ماهزمین ۔۔۔۔۔ اِشکر پُر اَنت
 |
| اسرار شوکت ءِ کشتگیں اکس |
ماهزمین بہ گندئے اے سھتاں کہ من پہ تو اے کاگد ءَ نبشتہ کنگ ءَ آں ۔۔۔۔۔ تو نوک نوک چہ کوٹی نمبر بی چھل ءُ ھشت ءِ باتروم ءَ چے درآهگ ءَ بہ بئے ۔۔۔۔ تو گلابی ایں رنگ ءِ ٹاول ءِ سرا وتی ڈکّمیں مُدّاں هُشک کنگ ءَ بہ بئے ۔۔۔۔۔ ھمے دمان ءَ تو آدینک ءِ دیم ءَ بوشتئے ءُ اناگت ءَ من ءَ بہ جیڑئے۔۔۔۔۔۔۔!
" رگام باریں چے کنگ ءَ بیت؟ کُجا بیت"؟
ءُ تو پدا بہ کند ئے ءُ بگُشئے " چونیں دیوانگے اَت ۔۔۔۔ گنوک "۔
ماھزمین اگاں اسلا ھمے وڑیں گُڑا من ترا ھال دیئگ لوٹاں کہ اے سھت ءَ من بلوچستان ءِ کوه یے ءِ دامن ءَ نشتگ آں ۔۔۔۔ من ءَ چہ کمّو دور چاه ءِ کِیتلی آس ءِ سرا پِر اِنت ۔۔۔۔۔ ماہ آزمان ءَ برهنّگ اِنت ءُ چوں مُدامی ۔۔۔۔۔۔تھنّا۔۔۔۔۔ اِنت ءُ ترا دگہ گپے بُگشاں؟ تئ وڑا زیبدار اِنت ۔۔۔۔ آ دگہ گپے کہ من ترا ندیستگ ۔۔۔۔۔۔۔ بلے ھیر!
ترا یات اِنت کالج ءِ گیٹ ءِ دپ ءَ تو پیسر اِت ئے ءُ من تئ پُشت ءَ۔۔۔۔۔۔ ھرکس ءَ بہ گندئے ھمے جیڑِت کہ من تئ پُشت ءَ کپتگاں ۔۔۔۔۔ بلے من وتی راہ ءَ روَگ ءَ اِتاں ۔۔۔۔۔۔ گندئے ھمے دمان ءَ تئ چکّاسی سِلپ منی پادانی کِرّا کپت ءُ تو چَک جت پہ آھی ءِ چِست کنگ ءَ ۔۔۔۔۔ بلے من پیسرا چِست کُتگ اَت ۔۔۔۔۔۔ ھمے کسانیں دمان ءَ ۔۔۔۔۔۔ کلھے من ترا دیست ۔۔۔۔۔۔ آ ھم اولی ءُ گُڈی رَند بوت ۔۔۔۔۔ بلے تئ زیبائی ءُ سادهیں چمّاں من ءَ اَنچو شیدا کُت کہ سِلپ ءَ تئ دست ءَ دیئگ ءَ رند من هوش ءَ هم نہ اِتاں کہ تو دیریں شُتگ ئے ءُ من انگت ڈِگری گرلز کالج ءِ مین گیٹ ءَ چہ کمّو اے دیم اوشتاتگاں ءُ هیال کنگ ءَ آں کہ تو انگت منی دیم ءَ اوشتاتگ ئے ۔
شاباش پیارے ءَ بات کہ منی گوشانی نزیک ءَ آستو آستو گُشتے " دور کن دبئ اِنت " ءُ من کہ ھوش ءُ گیگ بوتنت داں پیارے ءِ ٹھک ءُ روڑ ءَ ابید هِچ نیست اَت ۔۔۔۔۔ بلے۔۔۔۔۔ ماھزمین ۔۔۔۔۔ آ دمان منی مهر ءِ اولی دمان اِتاں ۔۔۔۔ من نزانتگ اَت کہ تو نو منی اندر ءَ جاگہ کُتگ۔۔۔۔۔ من ءَ بے وهدیں شپاں ءَ واب ءَ چہ پاد کن ئے ۔۔۔۔۔ وتسرا گریوائین ئے ۔۔۔۔ پہ من تو منی سادھیں زندگی ءَ آشوب یے ءَ چہ کم نہ اِت ئے۔
منی بے چاڑ بوھگ ءَ بِگر داں کتاب وانگ ءِ سپر ءَ ۔۔۔۔۔۔ اے درئیں سوک من تھنّا تئ سوَب ءَ زُرتنت ۔۔۔۔۔ منی دل ءَ کتاب وانگ من ءَ آشِکی سکّارینگ ءَ اَت ۔۔۔۔۔ کتاب من ءَ سوج دیان اَت کہ ترا آزاتی ءَ بِل ۔۔۔۔ چو ھما پُل ءَ کہ رُدیت ۔۔۔ اجگ بیت۔۔۔۔۔ ءُ زندگی ءِ بیگاه آں بوه تالان کنت۔
خالد ھسینی ءِ گِدار " اینڈ دی ماؤنٹینز ایکوڈ " ءِ کارست پری من ءَ اے اُمیت ءَ دیئگ ءَ اَت کہ اے پدمنتگیں ءُ زوراکیں اهد ءَ هم من ءُ تو روچے الّم دوبر دُچار کپاں ۔۔۔۔۔۔۔ بلے اے سپر ءَ یک چیزّے هروهد هست اَت ۔۔۔۔۔ منی ھمراہ اَت ۔۔۔۔۔۔۔ تھنّائی۔
من ترا وتی کلوه سر کُت کہ " تو من ءَ سک دوست بئے " ۔۔۔۔۔ تئ جواب ھم من ءَ انگت ءَ یات اِنت " تو چہ من ءَ شرترینے کرز ئے " ھاھا من زاناں کہ جنکے ءَ بچکے دوست مہ بیت ھمے جواب ءَ دنت ئے ۔۔۔۔۔۔۔ گرلز ڈگری کالج ءِ دیم ءَ مئے اولی گِندُک ءَ بِگر داں مرچی شش سال سرجم اِنت۔۔۔۔۔۔۔۔۔ بلے ماھزمین ۔۔۔۔۔۔ تو بہ گندئے شک بہ کن ئے کہ من گوں وتی یک نیمگی مھر ءَ دگا کُتگ ۔۔۔۔۔ بے ایمانی کُتگ ۔۔۔۔۔۔۔ اسلا مرچاں تو من ءَ پیشی وڑا دوست نہ بئے ۔۔۔۔۔۔ زندگی ءِ دستگٹّی ءُ زوراکیاں من ءَ اینچو موه اوں ندات کہ تئ یک کلھے دیستگیں ڈکّمیں مُدّاں یات بہ کناں ۔۔۔۔۔۔۔ ماھزمین ترا دست گروک یے ھست ۔۔۔۔۔۔ پمیشکا من لوٹاں من وتی دست ءَ پہ زمین بہ شھاراں ۔
من تئ ءُ وتی یک نیمگی مهر ءِ اے چار سال ءِ پُر مهریں سپر ءَ چہ وتی دگابازیانی پھلی آں لوٹگ ءَ آں ۔
ماهزمین! اے دمان ءَ کِیتلی ءِ چیر ءِ اِشکر پُر اَنت ۔۔۔۔۔ روچ نوکی جان کشّگ ءِ وڑا اِنت ۔
شالا گم مہ گِندات ئے
وتی یک نیمگی مهر ءِ دگابازیں کارِست ۔۔۔۔۔ رگام ۔
No comments:
Post a Comment