گوْرانی کینسر

رجانک: گوْرانی کینسر

     گْوادر ءِ توار 

بیست ءُ ھشت سالی ایں ایم فل ءِ نودربر نازیہ یک روچے جان شودگ ءَ بیت، آ انھگت ءَ محسوس کنت کہ آئی ءِ دلبند ءَ گُکّے پِر اِنت۔ دست جَنگ ءَ انچو سما کنت کہ ناہ ءِ گڈگے بہ بیت۔ بلے چہ اشیی ءَ آئی ءَ ھاسیں درد ءُ تکلیپ نہ بیت۔ لھتیں وھد گوزیت۔ 

یک روچے پد ءَ انھگت ءَ آئی ءَ ھمے گُک مار اِت گڑا آئی ءَ وتی مات ھال دات۔ مات ءَ یک دعا یے سوج دات کہ اشیی ءَ بہ وان وت شر بیت اگاں تکلیپ ئے دات گڑا ڈاکٹر ءِ کر ءَ رو ایں۔ نازیہ ءَ لھتیں ھپتگاں ھمے دعا وَنت ءُ زیتون ءِ تیل ھم مُشت۔ آ سِتک دارگ ءَ اَت کہ چہ اشیی ءَ آئی ءِ دلبند ءِ سر ءَ گُک کستر بئیان اِنت۔ ھمے وڑ ءَ شش ماہ گْوَست۔ نازیہ چہ اے گُک ءَ بےھئیال بوت۔

نی نازیہ ءِ راستیں دست ءَ درد کنگ بندات کُت، انچو گمان بوت گُش ئے زاناں کسے دست ءِ ھڈ ءَ ٹُنگ کنگ ءَ اِنت۔ آئی ءَ دست ڈاکٹر ءَ پیش دَشْت۔ ڈاکٹر ءَ درد ءَ چہ آرام ءِ دوائی دات۔ اے دوائیاں درد کمو آرام دات۔ بلے درمانانی یلہ دئیگ ءَ گوں درد دوار بنا بوت۔ پد ءَ ڈاکٹر ءِ گور ءَ شُت۔ ڈاکٹر ءَ گْوَشت ورنائیں جنکے بوت کنت کیلشئم ءُ وٹامن ءِ کمی بہ بیت۔ آئی ءَ ھمے لِک ات انت داتاں ءُ درد ءَ چہ آرم ءِ یک سوچنے ھم جَت۔ بلے دوائیانی کورس ءِ ھلاس بوھگ ءَ گوں دوار درد گیشتر بوت۔

نی نازیہ ھئیران اَت کہ اے درد چہ آئی ءِ جان ءَ چیا در آئگ ءَ نہ اِنت۔ آ پد ءَ دگہ ڈاکٹرے ءِ کِر ءَ شُت ءُ آئی ءَ ایکسرے کنائینت۔ ایکسرے زورت ءُ ھڈ ءِ ڈاکٹر ءَ پیش داشت۔ ڈاکٹر ءَ ایکسرے چار اِت ءُ سوج دات کہ اے ایکسرے ءَ کینسر آؤٹ ڈور ءَ بَر ءُ پیش دار۔ ھمد ءَ منی ءُ نازیہ ءِ گِند ءُ نند بوت۔ 

نازیہ ءَ من ءَ ایکسرے پیش داشت ءُ گْوَشت کہ آئی ءِ دست ءِ ھڈ سک درد کنت۔ من جُست کُت کہ دست ءَ ابید تئی جسم ءِ تہ ءَ ترا دگہ کمی ءُ گیشی محسوس بیت؟ گڑا آئی ءَ گْوَشت کہ ھؤ دلبند ءَ یک گُکے ھست۔ بلے دم کنگ ءَ چہ آ کستر بوتگ۔ اے گُک ءِ چارگ ءَ پد نازیہ ءِ نادراھی ءَ زانگ دات۔ من نازیہ ءَ بائیاپسی، ھڈانی اسکن ءُ سی ٹی اسکین کنگ ءَ لِک اِت ءُ دات۔ رپورٹانی تہ ءَ چارمی درجہ ءِ گورانی کینسر ھست اَت۔ اے گوارانی کینسر ھڈ، جگر، پُپ ءُ ایڈرینل گلینڈ ءَ داں سر بوتگ اَت۔

نازیہ ءِ علاج داں ھژدہ ماہ ءَ جاری بوت۔ زِند ءِ گُڈی چار ماہ آئی ءَ گوں ترندیں آزاراں گوازینت آں۔ نادراھی ءِ جاوراں آئی ءَ برے برے وتی دل ءِ گپ ھم گوں من کُت اَنت۔ آئی ءَ سور کنگ لوٹ اِتگ اَت۔ وانگ سرجم کنگ لوٹ اِتگ اَت۔ آ یک ماتے بَنَگ لوٹ اِتگ اَت۔ آ زِندگ بوئگ لوٹگ ءَ اَت بلے آئی ءِ کسمت ءِ پیسلہ دگرے اَت۔

مئے کش ءُ گوراں ھم بوت کنت کہ دگہ نازیہ ھم ھست انت۔ چیاکہ ھر نوہ زالبولانی تہ ءَ یکے گورانی کینسر ءِ آماچ بیت۔ زالبولاں سرپدی دئیگ ءِ زلورت اِنت کہ اگاں دلبند ءَ بدلی یے گند اِت گڑا الم ڈاکٹر ءَ پیش بہ دار اِت۔ اگاں بندات ءَ اے نادراھی ءِ اِلاج کنگ بہ بیت گڑا اے نادراھی چہ ھُنڈالاں گوجگ بیت کنت۔