مُلکی لبرل ءُ بلوچ راج دوستیں رھشون! کے چی گوشیت؟

مُلکی لبرل ءُ بلوچ راج دوستیں رھشون! کے چی گوشیت؟    

وھاب مجید 

"ما بلوچ ءِ جمہوری، سیاسی ءُ انسانی ھکّانی منوگر ایں۔ آھاں گوں ظُلم ءُ زیادتی بیتگ۔ بلے اے زیادتی ءَ آھانی سردار ہم گون اَنت۔ بلوچ ووٹ سردار ءُ نواباں دنت۔ پمشکا اسٹیٹ ءِ ہمراہی ءَ آ وتی ھکّانی جُستءَ وتی سردار ءُ صوباہی سرکار ءَ چہ ہم بکنت۔ ءُ دومی گپ اِش اِنت کہ گریبی، نیستی ءُ ہمشامی ایوک بلوچ ءِ بھت ءَ نہ اِنت۔ چاریں صوبہانی لس مھلوک اِشی ءِ آماچ اَنت پمشکا اے راجی ناں بلکینہ امیر ءُ گریب ءُ سرمایہ دار ءُ پوریاگر ءِ جھیڑہ زانگ بہ بیت اِنت". اے ھیال ءُ لیکہ اَنت یک نامی ایں مُلکی لبرل ءُ لیفٹ ءِ پگر داروکیں کواسے ءِ کہ آئی ءِ لیکچرے دوشی من یوٹیوب ءَ گوشدارگ ءَ اِت آں۔

 اے وڑیں ھیال ءُ لیکہ ایوک ہمے یکیںّ واجہ ءِ نینت بلکیں لِبرلیں دانشورانی یک مزنیں کچّے ہمے پِگر ءِ واہند اِنت۔ 

بلوچ ءِ بابت ءَ ملکی لبرل ءُ لیفٹ ءِ اے ہما پِگر اِنت کہ اِدا اوریامقبول جان ءُ نجم سیھٹی یکیّں یدّار ءَ سوار بنت۔ اے لیفٹءِ دانشورانی "انٹیلیکچول ڈِس اونسٹی" اِنت کہ راستی ءَ سرجم ءَ نہ گُوشنت۔  

دومی نیمگ ءَ اگاں تو بلوچ راج دوستیں سیاسی پِگر ءُ سیاست ءَ سیل بکن ئے تہ گِندئے کہ آ ہم چہ "ساحل ءُ وساہل"ءَ دیمتر نہ روت۔ سوشل ءُ لبرل ڈیموکریسی، سیکولرازم، یومن ازم ءُ فیمینزم ءِ گِران گِرانیں لپز بِگندئے ایشاں وتی پارٹی آہین ءِ تہءَ نویستگ اَنت بلے آھانی کِرد ءَ چہ تو ہچ وڑیں چیزے نہ گِندئے کہ آ اے اصطلاحاں گوں اِنساپ کنگ ءَ اَنت۔ 

لہتے راج دوستیں رھشون وا اے لپزانی مانا ءَ ہم سرپد نہ اِنت ءُ گوں پہر ءَ گوشیت "مئے جُہد ایوک بلوچ ءِ سیاسی ءُ راجی ھکّانی واستا اِنت۔ ساری ءَ مارا سیاسی ءُ ھاکمی ھکّ بہ رسنت۔ سیکولرازم، فیمینزم ءُ ایندگہ اِزماں ما رندا چاریں". 

انچش کہ لبرل دُراھیں جھیڑہانی گیش ءُ گیوار ءَ ایوک گوں سیکولرازم ءِ سوبمندی ءَ ہمگرنچ کن اَنت ہمے پیم راج دوستانی لیب ءِ گراونڈ ہم ایوک نیشنلزم اِنت۔ منی ھیال ءَ اے دوہیں پِگر ناسرجم اَنت۔ 

لِبرل ہرچی گوشنت آھانی مرزی اِنت بلے پہ وشھالیں بانداتے ءَ باہد اِنت کہ بلوچ وتی نیشنلزم ءِ پِگر ءَ پراہ ءُ شاھگان بکنت۔ آہی ءِ تہ ءَ الّم ریشنل ءُ سیکولریں پِگر ءَ جاہ بہ دنت ءُ بلوچ چاگرد ءِ ہمُک تک ءُ پہنات ھاسکر بلوچ جنیں آدمانی وانگ ءُ زانگ، آھانی مالی، چاگردی ھکّاں پہ جُہد ءُ آھاں سیاسی پِڑ ءَ مزنیں بھرے بہ دینت۔ 

منی ھیال ءَ لُکیّں پِگر ہم پہ بلوچ ءِ عاقبت ءَ جوان نہ اِنت۔ بلوچ ءَ چہ ریاست ءُ سرکار ءَ لوٹ کنگ ءِ ہمراہی ءَ وتی سیاسی پارٹی، چاگرد، ادارہ ءُ لوگانی تہءَ ہم وتی جنک ءُ بچکیں چُکانی وانگ ءُ زانگ، ورگ ءُ وردن، گُد ءُ پُچ ءُ ایندگہ زرورت ءُ زند ءِ پیسلہانی ھکّ دیگ ءَ پہ ہچ وڑیں تپاوت کنگ نہ لوٹ اِیت۔ 

ہمے پیم جمہوری، ریشنل ءُ سیکولریں پِگر ءِ دیمروہی ءَ پہ وتی جُہد کارانی زہن سازی کنگ ہم المّی اِنت۔ ترا تئی سیاسی ھّک بہ رسنت ہم ۔ بلے تنا وھدی کہ تو ڈوگما، سِتکّ ءُ ہنچاہیں نعرہ ءِ گزا ءَ چہ نہ چُٹّ ئے تئی منزل دور تر بیان بیت اِنت۔

 

چُش مہ بیت کہ مُلکی لِبرل ءِ انٹیلیکچول ڈس اونسٹی ءِ وڑا راج دوستیں رھشون ہم پہ وتی زاتی نپ ءُ دو سیٹ ءِ ھاترا بلوچ ءَ پاپولسٹ اِیں نعرہ بہ دنت ءُ بیست ءُ یکمّی کرن ءِ منتگّیں انسانی ءُ بلوچ زالبولانی ھکّاں ڈالچار بکنت ءُ ریشنل ءُ رُژنا پِگری ءِ دیمروہی ءَ پہ ہچ مہ کنت؟ اگاں چُش بوت گُڑا اے پہ بلوچ چاگرد ءُ عاقبت ءَ مزنیں تاوانے بیت۔