مزاکی ءَ چہ ملک پرستی ءَ داں
سوشل میڈیا ءَ یک نامی ایں مردمے اے گُشگ ءَ ات ءُ وتی وانوکاں باور کنائینگ ءِ جھد کنگ ءَ ات کہ یوکرین ءِ سروک یک وشیں کامیڈینے۔ ھر وھد ءَ گشیت کہ روس ءِ آھوکیں ٹارگٹ من ءُ منی کھول اِنت۔ما اے وھد ءَ نگیگ تریں ھالتاں چہ زندگی کنگ ءَ اِنت۔
من ءَ یک ساھتے انچو گُمان بوت کہ اے ذمہ دار ءُ قابل ایں مرد راستی ءِ ھنڈالاں چہ مارا باور کنائینگ ءَ اِنت۔من مرد ءَ گوں دلگوش اِت انت کہ ٹویٹر ءَ انچیں ھالے اتک کہ قیامت ءِ سما بوت۔ زمین جمبگ ءِ سما بوت۔
امریکہ پرستیں مردم بائیڈن ءِ گپ ءَ لگ اِت انت ءُ بائیڈن ءِ ستاہ اِش کت کہ مئے عظیم امریکی سروک ءَ روس ءَ ترندیں جوابے داتگ ءُ روسی وزیر پیوٹن ماں ٹویٹر ءَ ان فالو کتگ۔
لک ستا وتی جاگہ ءَ،دنیا ءِ مستریں طاقت ءِ رھشون بائیدن، پیوٹن ءِ ان فالو کنگ ءَ چِہ روس ءُ یوکرین ءِ جنگ ءَ ھلاس کت کنت؟
وانوکانی زانت ءَ آرگ لوٹ آں کہ ٹوئیٹر ءِ ان فالو ءُ فیسبک ءِ ان فرینڈ ھردوئینانی لبز جدا بلے معنا یک انت۔ان فالو ءُ ان فرینڈ کنگ ءَ چہ یک مردمے گوں دومی مردم ءَ گوں وتی سماجی زندگی ءَ ھلاس کت کنت۔ بلے چے فائدگ سماجی زندگی ءِ ھتم کنگ ءَ؟۔ جنگ یوکرین ءُ روس ءِ میان ءَ بوھگ ءَ انت، لس مھلوک اُودا مِرگ ءَ انت۔ترس یوکرین ءَ اِنت۔زندگی ءِ وشّی، اُوست یوکرین ءِ سرزمین ءَ گوں ھاک ءَ ھوار بوھگ ءَ انت۔
بائیڈن، تھنا پیوٹن ءَ ان فالو کنگ ءَ اِنت۔ ءُ بد بھتی ھمیش انت کہ ٹویٹر ءِ ان فالو کنگ ءَ چہ جنگ ھلاس نہ بیت بلکیں پیوٹن ءَ زرّی، اقتصادی ان فالو کنگ ءَ چہ اوں یوکرین ءِ ھمراداری ءَ چہ اے جنگ ھلاس بوت کنت۔
اے جنگ ءَ باز مردم روس ءَ ملامت کنت ءُ باز یوکرین ءَ الزام جنت۔ من نہ زاناں کہ ظالم کے انت ءُ مظلوم کے اِنت؟۔ بلے تاریخ یک انچیں چیزے کہ کسّ ءَ نہ بخشیت۔
تاریخ گُشیت کہ 2014 ءَ روس ءَ یوکرین ءِ ھند کریمیا ءَ اُرش کتگ ءُ وتی قبضہ ءَ کُتگ۔ تاریخ ءِ ھساب ءَ چہ روس ءِ اُرش ءَ رند روسی نسل ءَ یوکرینی مردماں وتی آزاتی ءِ جار شروع کتگ۔
روسی سرپرستی ءَ چہ ھمے مردماں کریمیا ءِ نزیک یوکرینی دمگ لوہانسک ءُ ڈونیسک ءَ وتی کاروائی تیز کتگ انت ءُ یوکرین ءِ لشکر ءَ گوں جنگ کُتگ۔انوں ھمے دوئیں ھند روسءَ آزات ریاست ءِ نام ءَ من اِتگ انت۔
تاریخ ءَ یوکرین ءَ سوویت یونین ءِ زمانگ ءَ روس گشتگ۔ھردیں کہ سوویت یونین پرشت ءُ پروش بوتگ گڑاں یوکرین نامیں یک ھندے ءَ گوں وتی مردماں ءُ زمین ءَ آزات ملکے جوڈ کتگ۔
پیوٹن گُشیت کہ من یوکرین ءَ پدا روس ءِ چیر دستی ءَ کار آں۔ھالانکہ نوں یوکرین وت یک آزات ایں ملکے۔یک آزاتیں ھلکے ءَ گوں وتی مردم ءُ دفاع ءِ است اِنت۔
اگاں روس پدا سوویت یونین ءَ جوڈ کنگ لوٹ اِیت گڑاں کرغزستان ءَ سر ءَ اُرش چیا نہ کنت؟ازبکستان،تاجکستان،کازکستان۔آذربائیجان،ارمینیا ءُ استونیہ ءِ سرا اُرش چیا نہ کنت؟ اے ھم سوویت یونین ءِ پروشگ ءَ رند آزات بوتگ انت۔
یوکرین ھم یک آزات یں ڈیھ یئ ۔یوکرین ءِ آزاتی سرجمیں دُگنیا ءِ نقشہ ءَ است اِنت۔روس سامراج انت ءُ اُرش کنگ ءَ اِنت ءُ یوکرین وتی آزاتیں ڈیھ ءِ دفاع ءَ کنگ انت۔ وتی مھلوک،مڈّی،ھند ءِ دفاع ءَ کنگ ءَ اِنت۔
یوکرین ءِ سروک ولادو میر زلنسکی قول ءِ ھما مرد ئیگ ءَ کہ بلاھیں کامیڈینے ۔امریکہ ءَ گشتگ کہ ما تئی واستہ یک بالی گرابے رھادگ کن انت کہ ترا پہ سلامتی مئے کِرا سر کنت۔یوکرین ءَ تئی جان ءَ ھترہ است انت۔بلے یوکرین ءِ مزن وزیر ءَ جواب داتگ کہ من ءَ اے وھد ءَ بالی گراب اِنّا بلکیں ٹینک ءُ سِلاہ ءِ زلورت انت۔من ءَ وتی ڈیھ ءِ دفاع کنگی انت۔من ءَ تچگی نہ انت ءُ من وتی گڈی ساہ ءَ داں وتی ڈیھ ءِ پھازگ ءِ جھد ءَ کن انت۔۔
نوں شُما بُگش ات یوکرین ءِ سروک دلاّرے،کامیڈینے یا ڈیھ پرستے؟۔
No comments:
Post a Comment