شھید لالا ھمید چوک یا دھرنہ چوک

شھید لالا ھمید چوک یا دھرنہ چوک

جاوید بلوچ    

گْوَستگیں سال ءِ نندانک ءِ بنداتی روچ اِتاں کہ پاکستانی میڈیا ءَ اے نندانک یک شل ءَ ڈالچار کُتگ اَت۔بلے سوشل میڈیا ءَ اے نندانک باتیل ءِ سائگ ءَ چہ چِست کُت ءُ جھان ءَ سر کُت۔ جھانی اھوالکاری ادارگاں نندانک ءَ شریں وڑے ءَ کور کُت ءُ آخر پاکستانی میڈیا لاچار بوت کہ اشیی ءَ کور بہ کنت ءُ پد ءَ مولانا ھدایت الرحمن بلوچ ٹاک شوزاں لوٹائینگ بوت۔ بلے نندانک ءِ بنداتی روچاں گْوادر ءَ چار روچ ءَ موبائل انٹرنٹ بند کنگ بوتگ اَت۔ یک شپے ھمے درگت ءَ یک ٹوئیٹر اسپیسے ءَ انھگت ءَ آ وھد ءِ صوباہی ھزانگ ءِ  وزیر ظہور بُلیدی، مولانا ھدایت الرحمن بلوچ ھمے جیڑہ ءِ سر ءَ دیم پہ دیم ھم بوت انت گڑا ھمے پدر بوت کہ صوباہی سرکار اے نندانک ءَ سک پریشان کُتگ بلے ظہور بُلیدی ءَ ھم وزیری ءَ ابید انٹرنٹ ءِ بند کنگ ایر جَت۔

انٹرنٹ ءِ سر ءَ بندش جتگیں روچاں سوشل میڈیا ءِ کارمرد کنوکیں میڈیا آؤٹ لٹساں یک روچے نندانک ءِ جاگہ ءَ علامتی زبان بندیں زھرشانی یے ھم کُت۔ ھمے روچ ءَ مولانا ھدایت الرحمن بلوچ گوں ھک بہ دئے زرمبشت ءِ آ دگہ سروکاں اوشتوک اَت کہ گوں آئی ءَ ھمے گپ بوت کہ اے وائی موڑ ءِ نام نی احتجاجاً یک شھیدیں بلوچ اھوالکارے ءِ نام ءَ کنگ بہ بیت داں دگہ برے سرکار ءُ ادارگ ھئیالانی آجوئی ءِ سر ءَ بندش جنگ ءَ پیسر ھزار براں بہ جیڑ انت انچوکہ "پُل چہ سِندگ ءَ بوہ تالانی ءَ گِستا کنگ نہ بنت" ھمے وڑ ءَ زندگیں انسان ءِ ھئیالانی ءُ گُپتار ءِ سر ءَ ھم بندش جنگ نہ بیت۔ ھمد ءَ اوشتوکیں گْوادر ءِ دگہ یک اھوالکارے ءَ مشورہ دات کہ گڑا پلاں شھیدیں صحافی ءِ نام ءِ بدل ءَ اے چوک شھید لالا ھمید ءِ نام ءَ کنگ بہ بیت کہ یکے وَ لالا ھمید ھمد ءَ باتیل ءِ سائگ ءَ واب اِنت ءُ دومی آ ھم اھوالکارے بوتگ۔ نہ زاناں اے سنگت ءِ نیت چی ات بلے مارا اے وشی بوت کہ چہ لالا ءِ  اھوالکاری ءَ اد ءِ اھوالکار پراموش نہ آں۔ ھمد ءَ ھمے گپ پکہ بوت کہ مرچی ءَ پد انٹرنٹ ءِ سر ءَ بندش جنگ ءِ زوراکی ءِ بگیری ءَ اے چوک ءِ نام شھید لالا ھمید ءِ نام ءَ اِنت۔

بلے ھئیرانی گپ اِش بوت کہ اے گپ ءَ پد انھگت ءَ وائی موڑ ءِ نام دھرنہ چوک کنگ بوت؟ اگاں دھرنہ دئیگ ءِ پد ءَ  اے جاگہ ءِ نام دھرنہ چوک کنگ بہ بیت گڑا دھرنہ چوک نمبر 2 پورٹ ءِ دیم ءُ دھرنہ چوک نمبر 3 سُر بندن کراس ھم بہ بیت؟

یا وَ جیڑہ شھید لالا ھمید ءِ نام اِنت؟ اگاں شھید لالا ھمید ءِ سْیاست ءِ سر ءَ کسے تپاک نہ کنت، کُت کنت بلے آئی ءِ اھوالکاری ءِ سر ءَ ، ناھکیں چِست کنگ ءُ شھید کنگ ءِ سر ءَ وَ کس ءَ دگہ جیڑیے نیست۔ اگاں جیڑہ یے ھست ھم یکے وَ ھما طبقہ ءَ بوت کنت کہ لالا ءِ چِست کنگ ءُ شھید کنگ ءِ وھد ءَ ھکمران بوتگ انت۔ ھما کہ آیانی دیم ءَ شھید لالا ھمید، قیوم کامریڈ، احمد داد ءُ آ دگہ شھید کہ آ وھد ءَ ھمے وڑ ءَ مولانا ھدایت الرحمن ءِ داب ءَ ھمروچ پہ بُنکی زند ءِ ءُ انسانی جیڑیانی سر ءَ کُکار کنگ ءَ اِتاں، ھمروچ زھرشانی ءُ روانک کشگ ءَ اِتاں گڑا ھمے ٹیکھدار ءُ زردار کہ مرچی نہ وش اَنت آ روچی ھم نہ وش اِتاں۔۔۔۔۔ھمایاں اے چوک ءِ نام شھید لالا ھمید ءِ نام ءَ کنگ بوت کنت کہ وش مہ بیت یا جماعت اسلامی ءِ گوں بلوچ راجی زرمبشت ءَ کست ءُ کینگ ھم یک سببے بوت کنت۔ اگاں ناں اے جیڑہ پہ ھما میڈیا ءِ واستہ اِنت کہ ھک بہ دئے زرمبشت ءِ سروکانی دل ءَ ھمے تُرس اِنت کہ اگاں اے نندانک ءِ جاگہ ءِ نام شھید لالا ھمید ءِ نام ءَ بہ بیت گڑا پاکستانی میڈیا آیاں کوریج نہ داں۔ل؟ آ دگہ سرجمیں بلوچستان ءِ نام وَ شھید لالا ھمید ءِ نام ءَ نہ اِنت، آیاں کوریج رسگ ءَ اِنت؟

یا شھید لالا ھمید چوک ءِ نام یک جیڑہ یے پہ ھما فیک نیوز ءِ ھاتر ءَ جوڑ کُتگیں پیج ءُ ویب سائٹانی واستہ کہ آیاں ادارگ فنڈنگ کنگ ءَ اَنت؟ ءُ اے نام ءَ کوریج دات نہ کناں۔ بلے انچش کہ تْیاب ءِ فطرت انت کہ گند ءُ گسڑاں لیپگ کنت ءُ ڈن ءَ کشیت۔ ھمے وڑ ءَ اِے شھر ءِ ھم کہ ادارُکی چیزاں زوت لیپگ کنت ءُ چہ وت ءَ گِستا کنت۔

 مرچی ھمے شھدائے جِیوَنی چوک ءُ مُلا پازل چوک وتی جاگہ ءَ اَنت۔ ھما کارست، ٹولی ءُ کُٹھم ھم ھست آں کہ آیاں پہ وتی ذاتی نپ ءُ پائدگانی ھاتر ءَ کُکار، جاک ءُ سْیاست کُتگ بوتگ مرچی دنزانی تہ ءَ گار انت، ءُ دومی ھما کہ آیانی جند نیست انت بلے آیانی نام پہ شْرَپ ءُ دروت گرگ بیت۔ اے شھر ءَ والی ءِ دست چُکاں بِگر داں ایوب، ضیاالحق ءُ غوث بکش ءِ نظریہ ءِ ھمراہ پد ءَ پہ سینگار ءُ مشرف ءِ پلاٹ ءُ ایکڈانی دہر ءَ پِر تراِتگیں مرچی پراموش کُتگ انت بلے سید، مجید، قیوم، اھمد ءُ کالو بابا نمیران کُتگ انت۔۔۔۔

شھد لالا ھمید ءِ نام ءَ اے چار راہ دائم یک گھگیری ءُ مزاحمتے ءِ دروشم مِک بیت، اد ءَ دھرنہ بیت یا روانک، کانچ ءِ دگ جوڑ بنت یا ماڑی بلے انچش کہ ھئیالانی سر ءَ بندش جنگ ممکن نہ انت ھمے وڑ ءَ لالا ءِ نام ءِ زورگ ءُ نہ زورگ ءَ چہ اے نام، اے مزاحمت ءُ اے کشگ گار نہ بیت۔