سروگیٹ مات۔ بے چِلّگ بوھگ ءَ چُک مات بوھگ

سروگیٹ مات۔ بے چِلّگ بوھگ ءَ چُک مات بوھگ

جاوید بلوچ

گوستگیں روچاں ھندوستان ءِ نامداریں زمکار پرینکا چوپڑا ءِ بابت ءَ یک ھالے دیم ءَ اتکگ ات کہ آ چُک مات بوتگ بلے بے چِلگ بوھگ ءَ۔ ھمے ھال گوادر ءِ توار ءَ ھم وتی فیس بُک تاک ءُ انسٹاگرام ءَ شنگ کُرت۔ 

اے ھال ءِ شنگ کنگ ءِ دو مستریں سببانی تہ ءَ یکے و اِش ات کہ اے ھال ءِ سیادی گوں ازم ءِ جھان ءَ ات کہ پرینکا چوپڑا یک نامی ایں ازمکارے ءُ جھان ءِ دگہ مردمانی وڑ ءَ بلوچ چاگرد ءَ ھم الم آئی ھزارانی دوستداروک بنت پمشکہ آئی ءِ دوستداروکانی واستہ اے یک ھالے بیت ءُ دومی ھمے لبز "سروگیٹ مات" یک سائنسی ءُ نوکیں گپے اَت۔ چُش کہ بلوچ سائنسی پڑ ءَ باز پُشت ءَ انت ءُ مئے کرّا بازیں سائنسی ءُ دگہ پڑانی لبز ءُ ٹرمز نیست انت بلے ما اوں ھمے جھان ءِ بھر ایں بائد سرپد و بہ بئیں کہ سائنس ءُ علم ءَ چنچو دیمرئی کُتگ۔

سروگیسی ءِ بابت ءَ یا سروگیٹ مات ءِ بابت امینچو ارزان تر کہ بوتگ ات، ما وتی کدّ ءَ نبشتہ کُت کہ سروگیٹ مات ھما عمل ءَ گُش انت کہ اشییءِ تہ ءَ دگہ ماتے ءِ چُک دگہ یک جنینے ءِ لاپ ءَ چی پیداگ بیت۔

آ ھال چو اے وڑ ءَ اَت کہ "پرینکا چوپڑا بے چِلّگ بوھگ ءَ چُک مات بوتگ

ھندوستان ءِ نامداریں تامرانی ازمکار پرینکا چوپڑا چُک مات بوتگ۔ پرینکا ءَ وتی انسٹاگرام ءِ یک پوسٹے ءِ تہ ءَ نبشتہ کُتگ کہ آ سیروگیٹ چُک مات بوتگ۔

سروگیٹ مات بوھگ ءِ ھما عمل اِنت کہ اشیی ءِ تہ ءَ دگہ ماتے ءِ چُک ءَ دگہ یکے وتی لاپ ءَ کنت ءُ چُک ءِ لاپ ءِ تہ ءِ مُدّت بزاں 9 ماہ ءَ دگرے ءِ چُک ءَ دگہ کسے وتی لاپ ءَ کنت ءُ چُک پیداگ بیت۔

لھتیں نادرھایانی سبب ءَ لھتیں جنینانی شکم چُک ءَ زُرت نہ کنت پمشکہ سروگیٹ ءِ عمل ءَ چُک دگہ یکے ءِ لاپ ءَ کنگ بیت۔ روبرکتی ءُ یورپی ملکاں نادرھائی ءَ ابید جنین وتی کار ءُ دگہ دزگٹیانی سبب ءَ ھم دگہ جنیانی لاپاں باڑہ ءِ سر ءَ وتی چُکاں 9 ماہ ءَ پیداگ بئیگ ءَ پد زور انت۔

زانگ بہ بیت یک رپورٹے ءِ رد ءَ ھندوستان رودراتکی ملکانی تہ ءَ ھما مُلک انت کہ ادا سروگیٹ ءِ عمل ءَ چُک مات بوھگ ءِ کساس گیشتر ودگ ءَ انت ءُ چر ایشیی ءَ گریبیں جنین چُک ھم باڑہ ءِ سر ءَ دگرانی چُکاں بے کانودی راھبندانی رد ءَ وتی لاپ ءَ کنگ ءَ انت۔"

اے سرجمیں نبشتانک ءِ تہ ءَ ایوک سرھال ءُ اولی لائن ءَ ابید آ سرجمیں نبشتانک ایوک سروگیسی ءِ بابت ءَ اَت بلے لھتیں مردماں ایوک اکس دیست ءُ اولی لائن ءِ وانگ ءَ پد فتویٰ ءِ دیگ بندات کُت۔ لھتیناں پدا ھمے ھم گِلہ کُت کہ گوادر ءِ توار ھم مرچاں دگہ پاکستانی پیجانی وڑ نی کُٹ اتگ کہ دگہ ھال نیست نی پرینکا ءِ چُک مات بوھگ ءِ ھال ءَ دیگ ءَ انت۔ ءُ لھتیناں وتی عادت ءِ رد ءَ ادا ھم بلوچ ءِ دودانی ٹیکھداری زُرتگ ات۔

فیس بُک ءِ نوکیں پیج ایکسپئرنس ءِ ھلاس کنگ ءُ دوار کلاسک ورژن ءِ سبب ءَ اے نبشتانک گوں ھما روچ ءِ درسیں پوسٹاں گار بوت۔ بلے پرینکا ءِ چُک مات بوھگ ءِ ھال ءِ سبب ءَ اے جستجو ءِ ھُب وَد ات کہ ما بہ زان انت کہ اے سروگیٹ مات ءُ سروگیسی ءِ عمل چی یے؟ لھتیں وانوکاں جوانیں سرپدی ءُ ھمے سرھال ءِ سر ءَ جوڑ بوتگیں تامر ءُ دگہ نبشتانک ھم دات انت۔ 

چر ایشیی ءَ من ءَ ھمے سما بیت کہ بہ گندئے منی وڑیں دگہ ھم مردم بہ بیت کہ پہ آھاں اے یک نوکیں سرپدی یے  بیت کنت ءُ بہ گندئے بائیو ءِ بلوچیں نودربرے بلوچی ءِ تہ ءَ بائیو ءُ سائنسی دگہ نبشتانک ھم نبشتہ بہ کنت۔ چر اشیی ءَ یکے و ارزانیں وڑے ءَ ما سرپد بوت کن انت ءُ دومی بلوچی ءِ تہ ءَ ھم نوکتریں مواد کیت۔ ھمے ھُب ءَ سروگیٹ مادر ءِ بابت ءَ سرپدی وَ رست اشیی ءِ ھمراھی ءَ اے ھم سرپدی رست کہ دینی لیکہ ءِ تہ ءَ ھم اشیی ءِ سر ءَ گپ ءُ تران بوھگ ءَ انت۔

چُش کہ مئے تہ ءَ بزاں بلوچانی تہ ما باز جاگہ ءَ کہ جاھلی یا وتی گپ ءَ کہ یک برے کُت گڑاں ھر وڑ ءَ ھما گپ ءِ سر ءَ ابید منطق ءُ دلیل اوشتگ ءِ واستہ یا وَ بلوچ کلچر ءِ نام ءَ گِر انت یا دین ءِ۔ ھمے وڑ کمو گیشتر پٹگ ءَ دو جُتائیں دینی لیکہ ھم دیم ءَ اتک کہ لھتیں دینی لیکہ وَ سروگیٹ ءِ عمل ءَ جوان نہ لیک انت بلے لھتیں اشیی ءَ ھراب ھم نہ لیک انت۔ دین ءِ یک لیکہ یے ءِ رد ءَ اگاں مرد ءُ زال دوئیں چُک پیداگ کُت کن انت ءُ آیانی تہ ءَ اے صلاحیت ھست بزاں سَنٹ نہ انت یا آیانی تہ چُک پیداگ کنگ ءِ دگہ نزوری نیست بلے جنین ءِ چُکدانی نزور اِنت کہ آ چُک ءَ وتی شکھم ءِ تہ ءَ 9 ماہ ءَ داں داشت نہ کنت گڑا آئی ءِ مرد دگہ یک سانگے بہ کنت ءُ دومی جنین ءِ لاپ ءِ تہ اولی چُک بیت کنت۔

دگہ لھتیں دینی لیکہ ءِ منوگر اے عمل ءَ سرجم ءَ ناجائز گُش انت۔ ءُ لھتیں اشیی ءَ جائز گُش ایت۔ چُش کہ جاوید احمد غامدی ءِ رد ءَ اے جائز انت۔ غامدی ءِ گُشگ ءِ رد ءَ چُش کہ اسلام ءِ بنداتی وھد ءَ یکے دومی ءَ ھون دیگ ءِ سائنسی طریقہ نہ بوتگ پمشکہ وھدے سائنس ءَ دیمرھی کتگ گڑا بازیں دینی لیکہ ءِ منوگراں اے عمل ھرام گُشتگ بلے مرچی ھون دیگ عام انت ءُ کس اشیی ءَ ھرام نہ لیکگ ءَ انت۔ ھمے وڑ ءَ جسم ءِ اعضایانی ٹرانس پلاٹ ءِ عمل ءَ ھم بندات ءَ بازیں دینی منوگراں رد ءُ ھرام گُشتگ بلے مرچی گُٹگ بزاں گردہ، چم ءُ دگہ اعضایانی دیگ ھم بوھگ ءَ انت۔ ھمے وڑ ءَ جاوید غامدی ءِ رد ءَ سائنسی دیمرھی ءُ دیم تر ءَ بوت کنت بازیں نادرھیانی سبب ءَ اگاں جنینے ءِ چُک دانی چُک زُرت مہ کنت آ دگہ جنینے ءِ چُک دانی ءَ باڑہ ءِ سر ءَ زورگ  ھم ھراب لیکگ مہ بیت۔

بلے ھیر اے نبشتانک ءِ مول ءُ متاہ ایوک یک سائنسی دیمرھی ءُ نوکیں عملے ءِ بابت ءَ سرپدی ءِ شنگ کنگ ات۔