یاسین مراد: نا سرجمیں واھشت

نا سرجمیں واھشت

یاسین مراد

گُلی مئے میتگ ءِ شرنگ تریں جنکے. آئی ڈولداری ءِ گپ ھر میتگ ءُ بچکانی کرا سک باز مشھور انت. اگاں کسے ءَ گُلی نہ دیستگ ات گڑا آ مردم سک باز ھبک ءَ بیتگ کہ گُلی باریں چونیں ءُ کجام تب ءِ مردمے بیت بلے گُلی من شریں وڑے ءَ دیستگ۔ من ءُ گُلی ءَ میتگ ءِ یکیں وانگ جاہ ءَ ونتگ۔ مئے مکتب ءِ ھر بچک گُلی ءِ سر ءَ فدائیگ بوتگ انت بلے منی ھیال ءَ من گُلی اے سجیں بچکاں چہ گیشتر دوست داشتگ۔ من مدام گُلی ءِ بابت ءَ جیڑ ات کہ گُلی بس منی لوگ ءِ بانُک بیبت دگہ کسی نصیب ءَ مہ بیت.

گُلی ءِ پت واجہ قادر داد مئے میتگ ءِ یک لائکیں انسانے۔ آئی ءَ مدام وتی تنگ دستیں مردمانی گم پر آت. آئی ءَ مدام وتی میتگ ءِ مردم پنت ءُ نسیھت کُت انت کہ شما وتی چکاں پہ وانگ ءُ زانگ ءِ نیمگ بہ بر اِت تاکہ مئے آؤکیں باندات شر بہ بیت. واجہ قادر داد ءِ بیٹھک مدام چہ مردماں پُر اَت چیا کہ مئے سیر تریں مردم ھم واجہ اَت.

گُلی وتی مات ءُ پت ءِ یکیں جنک ات.آئی ءِ مات ءُ پت ءَ گُلی پہ وتی چم ءِ چارگ دل نہ بیت. گُلی ءِ واستہ ھر کنڈ ءُ دمگ ءِ مردم پہ گُلی ءِ واستہ وتی گپ آورت بلے گُلی ءَ کس پہ کس کِمار نہ کُت. من ءُ گُلی وتی کلاس ءِ توک ءَ سجھیں ھم مکتبیاں چہ وانگ ءَ زبرتریں. من ءَ پہ گُلی ءَ چہ پیسر باز مھر اَت گڑاں من وتی دل ءِ گپ گُلی ءِ کرا کُت کہ من تئی گوما سانگ کنگ لوٹ آں گڑا گُلی سک باز گَل بوت منا گُلی ءَ گُشت دیر مکن جلدی وتی مات ءُ پت ءَ منی لوگ ءَ راہ بدئے تاکہ منی ءُ تئی گپ جلدی پکا بہ بیت. دومی روچ ءَ من وتی مات گُشت کہ منی سانگ ءِ گپ ءَ مئے میتگ ءِ واجہ قادر داد ءِ بانُکیں چُک گُلی ءَ پہ بر اِت گڑا منی بزگیں مات ءَ گُشت من تئی مستر نیاں بلے تئی پِت کیت گڑا من گوشاں باریں چے گُشیت بلے ھمے وھد ءَ من وتی مات گُشت ھر وڑا ترا پت ٹھینگی انت چیاکہ گُلی بس منی آخری واھگ انت۔ اگاں من ءَ گُلی نہ رست گڑاں من نہ زاناں منی ھالت چے بیت. 

ھفتگے ءَ چہ پد منی پت ءُ مئے میتگ ءِ دگہ یک کماشے واجہ قادر داد ءِ لوگ ءَ شُت انت منی گپ ءِ برگ ءَ گڑا گُلی ءِ پت پہ منی زیرگ ءَ رزا مند بوت.

من چہ وتی دویں پاداں چست بیت آں کہ منی دشتار گُلی انت کہ آ مئے ھلک ءُ دھمگ ءِ شرنگ تریں جنک انت. من گل ءَ انچوں بال اتاں کہ منی گپ کنگ نہ بیت.

منی مات ءَ زد کتگ ءَ کہ من ترا زامات کُت نو تو دیر مکن پہ آروس ءَ۔ گڑاں منی آروس ءِ چن ءُ لانچ بندات بوت ءُ منی آروس شروع بوت. منی سجیں سنگتاں منی سرا زر زرشان کُت محفلی بوت۔ محفلی واستہ بازیں گلوکار لوٹائینگ بوت. سجیں میتگ ءِ سنگتاں ناچ ءُ شاتکامی کُت.

من ءَ نکاح ءِ واستہ برگ بوت ھمے وھد ءَ کہ مُلا ءَ انچو کہ بسم الله کُت اچانگ منی گوشاں معراج ءِ برمش کپت کہ یاسین او یاسین پاد ءَ یار کلاس ءِ وھد انت انگت تو واب ئے.