گوادر: آن لائن بزنس گرل، یاسرہ وژدل بلوچ
یاسرہ وشدل گوادر ءَ نشتگ ءُ تربت شھدربرجاہ ءَ بی ایس اکنامکس ءِ نودربر انت۔ آن لائن ءِ اے زمانگ ءَ بلوچ بچک وَ ڈیجیٹل جھان ءَ کد ءِ وت ھوار انت بلے سکیں کسانیں کساسے ءَ بلوچ جنک ھم پُشت ءَ نہ اَنت۔ ھمے جنکانی تہ ءَ یکے یاسرہ انت۔
گوادر ءِ توار ءِ ٹک ٹاک ءِ لنک
یاسرہ آن لائن بزنس بزاں انٹرنٹ ءِ سر ءَ دکانداری کنگ ءَ انت۔ یاسرہ وتی بھائی چیزانی اکساں سوشل میڈیا ءَ ایر کنت۔ ھرکس ءَ کہ اے چیز دوست بنت آ یاسرہ ءَ گوں رابطہ کن انت ءُ پدا یاسرہ ھما چیزاں آیانی کر ءَ سر کنت۔ گوادر ءِ توار ءِ جاھگیر یاسین مراد ءَ گوں گُلگدارے ءَ یاسرہ گُشیت اے آن لائن ءِ جھان ءَ ھرکس کہ سوشل میڈیا ءَ کارمرز کنگ ءَ انت گڑا بائد چہ اشیی ءِ کارمرز کنگ ءَ نپ ءُ پاھدگ بہ زور ایت۔
یاسرہ گُشیت آ اے وھد ءَ ای کامرس کنگ ءَ انت بزاں آن لائن سوداگری کنگ ءَ انت۔ آ گشیت مئے چاگرد ءَ وَ جنکانی آن لائن کار کنگ ءِ رواج کم انت بلے پاکستان ءِ دگہ شھراں بازیں جنک آن لائن کار کنگ ءَ انت پمشکہ آئی ءَ لوٹ ات کہ آ ھم چہ آن لائن پلیٹ فارم ءَ نپ بہ زور ایت۔
یاسرہ اے وھد ءَ بلوچ بازار ءِ چیزاں بھا کنگ ءَ انت ءُ دیمتر ءَ دلمانگیں وتی جندئے یک آن لائن پلیٹ فارم ءِ جوڑ بکنت ءُ اود ءَ چیز بھا بکنت۔
بلوچ جنکانی نام ءَ وتی کلوہ یے ءَ یاسرہ گُشیت کہ ھر جنکے کہ اکنامکس یا کامرس وانگ ءَ انت گڑا بائد چہ آن لائن جھان ءَ نپ بہ زور ایت ءُ وتی کار ءُ بار ءَ بندات بکنت چیاکہ بلوچ جنک ھم ھچ پڑ ءَ کس چی پُشت ءَ نہ انت۔
یوٹیوب لنک
No comments:
Post a Comment