حفیظ پرچا بیگواہ انت؟

حفیظ پرچیا بیگواہ انت؟

نبشتہ کار: ایسُپ بلوچ

سدانی کساس ءَ بلوچ نودربر پاکستان ءِ مزن شھدربرجاہ قائداعظم ءَ زہرشانی کن انت،کس ایچ نہ گشیت،نودربر کہ اسلام آباد ءِ دگاں رھادگ بنت کس ایچ نہ گشیت،نودربر کہ دپاں ٹیپ جن انت ءُ ننداں کس ھچ نہ گُشیت۔۔

ھاں،پولیس لٹ و چوپ کنت،زاہ ءُ بد کنت بس۔۔لس ءُ سیاسی سروک یکجہتی کن انت بس۔۔پاکستان ءِ انسانی ھقّانی وزیر کئیت،لکچر دنت ءُ رؤت۔

مئے تھا باز مردم ھمے گُشیت،ھیال ءُ نبشتہ کنت کہ حفیظ یلہ کنگ بہ بیت،حفیظ انساپ دئیگ بہ بیت۔۔۔بلے مئے تھا باز کم مردم اے ھیال ءَ کنت کہ حفیظ پرچیا بیگواہ انت؟

ممکن انت پاکستان ءِ باز نودربر ھمے لیکہ ءَ بداریت کہ حفیظ ملک ءِ سلامتی ئے ھلاپ بوتگ پمشکہ بیگواہ کنگ بوتگ،حفیظ پاکستان ءِ واستہ یک ھترہ ئے،حفیظ ءِ بیگواہ کنگ مئے واستہ سومبندی ئے۔

بلے ھمے نودربر بہہ اے ھیال نہ کن انت کہ حفیظ ءِ بیگواہ کنگ ءَ پد حفیظ ءَ چہ ابید ءِ قلم ءِ ءِ دگہ ھچ برامد نہ بوتگ،حفیظ ءَ چہ ابید زانت ءَ دگہ ھچ برامد نہ بوتگ۔۔حفیظ ءِ بیگواہی کنوکاں نہ رسانکدراں داتگ کہ حفیظ گُنڈا ئے او نہ اے منِتّگ ئے کہ حفیظ پاکستان ھلاپ ئے گلے ءَ گوں بندوک انت،سیادی داریت یا ھال ءِ است۔

اگاں حفیظ گُنڈا ءِ نہ انت،گڑاں چیا بندیگ انت؟

اے جُست ھم باز مردم ئے گوک ءَ کئیت بلے اے جست ءَ سرپد بوھگ ءَ پیسر اے زانگ الّمی انت کہ بلوچ نودربر کہ آھاں جتائیں شھدربرجاہ آں ونتگ ءُ وانگ ءَ انت،آ چیا گشگ ءُ گار کنگ بوتگ انت؟

ھیات کہ کراچی شھدربرجاہ ءِ نودربر ءِ بوتگ،ایپ سی ءَ کشتگ ءُ ھیات ءَ چہ ھچ برامد نہ بوتگ،چیئرمین زاھد گار انت،سنگت سنا گار انت،ذاکر مجید گار انت ڈاکٹر دین جان گار انت،ایشاں چہ ھم ھچ برآمد نہ بوتگ،اے ھم پاکستان ءِ ھانود گِساں آرگ نہ بوتگ۔۔۔ھمے پیم ءَ حفیظ اوں ھمے داب ءَ گار کنگ بوتگ ءُ انگت بیگواہ انت۔۔

اے جست ھم بگندے ذہن ءَ مُشت بےپرمائیت کہ چیا بلوچ نودربر ٹارگٹ انت،ایشانی ٹارگٹ کنگ ءَ چِہ سرکار ءَ چی نپ بیت؟

اے پسو ءِ درگیجگ ئے واستہ زانگ المی انت کہ حفیظ یک وانگ جائے ءَ چہ چِست کنگ بوتگ،ڈاکٹر دین جاہ نادراہ جائے ءَ چہ چست کنگ بوتگ او ھیات پِت ءِ مچکدگ ءَ کُشگ بوتگ۔۔۔

عالم تھنا دومی مردم ءَ علم دات کنت ءُ دگہ ھچ۔۔ممکن ایں ھیات ھمے واستہ کُشگ بوتگ کہ عالم ءِ بوتگ،علم ءِ ھیرات ءَ بوتگ۔۔زاھد ءَ ورناہ سیاسی علم ءُ سنچ ءُ بود داتگ انت۔ھمے داب ءَ حفیظ ءَ ھم ھزدار ءِ لس مھلوک ءِ سرا علم ءِ ھور گوارینتگ۔۔

نوں مئے ءُ شمئے پھمگ آسان تِر بوت۔۔پرچا کہ اے مثال آں پد الم ما پھمت کناں کہ بلوچ عالم ھمے واستہ بیگواہ کنگ بنت کہ آ لس مھلوک ءَ زانت دات مکن انت۔۔لس مھلوک ھمے پیم نا وانندہ بہ بیت۔مئے ھُکم ءِ گلام بہ بیت او ما ھمے داب ءَ وتی لیکہ ءَ بلوچستان ءِ لس مھلوک ءِ سراں لگاشان بہ کن انت۔

مئے سرپد بوھگ المی انت کہ اے داب ھمے وڑا کہ روان انت۔روان کنت۔۔مرچی ھزدار ءِ حفیظ بیگواہ کتگ ئے،باندا کیچ ءَ حفیظ ءِ بیگواہ بیت او پونشی ڈیرا گازی ھان ءِ نمبر کئیت۔

حفیظ ءِ رنگ ءُ چھر ممکن انت بدل بہ بنت بلے حفیظ ھما بیت۔۔حفیظ ءِ لیکہ ھما بیت،حفیظ ءِ زانت ھما بیت،حفیظ ءِ بیگواہی ھمے داب ءَ بیت۔۔۔

بیا اِت بلوچستان ءِ حفیظ آں رکّین انت۔۔