ءُ ڈرونانی اُرش ءَ لھتیں تیل ءِ ٹینکراں ھوار کم چہ کم سے مردم بیران بیتگ۔ اے ارشانی زمہ واری یمن ءِ یاگی ھوتی آں من اتگ۔
اد ءَ جُستے اش انت کہ یمن ءِ یاگی دبی (امارات) ءَ چیا ارش کن انت؟ یا یمن ءِ یاگی ھوتی کے انت ءُ یمن ءَ پرچا جنگ بوھگ ءَ انت؟
اے درگت چوناہ ءَ جھان ءَ بازیں انٹرسٹ نیست پمشکہ یمن ءِ جنگی جاورانی گپ میان استمانی میڈیا ءَ باز گندگ ءَ نیا انت۔ یمن یک گریب ءُ جنگ آماچیں مُلکے ءُ پدا یمن ءَ گوں مزنیں ملکانی بازیں سیادی نیست پمشکہ یمن ءِ ڈُکال، زھگانی چہ دل ءُ لاپ ءِ نادراھی ءَ مرگ یا سعودی عرب ءِ بمب گواری ءِ ھال شریں وڑے ءَ دیم ءَ نیا انت۔ اگاں کمیں سرپدی کسے ءَ ھست ھم گڑا آ اِش کہ یمن ءِ تہ ءَ ایران ءُ سعودی جنگ ءَ انت بلے مِرگ ءَ انت ھر دوئیں نیم ءَ یمنی۔ اے گپ یک ھدے ءَ وَ راست انت بلے سرجم چُش نہ انت۔
گڑا یمن ءَ چو آ دگہ عرب مُلکانی وڑ ءَ شیعہ ءُ سنی ءِ جنگ انت؟ جی اناں اے ھم سرجم ءَ راست نہ انت۔ چیا کہ اے وھد ءَ یمن ءِ تہ ءَ وت مں وتی جنگ ءَ ما یا وَ سعودی ءِ دروشم ءَ چار انت یا ایران ءِ یا امریکہ ءُ جھانی میڈیا ءِ۔ سعودی عرب یمن ءِ جنگ ءَ ایران ءِ دزمانجنی پیش داریت ءُ ایران سعودی ءِ۔ بزاں اد ءَ جنگ شیعہ ءُ سُنّی ءِ رنگ دیگ بیت۔ جھانی میڈیا ءَ یمن ءَ بازیں انٹرسٹ نیست پمشکہ آھاں یمن گیشتر ڈالچار کتگ ءُ انی چہ ڈکال ءُ دل ءُ لاپ ءِ نادرھاھی ءَ چہ لکھانی کساس زھگانی مرگ ءَ پد نی جھان ءِ دلگوشی کمیں یمن ءِ نیم ءَ اتکگ۔
بلے یمن ءِ تہ ءَ اسل جنگ، جنگ ءِ بندات ءِ سیادی گوں عرب اسپرنگ ءَ انت۔ بزاں دوھزار دہ ءَ عرب ملکانی تہ ءَ یک آشوبے بندات بوت کہ مردم بادشاھانی بگیری ءَ ڈن ءَ دراتک انت۔ ءُ لس مھلوک ءِ سرکار ءُ گچینکاریانی لوٹ کنگ بوت۔ ھمے آشوب تیونس، لیبیا، عراق، مصر، شام ءُ یمن ءَ ھوار دگہ عرب ملکاں ھم بوھگ ءَ ات۔ سعودی عرب ءُ بحرین ءَ ھم زھرشانی بوت انت۔ ھمے وڑ ءَ یمن ءَ ھم سرکار ءِ بگیری ءَ زھرشانی بندات بوت انت۔ یمن ءِ صدر علی عبداللہ سالح چہ 1990 ءَ ملک ءِ سر ءَ پہ زور صدری ءَ نشتگ ات۔ آ دگہ عرب مُلکانی وڑ ءَ یمن ءِ مھلوک ھم چہ اے سرکار ءَ بیزار ات۔ ملک ءَ گران نھادی، بُنکی انسانی ھکانی ءُ بُنکی لوٹانی ھاتر ءَ مردم ڈن ءَ دراتک انت۔ زھرشانی بوت ءُ اے زھرشانی ءِ ولگوج کنگ ءُ مھلوک ءِ تاکت ءِ پروشگ ءِ ھاتر ءَ عبداللہ صالح ءِ سرکار ءَ وتی زور جت بلے مھلوک ءِ تاکت ءِ دیم ءَ سرکار جُک اِت ءُ صدر عبداللہ صالح چہ صدری ءَ دزکش بوت۔ 2012 ءَ صدری ءِ بستار پیسریگیں صدر ءِ نائب عبد ربہ منصور ہادی صدر بوت۔
یمن ءَ مھلوک ءِ اے آشوب ءَ چہ ءَ پیسر یمن ءِ گوریچانی دمگاں سرکار ءِ بگیری ءَ ءُ لھتیں صوبہ یانی گورنرانی بگیری ءَ ھم زھرشانی بوھگ ءَ ات۔ یمن ءِ گوریچانی دمگاں "انصار اللہ" نامیں گَلّے سرکار ءِ بگیری ءَ زھرشانی کنگ ءَ ات۔ ءُ اے گل ءِ گوں لھتیں گوریچانی صوبہ یاں گوں یمنی پوج ءَ باز بر ءَ جنگ ھم بوتگ ات۔ یمن ءِ گوریچانی دمگانی گیشتر آبادی شیعہ لیکہ ءِ منوگرانی انت۔ یمن ءَ شیعہ سی داں سی ءُ پنچ درسد آبادی ءِ بھر انت۔ بلے اے شیعہ چہ "زیدی" فرقہ ءِ شیعہ گُشگ بنت اشانی سِتک ءُ پگری نزیکی چہ آ دگہ شیعہ بزاں ایرانی دوازدہ امامانی منوک یا اسماعیلہ یاں چہ گیشتر گوں سُنی یاں نزیک تر انت۔ اے دوازدہ امامانی منوگر نہ انت ءُ اسلام ءِ اولی سے ایں خلیفہ یاں ھم بد ءُ رد گُشگ ءَ شر نہ لیک انت۔ پمشکہ یمن ءَ کدی ھم شیعہ ءُ سنی ءِ وت مں وتی جنگ نہ بوتگ ءُ ناں کہ انی ھست۔ بلے ھو انصار اللہ نامیں تنظیم ءِ سروک ءُ گیشتر منوگر زیدی بزاں شیعہ اِت انت ءُ اشیی ءِ سروک ھم زیدی عالم ات انت پمشکہ اے گَلّ ءَ گیشتر شیعہ یا فرقہ ءِ رنگ زُرتگ ات۔ اے تنظیم ءِ یک تمردیں سروکے حسین بدرالدین ھوتی 2004 ءَ جَنَگ بیت۔ حسین ھوتی ءِ سروکی ءَ یمن ءِ گوریچانی صوبہ صعدہ ءَ جنگ بیت، حسین ھوتی ءِ لشکر ءِ یاگی صعدہ صوبہ ءَ وتی دست ءَ کنگ ءِ جھد ءَ بے سوب بنت اے جنگ ءَ حسین ھوتی ءِ ھمراھی ءَ بازیں سروکے کُشگ بیت ءُ باز یمنی پوج ءِ دست دزگیر کنگ بیت۔
زانگ بہ بیت کہ 1990 داں 2012 ءَ کہ صدر عبداللہ صالح ءِ سرکار بیت۔ صدر عبداللہ صالح وت ھم زیدی فرقہ ءِ شیعہ یے بوتگ ءُ دوھزار چار ءِ اے جنگ ءَ صوبہ صعدہ ءِ سر ءَ حسین ھوتی ءِ یاگی آشوبی جنگ ءَ جنگ بنت اے وھد ءَ یمن ءِ صدر عبداللہ صالح بوتگ۔ پمشکہ مرچی سعودی عرب اگاں اے جنگ ءَ شیعہ ءُ سنی ءِ نام ءَ دیگ ءَ انت ایوک وتی ارشانی ءُ یمن ءِ تہ ءَ وتی دزمانجنی ءَ را چیر دیگ لوٹیت۔ بلے چُش ھم نہ انت کہ ایران ءِ دست مان نہ انت۔ بلکیں اے وھد ءَ یمن ءِ جنگ ھمے ڈنّی دزمانجنیاں چہ عرب اسپرنگ ءِ بنا بوتگیں لس مھلوک ءِ آشوب ءَ چہ گیش سعودی-ایران ءِ پراکسی جنگ ءِ میدان جوڑ بوتگ۔
دوھزار دوزدہ ءَ یمن ءِ مردمانی زھرشانی ءُ نیم بُندگیں آشوب ءَ کہ صدر عبداللہ صالح لاچار بیت ءُ وتی صدری ءَ چہ دزکش بیت گڑا پیسریگیں نائب صدر عبد ربہ منصور ہادی صدر گچین کنگ بیت۔
یمن ءِ اے آشوب ءَ لس مردم دگانی سر ءَ دراتکگ ات انت۔ بُنجاھی شھر "صنعا" ءَ ھوار دگہ مزنیں شھر ءُ میتگاں لس مردمانی روانک ءُ زھرشانی بوتگ ات انت۔ بلے اے لس مردمانی جُنز ءَ پہ وت ءَ نوکیں راھشون پیداک کُت نہ کتگ ات پمشکہ گوریچانی دمگانی سرکار ءُ یمنی فوج ءِ ھلاپ کار کنوکیں یاگیانی گَل "انصار اللہ" سوب کنت ءُ داں بُنجاھی شھر ءَ وت ءَ سر کنت۔ اے لس مردمانی جُنز ءِ تہ ءَ انصار اللہ ءَ ھم موہ رسیت کہ نوک جوڑ بوتگیں سرکار ءِ دیم ءَ وتی لوٹاں ایر بکنت۔ نوکیں صدر منصور ہادی گوں انصار اللہ ءِ گوم ءَ لھتیں ایگریمنٹ کنت بلے انصار اللہ ءِ یاگی اشاں نہ من انت ءُ ھمے لوٹ کن انت کہ سرکار ءِ تہ ءَ ھاس وزات دفاع، ملک ءِ دیمپانی ءُ زر ءُ مال ءُ ڈنّی معاملاتانی وزراتانی تہ ءَ اشاں ھوار بکنت۔ بلے اے وڑ نہ بیت ءُ یمن ءِ جاور گیشتر جنگ ءِ نیم ءَ رو انت۔
چد ءُ پیسر یمن ءِ تہ ءَ القاعدہ ءِ بگیری ءَ امریکہ ءَ یمن ءِ سرکار ءَ پوجی ءُ مالی کمک ھم کتگ ات کہ نوکیں سرکار ءِ آئگ ءَ گوں ڈنی کمک ھم بند بند۔ پمشکہ یمن ءِ مالی جاور گیشتر نگیگ بوت انت۔ ءُ یک برے پدا اے خانہ جنگی ءِ سبب ءَ القاعدہ ءِ ھم ارش گیش بوت انت۔
ادا اگاں شما جیڑگ ءَ اِت کہ ھوتی یا حوثی یانی ذکر انگت نہ بوھگ ءَ انت چیا؟
اشیی ءِ ارزانیں پسو ھمیش انت کہ ھوتی ناں یمن ءَ یک گلے ءِ نام انت ناں انصار اللہ ءِ درسیں یاگی ھوتی انت۔
ھوتی اسل ءَ یمن ءِ یک سکیں کوھنیں کُٹھمے ءُ اے قبیلہ یمن ءِ گوریچانی دمگ ءَ آباد انت۔ ھوتی قبیلہ ءِ سیادی ھم گیشتر گوں زیدی شیعہ فرقہ ءَ انت۔ انصار اللہ نامیں گل ءِ بُنکی سروک ھوتی انت۔ ھمے سبب انت کہ نی انصاراللہ ءَ گیش اے جنگ ءَ ھوتی زرمبشت یا ھوتی جُنز ءِ نام گپتگ۔ انچش کہ عرب اسپرنگ ءِ آشوب ءَ جنگ عرب بادشاھانی ءُ لس مھلوک ءِ جمہوریت ءِ لوٹ ءِ جنگ ات بلے اشیی ءَ عرب دنیا ءَ ءُ ڈن ءَ شیعہ سُنی ءِ جنگ ءِ نام دیگ بوت۔
یمن ءِ نوکیں صدر منصور ہادی ءِ گوں انصار اللہ ءَ بزانکہ ھوتی یاں بازیں ماملاتانی سر ءَ تپاکی نہ بیت۔ ادا پیسریگیں صدر عبداللہ صالح ھم سرکار ءِ بگیری ءَ پروپیگنڈہ کنگ ءَ ھوار بیت کہ من ءَ چہ صدری ءَ کشگ ءَ نائب صدر ءِ دست مان بوتگ چیاکہ منی سیادی گوں اقلیتی زیدی شیعہ فرقہ ءَ انت ءُ یمن ءِ سر ءَ منصور ہادی ءَ قبضہ کتگ۔ عبداللہ صالح وتی 22 دو سال ءِ صدری ءَ ھچ بر شیعہ ءُ سنی ءِ نام ءَ نہ گپت۔ بلکیں وتی صدری ءِ وھد ءَ یمن ءِ گوریچانی دمگاں پوجی آپریشن ءُ یاگیانی سر ءَ اُرش کنت۔ زیدی شیعہ عالم حسین بدرالدین ھوتی ءَ کُشیت۔ بلے صدری ءِ روگ ءَ پد ادا وت ءَ شیعہ یے زائر کنت ءُ ھوتی جُنز بزاں گوں انصار اللہ نزیکی کنت ءُ یاگی یانی کمک کنگ ءِ ھم اشیی ءِ سر ءَ الزام جَنَگ بیت۔2014 ءَ یاگی یمن ءِ بنجاھی شھر "صنعا" ءِ سر ءَ ارش کنگ ءَ سوبمند بنت۔ صدر منصور ہادی گوں وتی ھمراھاں ملک ءِ زرباری بندنی شھر ءُ یمن ءِ پیسریگی بُنجاھی شھر عدن ءَ روت۔ منصور ہادی پہ ادارُکی "عدن" ءَ را بُنجاھی شھر نامین ایت۔ بلے ھوتی جُنز ءِ یاگی بزاں انصار اللہ "صنعا" ءَ وتی دست ءَ کن انت ءُ مھدی المشاط یمن ءِ صدر بوھگ ءِ جار ءَ جنت۔ ایران جھان ءِ اولی ءُ اے وھد ءَ تک یکیں مُلک انت کہ آئی ءَ سرکاری وڑ ءَ مھدی المشاط ءِ صدری من اِتگ۔
صدر منصور ہادی عدن ءَ چی سعودی عرب ءِ گور ءَ کمک لوٹیت۔ سعودی عرب یاگیانی سر ءَ انچش پہ دیم بمبگواری کنت۔ اے وھد ءَ یمن ءِ بنجاھی شھر ءَ ھوار گیشتر دمگ یاگیانی بزانکہ ھوتی زرمبشت ءِ یا انصار اللہ ءِ دست ءِ چیر ءَ انت۔ یمنی سرکار ءَ ایوک عدن ءُ زرباری لھتیں دمگ گون انت۔ اے جنگ ءَ یمن جھان ءِ مستریں ڈکال ءِ تہ ءَ دور داتگ۔ شُد ءُ گُژنگی ءُ مزنیں نادرھی یانی آماچ انت۔ اے وھد ءَ ھوریں کومانی گل ءِ رد ءَ یمن ءَ دو کروڑ ھشتاد لک مردم ڈنی کمک ءِ راھچار انت۔ دل ءُ لاپ ءِ نادرھائی ءَ چہ لکھانی کساس زھگ مُرتگ انت۔ ورگ ءُ دوائیانی زلورت انت۔ سعودی بمب گواری ءَ چہ ملک ءِ فیکٹری، بالی پٹ ءُ آبادیاں سک باز تاوان رستگ۔ یمن اے جنگ ءَ انچش ویران کُتگ ءُ سوتکگ کہ گُش ئے زاناں کھنڈراتے ءِ دروشم ءَ انت۔ چُش کہ یمن یک سکیں سیریں ملکے نہ انت پمشکہ جھان ھم کور انت ءُ اے ماملہ ءَ گیشیں دلگوشی دیگ ءَ نہ انت۔ یونائیٹڈ نیشن ءِ رِد ءَ بیست ءُ دو لکھ زھگ یمن ءَ کم ورگی ءُ شِر ءُ ڈگار ءِ نادرھائی ءِ آماچ انت۔ یمن انسانی بحران ءِ شکار انت۔
منصور ہادی سعودی عرب ءِ شھر ریاض ءَ نشتگ ءُ وت ءَ یمن ءِ صدر گُشیت۔ ھمے وڑ ءَ "صنعا" یاگیانی دست ءَ انت ءُ اود ءَ مھدی مشاط وت ءَ صدر گُشیت۔ سعودی عرب ءِ سروکی ءَ آئی ءِ ھوریں ملکانی ارش یمن ءِ سر ءَ برجا انت۔ سعودی عرب ءِ مستریں کمک ھوریں عرب امارات (دبی) ءُ بحرین انت۔ پمشکہ گوستگیں روچاں ھوتی یاگیاں ابو دبی ءِ بالی پٹے ءَ ارشے ءِ زمہ واری من اِتگ ءُ دیمتر ءَ دگہ ارشانی کنگ ءِ ھم بیھار داتگ۔
اے وھد ءَ منصور ہادی ءِ سرکار ءِ کمک ءَ سعودی عرب کنگ ءِ انت۔ سعودی ءِ کمکار فوج ءِ تہ ءَ ھوریں عرب امارات، بحرین، پاکستان، مائیشیا، ترکی ءُ مصر ءَ ھوار کُل سی ءُ پنچ مسلمانیں مُلک ھوار انت۔ اے درسیں ملکانی نزیک تریں سنگت امریکہ انت ءُ امریکہ ءِ میان اشیا ءَ نزیک تریں مُلک اسرائیل انت۔ بزاں یمن ءِ ماملہ ءَ اے درس یک مُشت ءُ تپاک انت۔ ایران یاگیانی نیم ءَ انت۔ امریکہ ءِ بگیری ءَ روس ایران ءِ مستریں ھمراہ انت پمشکہ دومی نیمگ ءَ روس ءُ ایران ءَ ھوار دگہ لھتیں مُلک چُش کہ چین ءُ کیوبا ھم یاگیانی نیم ءَ انت۔ ءُ یمن ءِ نزیک تریں ھمساھگیں مُلکانی تہ ءَ عمان دنیگت ءَ ھاموش انت بلے عمان ءِ ھم چیروکائی نزیکی یاگیانی نیم ءَ انت چیاکہ عمان ءِ گوں یمن ءَ سیم سری ماملاتانی سر ءَ ھم وت مں وتی دیریگیں جنجال ھست انت۔
ادا دگہ یک گپے ھم زانگ لوٹیت کہ عرب سوشلسٹ انقلاب ءِ وھد ءَ سعودی عرب ھوتی ءُ ھمے انوگیں یاگیانی مستریں دوست بوتگ کہ سعودی عرب ءَ 1990 ءَ پیسر ءِ زرباری یمن ءِ سوشلسٹ سرکار ءِ بگیری ءَ ھوتی کمک کتگ انت ءُ یمن ءِ سوشلسٹ سرکار ءِ پروشگ ءَ سعودی ءُ ھوتی سکیں دوست بوتگ انت۔
سعودی اے وھد ءَ ایوک وتی واجہ کاری ءُ مزن مردی ءِ برجا دارگ ءَ یمن ءِ تہ ءَ تباھی کنگ ءَ انت ءُ عرب ملکاں ڈن شیعہ ءُ سُنی ءِ کارڈ ءَ کارمرز کنگ ءَ انت۔ چر ایشی ءَ ایران ءَ ھم گیشتر موہ رسگ ءَ انت کہ آ شیعہ کارڈ ءَ کارمرز بکنت ھالانکہ ایران ءِ شیعہ یمن ءِ ھوتیاں بزانکہ زیدی شیعہ یاں شیعہ نہ لیک انت چیاکہ زیدی فرقہ سُنی یاں گوں بازیں ماملھاں گیشتر نزیک تر انت۔ اے جنگ ءَ یمن ءِ لس مردمانی آشوب زوال کُت۔ یمن اے وھد ءَ سک بزگ انت بلے جھان ءَ چم بستگ انت ءُ سعودی زوراکی ءِ سبب ءَ ھم روچ سدانی کساس یمنی زھگ ءُ مردم مرگ ءَ انت بلے جھان ءَ سُدے پِر نیست۔
No comments:
Post a Comment