گْوادری مُلا چہ گْوادر ءَ در مہ یا!
نبشتکار: جاوید بلوچ
گْوادر بلوچستان اِنت ءُ بلوچستان ءِ پجار گوں گْوادر ءَ اِنت۔ اے گپ ءِ منارینگ ءَ گْوادر ءَ پد ءَ یک دھکے ءَ گیش لگ اِتگ۔ یک دھکے ءِ تہ ءَ گْوادر پنجاپ ءُ لاھور ءِ نزیک تر بوھگ ءِ نام دئیگ بوتگ، مئے مَکُّران ءِ آ دگہ جایانی سنگتاں ءُ بلوچستان ءِ دگہ شھرانی مردماں لبز ءِ گْوادری پہ ائیب ءُ مسکراہ گْوَشتگ، اد ءَ یاسمین ءَ بہ گر داں قیوم، ءُ اشاں باز پیش بی ایس او ءِ ایوب ءِ آمریت ءِ بگیری ءَ زھرشانی یا والی ءِ دھر ءَ کوجایانی بگیری ءَ آپ نہ دئیگ ءِ زرمبشت، دُرس بے ھال بوتگ اِتاں ءُ لبز ئے گْوادری گوں نمب، سُستی ءُ پہ کَلاگ ءُ مسکراہ گُشگ بوتگ اَت۔ اے دُرس ایکڈ ءُ زمینانی سودا ءِ داتگیں سوگات ات انت۔ سودا ءِ مستریں سوداگر میر، کھدہ، مشرف ءِ مردم، ووٹ والا ءُ سْیاسی ٹیکھدار اِتاں۔
ءُ دومی سبب ھمیش اَت کہ گْوادری ءُ تْیاب دپی مولمے انچیں کہ اد ءِ مردماں گوں کُشت ءُ ھون، توپک کلچر ءُ بْرات کُشی ءَ گوں بھ ھُب نہ بوتگ۔ مرچی ھم اے شھر ءَ اگاں توپکی ءُ سِلہ والا مردم گندئے گڑا دمان ءَ زانگ بیت کہ اے ڈنی بنت۔ گوادری مُلا گوں وتی تران، اوگام، جنین ءُ مردینانی روانکاں گندگ بوتگ اَت بلے نوکیں اکسانی تہ ءَ گْوادری مُلا گوں توپک، سِلہ ءُ سِلہ بنداں زائر اِنت۔ گْوادری مُلا چہ گْوادر ءَ دَرشُتگ۔
مرچی کساس 50 روچ انت کہ گْوادر ءِ شھید لالا ھمید سے راھی ءَ ھک بہ دئے زرمبشت ءِ نندانک برجم اِنت۔ ھک بہ دئے زرمبشت ءِ اولی نندانک ءَ ابید چہ بی این پی مینگل ءِ ایم پی اے، سینئٹر کھدہ بابر ءُ باپ پارٹی ءَ، آ دگہ دُرسیں سْیاسی گَل، سوشل ایکٹویسٹ ءُ دراں ڈیھ ءَ نشتگیں بلوچاں ھم پلہ مرزی کُت۔ بلے ھندی گچینکاریاں پد گْوادری مُلا ءَ ھمے سوج دئیگ بوت کہ تؤ کُکار بہ کن، ماہ ماہ یے نندانک بہ دئے، کوہ ءَ شُت نہ کن ئے گڑا پورٹ ءَ بہ رو۔۔۔۔ بزاں دانکہ نہ مِر ئے آرام مہ کن، چیاکہ تئی لوٹ اے مُلک ءَ منّگ وَ ھچ وڑ ءَ نہ بنت بلے انگت ھم چہ ترا یک دگہ نوکیں شھیدی یے امیت داشتگ۔ بلے ووٹ ءَ بھر مہ زور۔
بلوچ ءِ یک جیڑہ یے ھمیش انت کہ اے راج چہ انیتہ جلیل ءَ ھم امیت داریت کہ آ سی پیک ءِ مراگشاں مھمانداری ءِ واستہ زَر زور ایت لوٹائینگ بیت گڑا اود ءَ ھم آشوبی تران بہ کنت۔ نی مُلا کہ دپ ءِ وت گُشگ ءَ اِنت اگاں من دلپروش بوت آں گڑا من ھم کوہ ءَ رواں، انگت مُلا نہ روگ ءَ اِنت ھمے واھگداروک دلپروش بوھان انت کہ مُلا پرچا نہ روگ ءَ اِنت؟ لس بلوچ دریاورد پہ سْیاست کنگ ءَ وَ پیداگ نہ بوتگ۔ یا وَ اشیی ءَ گوں ھچ ءَ کار مہ بیت یا وَ ایوک کوہ ءَ برؤت۔ دانکہ کوہ ءَ نہ رؤت ءُ شھید نہ بیت گڑا آ مُلا بیت یا شھید قیوم کامریڈ آ پرشتہ یانی مردم انت۔ اد ءَ لس بلوچ ءَ سْیاست ءِ ھک دو شرط ءَ ھست یکے تؤ مُلاھی، مُلا، میر ءُ ٹیکھدارے بہ بئے یا وَ اشانی بیرک زوروک بہ بئے۔ اشانی کدّ ءَ تؤ ئے لس بلوچ ءَ آھگ ءِ جھد کُت گڑا تؤ دلادرے ئے۔
بلوچ ءِ گوْر ءَ ھمے ریڈ لائن کجام اِنت کہ اشیی ءَ آ دیم تؤ بلوچے ءَ چہ در کائے؟ ھمے سرکل چی اِنت کہ زانگ بہ بیت تؤ اشیی ءِ تہ ءَ ئے بلوچے ئے؟ اگاں کوہ ءَ نِشتگیں یک بلوچے بہ گُشیت کہ گْوادری مُلا اسٹبلشمنٹ ءِ مردم اِنت، پرے ھاتر ءَ سمجھ ءَ کئیت کہ آئی ءِ کِر ءَ راہ گیشتگ کہ پاکستان یک زورگیریں مُلکے ءُ بلوچ پہ زورِ تاکت گُلام کُتگیں راجے، آ پاکستان ءِ راھبند ءُ کانوداں چہ آجو اِنت پمشکہ آئی ءِ نِز ءَ ھرکس کہ پاکستان ءِ سْیاست ءَ کنت آ بلوچ دُژمنے ءُ بلوچستان ءِ گُلامی ءَ آئی ءِ دست مان بلے اگاں اے کچ ءُ کساس تھنا اے بہ بیت کہ شھر ءِ ٹیکھدار ءُ میر گچینکاریاں بھر زُرت کنت بلے اگاں دریاوردے زور ایت آ بزاں اسٹبلشمنٹ ءِ مردم انت؟ اگاں ناں گپ طبقاتی نہ اِنت ءُ دینی لیکھی بُنیاد ءَ اِنت گڑا ھمے تْیاب دپ ءَ ھما جاوراں کہ دُرسی ووٹ ءِ دئیگ ءِ کساس 50 ءَ درسد ءَ ھم نہ بوتگ بلے مُلاھیانی گُشگ ءِ پد ءَ آیانی منوکاں وتی ووٹ دینی لیکھی بُنیاد ءَ یک مُچی ءَ گوں یکیں مردم ءَ داتگ اَنت، آ اسٹبلشمنٹ ءِ مردم نہ آں، اوگانستان ءِ جَنگ ءَ بلوچستان ءَ ورنایانی بھرتی کنگ، بلوچستان ءِ مسیت ءُ مدرسہ یاں اوگانستان ءَ جھاد ءِ جار جنوکیں دینی گلے ءَ بلوچستان ءِ ھندی گچینکاریاں گیشتر سیٹ گِپتگ، ءُ انی چیف آف سراوان نواب رئیسانی ھمے گَل ءَ شُتگ، آ اسٹبلشمنٹ ءِ مردم نہ اِنت؟ ھمے پیمانہ چی اِنت ءُ کجام شاھیم ءِ سر ءَ ھمے یکیں پارلیمانی سْیاست کنوک تورگ بہ بنت ءُ سرٹیفکٹ دئیگ بہ بیت کہ اے بُنیاد ءَ گْوادری مُلا ھراب انت ءُ گْوادری ٹیکھدار، مُلاھی یا میر ءُ کھدہ شر اَنت۔
ھندی گچینکاریاں پیسر جماعت اسلامی ءِ مُلا ءِ نام ءَ مولانا ھدایت الرحمٰن نامدار اَت بلے نی سردار ءُ سرکار ءِ مردمانی کِر ءَ گْوادری مُلا ءِ نام ءَ۔ گْوادری مُلا ءَ کئی آشرباد گون اِنت یا گون نہ اِنت، اشیی ءِ پسو ءَ وھد وت زوت دیم ءَ کار ایت۔ بلے اے گپ وَ پدر انت کہ گْوادری مُلا ءِ نندانک ءُ زھرشانیاں گوں دریاورد زِر ءَ چہ ھُشکیں دستاں واتر گِساں نہ آیگ ءَ اَنت۔ گْوادر داں کراچی ءَ یک ءُ دو جاگہ ءَ ابید، گام گام ءِ سر ءَ جُست وَ کم بوتگ انت کہ کجا چی آیگ ءَ ئے ءُ کجا روگ ءَ ئے؟ بلوچانی بروکائی ءُ چِست کنوکائی انگت برجاہ اِنت بلے پیسر ءَ اگاں کسے ءِ چُک بیگواہ کنگ بوتگ گڑا آ بزگیں مات ءُ پِت شھر ءِ مستریں لینڈ مافیا یا ڈرگ مافیا ءِ گوْر ءَ شُتگ انت کہ آ وت چِست کنوکانی مردم بوتگ نی وائس فار بلوچ مسنگ پرسنز ءِ کر ءَ یا دگّانی سر ءَ زھرشانی ءَ در کاینت۔ یا ھمے نندانک ءِ جاگہ ءَ مِک ایں سائن بورڈ گوں شھید لالا ھمید ءِ نام ءَ، اشانی تہ ءَ گْوادری مُلا ءِ کمکیں بھرشتے وَ مان۔
گْوادری مُلا گوں وتی کُکار، تران، اوگام ءُ دگانی سر ءَ سْیاست کنگ ءَ بلوچ ءِ چاگرد ءَ ووٹ ءِ سْیاست ءِ تہ ءَ ٹیکھدار، سردار، ڈرگ مافیا، مُلا ءُ ملاھی ءَ کشگ ءَ اِنت۔ ءُ اے ھم راستے کہ وت مُلا یے ءُ یک دینی گَلّے ءَ گوں سْیادی داریت بلے اگاں مُلا یے چہ ممبر ءَ ایر کپتگ، ھزاراں بلوچ زالبولانی تہ ءَ آئی ءِ مات(ھمے مات کہ ایوک لس بلوچ ءِ بیگواہ بوھگ ءَ پد دگّانی سر ءَ گِندگ بوتگ انت) ھم روانکاں گون اِنت گوں، ھمے روانکاں دو ایں لنکُکاں بُرز کنگ ءَ اِنت۔ ھؤر ءُ گٹرانی تہ ءَ پادگ اِش لانتکگ انت ءُ مان دئیگ ءَ اِنت۔ ءُ سوج دئیگ ءَ اِنت کہ ووٹ ءِ سْیاست چُش کنگ بیت ءُ من ءَ ووٹ لوٹیت، گڑا چوناھا ھمے سْیاست ءَ آ دگہ زردار، مافیا ءُ ملاھی کنگ ءَ اَنت کم چہ کم آیانی دیم ءَ یک وانندھیں لس دریاوردے وَ کئیت۔
اگاں ناں جیڑہ اِش انت کہ نی بلوچ ءِ آجوئی ءِ زرمبش چون بیت؟ گڑا اے وَ انگت وشتریں گپے کہ سردار، ٹیکھدار، مُلا ءُ ملاھی ءِ منوگر ءُ ووٹ دئیوک ھم اے بابت ءَ جیڑگ ءَ اَنت کہ پیسر ءَ آیاں ھئیال نہ کُتگ یا ھما( ڈن ءَ شُتگ انت ءُ آیاں جیڑ اِتگ بوتگ کہ مُلک ءَ ما جَنَگ بئیں، ڈن ءَ شرتر کار کُت کن ایں، آیانی دہ دوازہ سال ءِ کاراں یک لس دریاوردے ءِ چُکے گوں ووٹ ءِ گِرگ ءَ چی تاوان دات کنت، آپ ءُ لئین، روزگار ءُ وانگ ءِ آسرتیانی رسگ ءَ پد ھم آجوئی ءِ زرمبش چون دیم ءَ برگی اِنت) کہ اد ءَ نہ آں، آ وتی دہ سالیگیں سْیاسی عمل، ایران ءُ اے خطہ ءِ بدل بوتگیں جاور ءُ ڈنی مُلکانی نیّت ءُ ارادہ آں سرپد بہ بنت یا بہ جیڑ انت کہ یک گْوادری مُلاہ یے گوں اے وڑیں کسانیں زرمبشتے ءَ اے کدّ ءَ آجوئی تحریک ءِ دیم ءَ اڑاند بیت کنت گڑا سردار، مُلا، مُلاھی، ٹیکھدار ءُ ھما کہ واتر بوھگ ءَ دلمانگ انت، آ چے کدّ ءَ تاوان دات کن انت ءُ گر ءُ دار ءَ پہ چے کنگ بہ بیت۔۔۔۔
بلے ھئیر گپ گْوادری مُلا ءِ بئیگ ءَ انت گڑا اے گْوادری مُلا ءِ زرمبشت ءَ دنیگت ءَ دو بر ءَ گْوادریاں تاوان داتگ۔ یک برے رمضان ءِ ماہ ءَ گْوادری مُلا ءَ گران نھادی ءِ بگیری ءَ الیس ءِ بھا کنگ بناہ کُتگ ات(اے تحریک کہ بُنکی ھکانی لوٹ کنگ ءَ اَت، مردماں سْیاسی پگر دئیگ ءَ اَت، اتک الیس ءُ دوگ ءِ بھا کنگ ءَ سر بوت) کہ گران نھادی ءَ ھلاس کن آں، ءُ زی گْوادری مُلا گوں سِلہ ءُ توپکاں سر گپتگ ٹرالرانی گلینگ ءَ۔۔۔۔ دریاورداں کدی ھم گوں سِلہ آں بازیں ھُب نہ بوتگ، دریاوردیں ءُ لس تْیاب دپی بلوچ ءِ کِر ءَ سِلہ ءِ کلچر یا وَ کوہ ءَ پہ وتی آجوئی ءَ زائر کنت کہ آ زمہ واری سکّیں مزنیں زمہ واری یے، آ سِلہ پہ اسٹیٹس، ویڈیو ءُ شوک ءِ بُنیاد ءَ زورگ نہ بیت بلکیں آئی ءِ پُشت ءَ یک نظریہ یے بیت، آ توپک ءِ نمائش کنگ نہ بیت۔ دومی سِلہ ءِ کلچر دینی بیمکار ءُ ریاست ءِ داتگیں سِلہ آں کہ مرچی مئے دگ ءُ شھراں ھرکس ءَ گون انت۔
شھرانی تہ ءَ ، دمک ءُ دگّانی تہ ءَ سِلہ ءُ توپک یک ھترناکیں بانداتے ءِ شُبین اِنت، گْوادری مُلا چہ گْوادر ءَ گِسر بوتگ۔ اے عمل ءُ اے اکس یک بیم ناکیں کلچرے ءِ بانداتے ءِ نیم ءَ روگ ءِ بدیں ھالے۔ تْیاب دپ ءِ زیبائی ھمیش انت کہ اد ءَ توپکانی بدل ءَ ازم ءُ سْیاسی کلچر ءَ وت ءَ جاہ داتگ بلے اے اکس گْوادری مُلا ءِ اکس بیت نہ کن انت بلکیں اے بُرزی بلوچستان ءِ یک سرکاری سردار، اوگانستان ءِ جنگ ءَ یک باڑھی مُلا، یا سرکار ءِ داشتگیں لینڈ مافیا یا ڈرگ مافیا یے ءِ یا جماعت اسلامی ءِ یک مُلا یے اکسے بوت کنت کہ نعرہ تکبیر گُشان ءَ "غزوہِ ھند" ءَ پہ سر گِپتگ بلے گْوادری کلچر بوت نہ کنت۔ ھمے کلچر ءَ مرچی پَنجْگُور گُش ئے زاناں اوگانستان ءِ قندھار جوڑ کُتگ۔ ھمے کلچر ءُ توپک ءِ ھُب ءَ مرچی بلوچ بْرات کُش کُتگ، ھمے کلچر اِنت کہ شپانی نیم ءَ لوگانی تہ ءَ دَور کن انت ءُ ملکناز شھید کنگ بنت۔ ھمے توپک ءِ کلچر اِنت دین ءُ فتویٰ ھرکسی دست ءَ اَنت ءُ بھر کنگ ءَ اِنت۔
ءُ چوناہ ءَ سْیاسی کلچر ءِ کار سْیاست کنگ انت ءُ سرکار ءَ آیگ اِنت، اگاں یک مردمے وسر ءَ اے امیت داریت کہ پارلیمانی سْیاست کنوک ووٹ ءَ بھر مہ زور ایت ءُ کوہ ءَ برو گڑا آ سردار عطاء اللہ مینگل ءُ بابا مری ءَ چی ھم اے ھساب ءَ نا امیت اِنت بلے زائر نہ کنت۔ سْیاسی کلچر ءِ تہ ءَ زھرشانی ھست، پد کنزگ ءُ دیم ءَ روگ ھست، جُستانی ارزشت ھست بلے توپک نیست۔ اے ھساب ءَ گْوادر ءَ شپ ءَ دکاناں دُزی بیت گڑا "ھک بہ دئے زرمبشت" ءِ مردم شپ ءَ پانپاھی کن انت، وتی پولیس اسٹیشن جوڑ کن انت ءُ پد ءَ اے عدالتی نظام ءِ سر ءَ ھم باور کنگ نہ بیت گڑا وتی عدالت جوڑ کنگ بنت؟
بارڈر ءِ روزگار ءَ گوں بندوکیں مردمانی گِلہ ھمیش انت کہ اود ءَ ھم چہ آیاں بھتہ گِرگ بیت گڑا اے اسلحہ بردار پد ءَ دیم پہ بارڈر ءَ رو اَنت؟
تْیاب دپی چماں ازم دیستگ، گُژن دیستگ، روانک دیستگ، اوگام اِشکُتگ، چولانی توار اِشکُتگ، اشاں سی پیک دگ ءِ جوڑ بئیگ ءِ وھد ءَ گرانیں مشین ءُ دَمَکَانی توار اِشکُتگ اشانی سراں درد کُتگ، اے توپکانی تواراں اِشکُنگ نہ لوٹاں۔ اے توپک کلچر تْیاب دپی بلوچ ءِ گوْر ءَ گیش اِتگ کہ یا وَ کوھاں پہ یک مقصدے ءَ گون بنت یا وَ درآمدانی داتگیں کہ شھرانی تہ ءَ بے جُست ءُ پُرس گرد انت۔ گْوادری ءُ لس دریاوردیں بلوچ اے کلچر ءَ چہ بے کساس نفرت کن انت ءُ اے کلچر یک شوم ءُ بدبھتیں بانداتے ءِ شُبینگ انت۔
No comments:
Post a Comment