ناکو رمزان کسّہ کنت

یاسین مراد

ناکو رمزان مئے میتگ ءِ ھما کماش اِنت کہ آئی ءَ وتی زند ءِ گیشریں وھد یورپی مُلکاں گوزاینتگ۔ ناکو رمزان یک سکیں شریں ءُ مُردم دوستیں انسانے. ھر وھد پہ وتی قوم ءِ شری ءِ واستا وڑے نا وڑے ءَ جُھد کنت تاکہ آئی ءِ پدمنتگیں راج دیم روئی بکنت ءُ دُگنیا ءِ آدگہ راجانی ءِ وڑ ءَ دیم ءَ بہ وروت. 

ناکو رمزان مُدام وتی یورپ ءِ توک ءِ گوازیتگ ایں زند ءِ باروا کسّہ کنت گڑاں ھمے وڑ ءَ یک روچے ناکو رمزان ءَ یک سکیں وشیں کسّہ یے کُت.

ناکو ءَ گُشت من وھدے یورپ ءَ شُتگاں گڑاں من وتی لھتیں روچ ھما کیمپ ءِ توک ءَ گوازینت ءَ کہ آودا ھما مُردم کایاں کہ دگہ مُلکاں چہ اتگاں ءُ ادا وتی روچاں گوازین انت۔ من ھم ھمے کیمپ ءِ توک ءَ لھتیں روچ گوازینت. ناکو رمزان گُشیت من ھمے وھد ءَ کہ کیمپ ءَ بیتگاں گڑاں اِدا سک باز مُلکاں چہ اَتگیں مُردم ھم وتی زند ءَ گوازینگ ءَ بیتگ آں. ایشانی توک ءَ ھُمک زبان ءِ مردم ھم بوتگاں چوش کہ فارسی، پٹھانی، کُردش، بلوچ، ءُ دگہ سک باز.

ادا مئے واستا ھمُک زند ءِ آسراتی مارا رستگ چوش مئے واستا ورگ ءُ وردن، بس یا ریل ءِ سواری ءِ ٹکٹ ھم مفُت بیتگ. ماں وھدے بیمار بیتگ ایں گُڑاں مئے علاج ھم ھمے مُلک ءَ مفُت ءَ کُتگ. 

  ناکو گُشیت من ھمے وھد ءَ کہ کپمپ ءَ بوتگاں گڑاں ادا مئے کراں انگریز اَتگاں مارا ھمک آسراتی داتگ اِت چیا کہ یورپ انگریزی مُلکاں بلے ادا یورپی ھر مُلک ءِ وتی الگ یک زبانے ھست چوش کہ فرانس ءِ مردم فرنچ زبان ءَ گپ کناں، اٹلی ءِ مردم اٹالین زبان ءَ گپ کناں ءُ ھمے وڑا یورپی مُلکاں وتی وتی زبان ءَ گپ کناں.

ناکو رمزان درآینیت کہ وھدے من ھمے کیمپ ءَ بیتگاں گڑاں یک رندے رمزان ءِ ماہ ھم اتک گڑا مئے کیمپ ءِ مُسلمانیں مردماں روچگ داشت. 

ناکو گُشیت من وتی زند ءِ توک ءَ رمزان ءِ ماہ ءَ زند ءَ روچگ نہ داشتگ بلے من وھدے ادا اتگاں گڑاں روچگ دارگ شروع کُت. ناکو رمزان گُشیت منی ارادہ نہ بیتگ کہ روچگ بے داراں بلے انگریزاں من ءَ روچگ دارگ ءَ مجبور کُت. 

ناکو گشیت من وھدے کیمپ ءَ بیتگ آں گڑا مئے ھما مردم اتگاں کہ مارا کیمپ ءِ توک ءَ مئے دلگوش داشتگ اِت ھر کَس ءَ جُست ئے گپتگ کہ کئے روچگ داری ءُ کئے روچگ نہ داریت گڑاں ھمے مئے دلگوش داروک ءَ مارا بس ھمے جُست کتگ

Are you Ramzan?

ناکو گشیت من پیسرا ارادہ نہ کُتگ کہ روچگ داراں بلے وھدے کہ ھمے مُردم اتکگ من ءَ جُست ئے کُتگ  کہ

Are you Ramzan?

من گشت ھو بلے نہ زانت کہ من ءَ اے جُست کنگ انت کہ بزاں تو روچگ دار ئے یا انا بلے چوش کہ منی وتی نام  رمزان اَت گڑاں من ھو کُت. 

ھمے وڑاں گڑاں من وتی زند ءِ اولی روچگی داشت ءُ پدا ھمائیں من ھر رمزان ءَ روچگ باں. ادا من اے گُشگ لوٹاں کہ من ءَ یک انگریزاں مُسلمان کُت.