بلوچ نودربر ءُ سْیاست

بلوچ نودربر ءُ سیاست۔۔۔

نبشتہ کار: ثناء نقیر

وانگ ءُ زانگ ہر قوم ءِ بنکی مڈی انت ءُ وانگ ءِ  واستہ مردم کجا کجا سپر نہ کن انت پہ وتی راھانی شوھاز ءَ۔

نی بیا چاریں بلوچ نودربر کجا سر انت؟ ھمئے شھدربرجاھاں چے وڈ بئیگ انت ءُ وت ءَ کجا مانگشینتگ اِت؟

 بلوچستان ءِ شھدربرجاہ بہ بنت یا اسلام آباد ءُ سندھ بزاں کنڈ کنڈ ءَ بلوچ دراتکگاں پہ وانگ ءَ ۔ بلوچ ءَ گوں سیاست ءَ بلائیں دستے مان انت ءُ موبلائیز بیتگ انت۔

 

چشکہ سیاست کجام وڑا ءُ چون بئیگ انت؟

اشاں بلوچ قوم ءِ واقعی درد است؟

چشکہ من وت یک نودربرے آں ، من بلوچ ءُ بلوچ نودربرانی سیاست ھروھد ءَ نزوری ءَ دیستگ۔۔۔ 

ھمے کہ  قوم پرستی ءُ بلوچ دوستی یے داواہ ءَ کن انت ھمے شھدربرجایاں جدا جدا ترا گندگ ءَ کاینت

یکے گشیت کہ من فلاں پارٹی ءَ گوں ہمنگرنچاں ءُ یکے گشیت من فلاں پارٹی ءَ۔۔۔

اے و تچک انت کہ بلوچ نودربرانی میان ءَ تپاکی ہمے پارٹی ءُ لابیاں پروشتگ ءُ دکانانی تہا بہر ءُ بانگ کنگ بیتگ، نودربر سیاسی گلانی نام ءَ یکے دومی ءِ دشمن جوڑ بیتگ انت۔

من یا منی وڑیں دگہ نودربرے یونیورسٹی ءِ گیٹ ءَ پتریت گڑا درساں پیسر آئی ءَ پارٹی ءِ کاگد دیم ءَ دیگ بیت ءُ وتی نیمگ ءَ آیگ ءِ سلاہ جنگ بیت، آ زان انت کہ رند ءَ نودربر مئے کاراں سرپد بنت ءُ مارا سر نہ دینت۔۔۔۔

یک گلے ہم اے  جست ءَ نہ کنت کہ تئی کلاس کجام انت ءُ  ترا چون وتی واھشتانی پشت ءَ وانگ ءَ گوں ہمگرنچ بوھگی انت نئیکہ کیریئر کونسیلنگ کن انت۔

اشانی گیشتریں وس گوں وتی پارٹی ءِ ممبرانی گیش کنگ انت کہ فلاں پارٹی ءَ چہ منی‌ مردم گیشتر انت ءُ چون ما آیاں چہ دیم ءَ انت بلّے کہ درستانی لوٹ ءُ کانود یک انت، اگاں شمئے کانود ءُ لوٹانی تہا دگری نیست گڑا اے لابی ءُ پارٹی پرچی پہ وت جدا انت، جدائی ہراب نہ انت بلے پد ءَ یکے دومی ءِ چماں پرچی چار ات نہ بئیت؟ ہرکس ءَ بگند کہ دومی پارٹی ءِ ہلاپ ءَ مزن مزنیں گشتانک دیگ ءَ انت ءُ سرپد کنگ ءَ انت کہ دومی پارٹی کجام ہساب ءَ چہ مارا ہراب تر انت ءُ پرچی مارا گوں آ نودربراں نند ءُ پاد آیگی نہ انت۔۔۔۔

نو شما وت فیصلہ کن ات کہ راج دوستی کجام انت ءُ سیاست ءِ چمکائینگ کجام انت؟ چشکہ کہ کامریڈی ئے  داواہ داروک باز انت بلے تہنا impressions آں 

شما اگاں یک بیتین اِت بگندے شمے تہا تپاکی بوتگ ات ءُ یکے دومی ءَ وشتر کار کتگ ات بلے بژن کہ شما یکے دومی ءَ سگ ات نہ بئیت۔

گپ ءُ جیڈہ باز انت نہ تپاکی ءُ زوریں امپریشن، مارا لاچار کن انت کہ چندیں گپاں پدر بہ کنیں۔ من تنیگہ ھمے وڈ دیستگ دیمتر ءَ شوک بات ات ءُ تہنا بلوچ بات ات۔

مراد ساحر ءَ راست گشتگ!

نہ علم ءِ شوک نہ قوم ءِ دوستی نہ سُد ءِ دنیا ءِ 

چشیں بے جوھر ءُ جان سُستیں نوجواناں سوچ

نبشتہ کار "ثناء نقیر" گْوادر بلوچستان ءِ جاھمنند اِنت ءُ کراچی شھدربرجاہ ءَ وانگ ءَ اِنت۔