منیر مومن ءِ تامُر "دمک" ءِ سر ءَ چندیں گپ

منیر مومن ءِ تامر "دمک" ءِ سر ءٙ چندیں گپ

چمشانک: ماران بلوچ

دمک من پیسر ءٙ تربتءٙ چار اِتگ اٙت، ھما وھد ءٙ دمکءِ اسکریننگ بوتگ اٙت۔۔۔بلے چُش کہ مئے کِرّا چُشیں اُوزار ءُ ترتیب نیست کہ شریں رنگءٙ مردم تامُرءٙ دِلگوشءٙ گوں چارِت بہ کنت، پمیشکہ شر چارگ نہ بوت۔۔۔من مروچی یک برے پدا چارِت، ھورتیءٙ گوں چارِت۔۔۔برھال دمک یک شوکیں تامرے۔۔۔چاگرد ءِ جُتائیں کارست، جُتائیں پکر ءُ ھیال، لس مھلوک ءِ زندگی، لشکر (اِستان) ءِ زوراکی، مردمانی تھا لالچ، ھُدا ءٙ گوں گِلّہ ءُ دگہ بازیں جیڑھ ءُ کارست شوکیں رنگءٙ درانگاز کنگ بوتگ انت۔۔۔بازیں سنگت گْوشگءٙ انت کہ ما تامُر ءُ آئیءِ ڈائیلاگ آں پھمت کنگءٙ نہ ایں۔۔۔پمشکہ گوْشنت کہ تامر شوک نہ انت۔۔۔

چونایا اے الم نہ انت کہ یکے تامر ءٙ پھمت مہ کنت بِزاں کہ تامر شوک نہ انت۔۔۔مئے دیما باز چُشیں کتاب، تامر، آزمانک ءُ کارست گوستگ کہ آیانی پھمگ مئے وسءٙ چہ دٙر بوتگ۔۔۔

بلے من اے گپّءٙ اوں نہ گْوشاں کہ تامرءِ تھا نزوری نیست، اگاں نزوریانی سرءٙ گپ بہ بیت گڑا مناں انچوش سما بوت کہ تامرءِ تھا سینماٹوگرافی سک باز نزور انت۔۔۔باز انچیں اِکسپریشن ھست انت کہ سینماٹوگرافی آیاں گوں میچ کنگءٙ نہ انت۔۔۔ھمے جاھ ءٙ کہ مِیّا، شھباز ءٙ را ھال دنت کہ لشکرءٙ کہ اے میتگءِ سر ءٙ اُرش کُتگ گڑا تو چون رکّکِتگ ئے؟ اے سین تھا سسپنس سک کم انت، گونڈو ءِ اکسپریشن ھم سک نزوریں ءُ سینماٹوگرافی ھم سینءِ وڑ ءُ ڈول ءٙ نہ انت۔۔۔دگہ ھم بازیں ڈائیلاگ ھست انت کہ سک چیر اٙندر انت۔۔۔تامر ءِ تھا باز چُشیں جاھ ھست کہ مردمءٙ ھیران کن انت۔۔۔بلے اگاں تامرءِ سر ءٙ سرجمءٙ گپ بہ بیت تہ کم وسائل ءٙ یک شریں تامرے مئے دیما زائر بیت۔۔۔

اے ڈائیلاگءٙ کمو بہ چار ات۔۔۔ شھباز (سرفراز) گوْشیت "راستی ایش انت کہ زندگی مھے لگوریانی سگّگءٙ دٙمبرتگ۔۔۔

دوزہ(ادءٙ دوزہ دُگنیا گُشگ بوھگءٙ انت) ءِ جامنندانی حاترا بھشتءِ اکس چارگ اوں گْران انت"

چُشیں یار بے درور ایں ڈائیلاگ۔۔۔سرجمءٙ گوں مھے زند ءٙ ھمگرنچ انت۔۔۔چُشیں شوکیں ڈائیلاگ تامرے تھا سک باز ھست کہ یک یک ءٙ درور دیگ نہ بنت۔۔۔

امریکا ءِ نامداریں تامر اِنسپشن من دو سے رندءٙ چارگءِ جھد کُتگ بلے من پھمت کُت نہ کُتگ۔۔۔دگنیا مزنیں نگدکارانی رِد ءٙ انسیپشن دگنیا ءِ شرتریں تامُراں چہ یکے۔۔۔نو من باندا بیا آں ءُ ھمے گپّءٙ بہ کناں کہ انسیپشن یک نزوریں تامرے۔۔۔گڑا اے گپ راست بوت وٙ نہ کنت۔۔۔

باھد وٙ ھمیش انت کہ تامر ءِ سر ءٙ گپ جٙنگءٙ ساری مردم بہ زانت، تامر چی یے؟  چون جوڑ بیت؟ چی ئے واستہ جوڑ بیت؟ کئی واستہ جوڑ بیت؟ ءُ آ چون شوک بوت کنت؟ تامرے کہ جوڑ بیت، آئیءِ تھا جُتائیں ازمکار وتی ازمءٙ پیش دار انت، چُش کہ یکے کسہ ءِ نبشتکار انت، یکے اِزمکار انت، یکے سوجکار انت، یکے ایڑیٹر انت، یکے سینماٹوگراپر انت ءُ یکے کیمرہ مین انت۔۔۔درسانی کمبنیشنءٙ چہ تامُر جوڑ کنگ بیت تہ یک شوکیں تامرے دیما اتک کنت۔۔۔گپ کہ بیت گڑا درسانی ازمءِ سرءٙ بہ بیت۔۔۔نو اگاں ما درسیں چیزاں پراموش بہ ئیں ءُ تھنا کُوکار بہ کٙنیں کہ یار اے منیر ءٙ چونیں بکواسیں تامرے اڑ داتگ گڑا منیر ءِ ھلاپءٙ مھے نا دوستی ساپ ساپ گِندگ بیت۔۔۔یا وٙ بوت کنت مردم شعور ءٙ نہ انت ءُ اے رنگیں گپ جٙنٙگ ءٙ انت۔۔۔

چونایا منی دوستیں تامر ساچ ایران ءِ فلم ڈائریکٹر عباس کیارستمی انت۔۔۔یک مردمے عباس ءِ تامرانی چارگءِ جھد بہ کنت، بندات ءٙ سکءٙ گْران گِندگءٙ کائنت۔۔۔من عباس ءِ چارگ کہ بِنا کُت گڑا یک برے منی سمجءٙ نہ یتک، بلے وھدے کہ من ھورتیءٙ  گوں آئیءِ تامر چار اِتاں، تہ کم‌ کم ءَ من پھمت کہ یار عباسءٙ چون اے رنگءٙ جیڑ اِتگ؟ بنی آدم اے رنگءٙ ھم جیڑ اِت کنت؟ اے رنگیں تامر ھم جوڑ بوت کنت؟

عباس ءٙ وتی تامر انچوش جوڑ کُتگ انت، آئیءِ تامرانی ھچ وڑیں آسر نیست۔۔۔کس نہ زانت تامر کجا بندات بوت، کسہ کجا بندات بوت، ھلاس کجا بوت۔۔۔بلے چارگءِ وھدءٙ مردم یک شلا جیڑیت۔۔۔جیڑگ ھلاس نہ بیت۔۔۔عباسءٙ کسے پھمگ لوٹیت تہ آئیءِ چاروک وت کارستاں مھنا بہ کن انت۔۔۔عباسءٙ کارست انچوش آزات کتگ انت کہ چاروک وتی جندءِ چاگردءٙ نزّ بیاریت ءُ وت مھنا اِش بہ دنت۔۔۔من اِدءٙ عباسءٙ گوں منیر ءٙ کمپیر کنگءٙ نہ انت، عباس تھنا یک درورے۔۔۔بلے منی نزّ ءٙ منیر ءِ جوڈ کُتگیں کارستاں ھم چاروک وت مھنا بہ کن انت۔۔۔منیرءٙ کارست بندیگ نہ کُتگ انت، آئیءٙ ھم کارست آزات کُتگ انت پہ چاروکاں۔۔۔منیر ءِ زبان ھمیش انت۔۔۔منیر ءِ زبان منیر یکتائیءِ پجار انت۔۔۔اگاں کسے منیر ءِ زبانءٙ پھمت نہ کنت، گڑا منیرءٙ ھچ جاھ اے گپ نہ جتگ کہ الم منءٙ بہ چارِت ءُ منی سر ءٙ گپ بہ کن اِت۔۔۔

من سما کُتگ دمک یک کسہ ئے نہ انت، بلکیں سک باز کسہ انت کہ آ یک تامرے ءِ تھا بند کُتگ انت۔۔۔ھر یک کارست جُتائیں زندگی ئے پیشداریت، جُتائیں کسہ ئے پیشداریت۔۔۔

تامرءِ سرءٙ گپ کہ بیت گڑا باھدیں ازمءِ سرءٙ گپ بہ بیت ءُ تنقیدی رھبند تھا بہ بیت۔۔ھرکس مئیت ءُ مہ گْوشیت کہ من چیزے نہ پھمتگ گڑا تامر ھراب انت۔۔۔ءُ پدءٙ ھرکس ھرچیز ءٙ پھمت کُت ھم نہ کنت۔۔۔ھرچیز ھرکسی واستہ جوڈ ھم نہ بوتگ۔۔۔ھرچیز ھرکسی وسءٙ چہ در انت۔۔۔ھرکس کہ ھرچیز ءٙ بہ زانت تہ مارا دگر ءِ ھچ بٙر حاجت نہ بوتگ ات ءُ ما تھنا زندگی کُتگ ات۔۔۔برھال منیر ءٙ کس پابند نہ کُتگ، کسےءٙ تامر دوست نہ بیت اے جیڑھ ئے نہ انت۔۔۔بالی ووڈ بہ بیت یا ھالی ووڈ، ھودا ھم چُشیں تامر ھست انت کہ ھرکسے پھمت کُت نہ کنت۔۔۔دگہ ھم سک باز درور دست کپیت۔۔۔بلے منیر انچو گْران نہ انت، بس یک شلا جیڑگی انت۔۔۔پھمگی انت۔۔۔

(منی ھیال ھمیش اِتاں، شُما وتیگاں وت زانت کن اِت)