دشت بل نگور ءِ پش کپتگیں یات
دشت بل نگور ھما جاہ اِنت کہ یک وھدے ادءِ مردم سک سیر ءُ آباد بیتگ انت۔ ادا مھلوک ءَ گوں ایران بارڈر ءَ کار ءُ روزگار کتگ. کسانیں گونڈو ءُ ورناہ سجینانی کرا زر ءُ دولت مچ بیتگ ءُ دشت بل نگور چہ ایران ءِ جاگاہ نزدیگ بیتگ کہ ھودا مردم شوتگ انت تیل ءُ دگہ ایرانی سامان آورتگ اش۔ اد ءَ ھما وھد ءَ کہ کار ءُ بار سک باز بیتگ گڑا مدام ادءِ مردمانی دپ ءَ ھمے ایش کُتگ کہ مرچی باریں "سلف"ریٹ چنچوک انت یا باریں "کومپ" پُشت ءَ مرچیں "گجر" اتکگ یا "کھیر توکاں" دوز ءَ یک گاڑی والا ءِ زر برتگ انت.
مئے میتگ ءِ مستریں ڈرائیور اُستاد بابو بیتگ انگت ھست ءُ حیات انت بلے انی گوادر ءَ کار ءُ روزگار کنگ انت۔ استاد بابو مدام وتی راہ ءِ گپ ءُ ھبر کُتگ انت کہ مرچی گجر "سھیل" ءَ چہ مئے رندا کپتگ، شکر اِنت اللہ ءِ مارا گِپت ئے نہ کُت. ھمے وڑ ءَ مئے دومی بازار ءِ اُستاد سلیم محمد ءُ استاد شوکت ءَ ھم مدام وتی بزگی درشان کُت کہ بارڈر ءِ کار اوں کار ءِ نہ اِنت بلے پہ ھشکیں نندگ ءَ چہ شرتر اِنت کہ مردم کارے بہ کنت وتی چُکاں لاپ بہ دنت.
دشت بل نگور ءِ دکان دار سیٹھ محمد جان مُدام گوں کندگ ءُ مزاک ءَ گاڑی والایانی گوما ھمے گُشت کہ شما وام زیر اِت بلے پدا زر نہ دئے بلے سیٹھ محمد جان ءَ اے گپ پہ مزاق ءُ کندگ ءَ کُت انت. سیٹھ محمد جان دشت بل نگور ءِ یک کھنیں دوکان دارے کہ باریں چُنت سال بیت کہ کار ءُ بار کنگ ءَ انت بلے بارڈر بند بوھگ ءَ چہ پد انی کیچ ءَ دوکان داری کنگ ءِ انت.
دشت بل نگور ءِ مستریں گاڑیانی شر کنوکیں مستری اُستاد مجید اِنت کہ اُستاد پورھیں بل نگور ءَ نامی ایں استادے. اُستاد مجید ءِ کرا مھلوک چہ دُور اتگاں پہ وتی گاڑیانی شر کنائینگ ءِ واستہ بلے انی کپتگیں آس ءَ اُستاد مجید ھم نہ بخش اتگ کہ نشہ ءِ آماچ اِنت ءُ انی لوگ ءَ نشتگ.
اُستاد نسیم ھم یک بلاھیں اُستادے. اُستاد نسیم ءِ مسکرائی ءُ دیوان ھم سک وش اَنت۔ گوں وتی سنگتاں مدام نشتگ ءُ گپ ءُ تران ئے کُتگ. اُستاد نسیم ءِ گیراج انگت است اِنت بلے پیسری وڑا نہ اِنت کہ ھما وھدا ادا گاڑیاں پہ اوشتگ ءَ جاگہ نہ بیتگ.
بل نگور کپکپار ءَ راشد جمھدار ھم یک نامی یے بیتگ وھدے بارڈر پچ بیتگ گڑاں راشد ءِ یک الگ ٹولی یے بیتگ کہ پہ راشد ءِ گروپ ءَ مشھور بیتگ۔ آئی ءِ تہ ءَ کساس بیست یا سی گاڑی بیتگ انت کہ راشد ءَ وتی ھمرائی ءَ بُرتگ انت گوں ءُ راشد ءَ آیانی سروکی کُتگ. راشد انی ھم ھمے بارڈر ءَ کار کنگ ءَ اِنت بلے پیسری وڑ ءَ راشد ءِ جُتائیں ٹھولی نیست اِنت.
کپکپار ءِ بازار ءَ منیر ءِ کاپر سک باز مشھور بیتگ۔ ادا یک بلاھیں کاپرے اَست کہ سک مزن انت۔ ایشی ءِ چیر ءَ دو سے تھت ھم است. ھدا مرزی منیر انی زندگ ءُ ھست ءُ حیات نہ انت۔ یک نادرائی ءِ سبب ءَ چہ بیرن بیت بلے وھدے اد ءَ بارڈر پچ بیتگ گڑا زیادہ تریں گاڑی والا منیر ءِ کاپر ءِ چیر ءَ شُتگ انت ءُ آرام ئے کُتگ۔ اے کاپر ءَ سھب ءِ سرا مدام کوکار ءُ زاری بیتگ۔ ھر کس ءَ ھمے گپ دپ ءَ بیتگ کہ باریں مرچی "کومپ پُشت" یا "کھیر توکاں" گجر نشتگ یا اناں. گڑاں مردم ءَ ھمود ءَ نشتگ ءُ راہ چار گوں سیٹیلائٹ ءِ سر ءَ حال کتگ ءُ راہ باریںاں جُست ءُ پد کُتگ۔
اے دشت بل نگور ءِ ھما یات انت کہ بہ بے ھیال کنگ نہ بنت.
بلے انچش گُش اَنت کہ ھر سکی ءَ پد وش حالی یے ھست.
No comments:
Post a Comment