"بلوچ ءِ لوگ ءَ شُد انت، گُژن انت بلے ھڑکّہ نہ انت" بلوچ ڈرائیورانی نام ءَ

بلوچ ءِ لوگ ءَ شُد انت، گُژن انت بلے ھڑکّہ نہ انت

جاوید بلوچ

پلیری ءَ شُکر انت دو روچ بیت ھچ کزاہ ءِ ھال نیتکگ. ایوک یک پک اپ یے ءِ ٹائر ترکتگ ءُ کمو دیمتر ءَ چٹی ءِ نزیک ءَ پک اپ یے ءَ پسے جتگ۔ زیرو پوائنٹ ءِ کرا دو تیل ءِ گاڑی وت مں وت ٹکر اِتگ یک ڈرائیورے ءِ پاد پروشتگ ءُ دومی ءَ ھچ نہ بیتگ۔ گاڑیانی ھیر انت ھدا سر ءَ سلامت بہ کنت۔

رائل ھوٹل ءَ کمو دیم تیل ءِ گاڑی یے ءَ سما نہ کُتگ یوٹرن ءَ سینکلے جتگ۔ گاڑی تتکگ شگریں سینکل ءِ بچک ءَ ھچ نہ بیتگ۔ جی ڈی ءِ پارک ءِ کرا گول چوک ءَ تیل ءَ لوڈیں گاڑی یے ءِ ھدا بچائینت گوں ترندی ٹرن کنگ ءَ پردگیں بہ لیٹ ایت۔ آنکاڑہ پُل ءِ کرا تیل ءِ گاڑی یے سڑک ءَ جھل کپتگ۔ بچک بُرتگ ئے کراچی ءَ۔ گاڑی داں سے روچ ءَ ھمود ءَ کپتگ بوتگ۔ 

کندیل چوک ٹرن کنگ ءَ زمبادے ءَ نہ چارتگ کورولاے  ترند پیداگ بیتگ بلائیں کزاہ یے بیتگ۔ پیری کالج ءَ چھٹی کنگ پد بچک پشکان ءَ روگ ءَ بیتگ راہ ءِ نیم ءَ تیل ءِ گاڑی ءَ جتگ۔ گاڑی شُتگ۔ رند ءَ بچک راہ گوزیاں چتگ ءُ گوادر ءَ آرتگ۔ 

اے ھمے ھال انت کہ گوادر ءَ ھمروچ اشکُنگ بئیگ ءَ انت۔

ھور ءِ ءُ بارڈر ءِ کاروبار ھم ھدائی روزی یے باریں داں چُنت روچ ءَ ھست انی مردم کمو آپ ءُ لاپ انت۔ روچے سے چار کزاہ بیت۔ لھتیں ڈرائیور سماہ نہ کنت ءُ لھتیں کزاہ چہ ھدا ءِ نیم ءَ بیت۔ کس وش نہ انت کہ کزاہ یے بہ بیت۔ ءُ بلوچ بزگ چون بہ کنت؟ بلوچ ءِ لوگ ءَ شُد انت، گُژن انت۔ بزگی انت۔

بارڈر ءَ سیٹھانی کاروبار انت۔ آ لوٹ انت امینچو گیشتر ٹپ لگیت شرتر انت۔ آیانی کاروبار ھم نہ اوشتیت ءُ ڈرائیورانی دیاڑی یے ھم گیش بیت۔ بلوچ وَ چوناہا مرگ ءَ انت۔ بیگواہ کنگ بیگ ءَ انت۔ نشہ ءِ آماچ انت۔ ءُ پدا بلوچ ءَ بچار براتے کہ کاروبار کنت دومی بلوچ ءَ وش نہ ات۔ آ کہ شپانی نیم ءَ لوگاں دور کن انت مردماں بیگواہ کن انت یا ھما سیاہ کانچیں گاڑی کہ نشہ بَر انت کار انت آیانی بابت ءَ کدی گپ نہ کنت بلے تیل ءِ ءُ بزگیں ڈرائیورانی پُشت ءَ کپتگ۔۔۔۔۔

باور کن آیانی بابت ءَ گپ جنگ ءَ پیسر تئی زندگ بوھگ المی انت۔ تئی لاپ ءِ شوھازگ ءَ گیشتر تئی ساہ ءِ رکگ المی انت۔ ھو! اے راستے کہ بلوچ ءِ لوگ ءَ شُد انت، گژن انت ءُ بزگی انت بلے ھڑکّہ نہ انت۔ 

یک ٹپے ءِ زر نہ رس انت بلکیں بلے تئی چمانی واب ءِ لذت۔ تئی مات ءِ مھر، زھگانی بچکند ترا رس انت۔ تئی شُدیگیں مات! بزگیں زال یا زھگ وش بھت انت کہ آیاں تئی اکس گون نہ انت ءُ دگّانی سر ءَ یا پریس کلبانی دیم ءَ عذاب نہ انت۔ تئی اولاک شر انت۔ دست ءُ پاد سلامت انت اگاں ٹپے کم جن ئے یا گیش بلے زندگ بئے۔ تئی کش ءُ کرا گوزوکیں سینکل والا، گاڑی ءُ ٹریکٹر والا ءَ چہ تو وت ءَ رکین ئے گڑا آ ھم رکیت۔ 

 ھردیں وتی پک اپ ءَ یا زمباد ءُ چنچی ءَ سوار بئے گڑا زرّانی بنڈل ءِ بابت ءَ جیڑگ ءَ پیسر وتی مات ءِ کرچکیں پیشانی، زال ءِ وداریگیں چم، کسانکیں زھگانی بچکند یا برات ءُ گھاروکانی اوست ءُ واھگانی بابت ءَ ھم بہ جیڑ گوں۔ چیاکہ آ ھم بلوچ آں۔ آ ھم شُدیگ انت، گژنگ انت ءُ بزگ انت بلے آیاں ھڑکّہ نہ انت۔

درستیں ڈرائیوراں پہ سلامتی۔ وت سلامت بات ات ءُ دگہ ھم چہ شما سلامت بہ بات انت۔