کندیل ءَ رژن بالینتگ وتی

نبشتہ کار: ایسپ بلوچ

ما چیزے وھد ءَ پیش ھردیں سبا ءِ باروا کسے گپ کنگ ءَ دیستگ تہ مئے گُوشاں اِش کتگ کہ سبا جذباتی بوتگ، سبا ءَ اے جاورانی اندر ءَ اے کار ءُ گپ کنگی نہ بوتگ انت، سبا اِشتاپی بوتگ پلاں۔۔۔۔۔ بلے ھردیں مرچی سبا ءَ کسے وانیت یا سبا ءِ سرا ھبر کنت تہ گشیت "استاد سبا"۔ چیا بزاں؟ زیکّ ایں جزباتی ایں سبا مرچی چتور استاد بوت؟

اسل ءَ گپ ایش انت کہ سبا ءِ وانوک، سبا ءِ گوشداروک اشتاپی بوتگ انت، جزباتی بوتگ انت، ھر ھما کارست ءَ کہ سبا ایرجتگ درستاں سر سُرینتگ ءُ ھئو ھئو کتگ، ایندگہ روچ ءَ پدا ھمیشاں دگہ چار مردماں ھمے گپ گوشتگ انت، اے روانی ھمے پئیم روان بوتگ۔

بلے ھردیں کہ مرچی بلوچ سبا ءَ دگرانی دپ ءَ گوشدارگ ءِ بدل ءَ وت ونتگ وت گوش داشتگ تہ ایشاں سبا ءِ کارست یک استادے ءِ  کارست ءَ چہ کمتر نہ دیستگ۔

سبا گشیت بلوچ ءِ تھا وانگ ءِ شوک وَ ھست بلے بلوچ دِل جنت، من سید زھور شاہ ھاشمی ریپرنس کتابجاہ ءِ واستہ پاکستان، خلیج، یورپ ءُ ایران ءَ چندہ کتگ، منا دو لکّ پنجاہ ھزار مُچّی رسیتگ۔ ممکن ایں منا گیشتر  پکار بوتگ یا من گیشتر کمک ءِ اُوست داشتگ۔ 

سبا ءَ وتی کتابجاہ، وتی اکیڈمی ءِ سرا واب دیستگ، گشتگ ئے یک روچے کئیت ایشی ءِ تبک برز بوان بنت، ایشی ءِ وانوک گیش بوان بنت ءُ ایشی ءِ تھا علمی ءُ تخلیقی سول ءُ تران گیش بیت۔ مرچی سبا ءِ کتابجاہ  باریں چی ھال انت بلے سبا ءِ ھلک لیاری ءُ ملیر آں کہ سبا ءَ یک پگرے ودی کتگ ات، سرکار ءَ اے پگر ءِ گار کنگ ءِ واستہ بلوچاں توپک دات، دُزّی پرمات، وت ماں وتی کُشت ءُ خون پرمات انت، ھمے لیاری دُزّ ءُ ڈنگانی یک ٹکانہ ءِ بوت۔ نوں ما گشت کن ایں کہ سبا ءِ کشندہ آں سبا چیا شھید کتگ۔

سبا، سید ءُ آزات جمالدینی ءِ مریدے بوتگ، ھردیں سبا راج ءُ زمین ءِ باروا جیڑگ بندات کتگ تہ سبا ءَ سید یات اتکگ، بچکند اتگ ئے ءُ گشتگ ئے

تو دل ءَ ساڈیں وشیّں روچ چمّاں اندر آں

زاں پہ زاں نندیں جگر بُریّں گماں تالان کن ایں

سیدؔ

سبا نوزدہ سد نود ءِ گُڈّی سالاں ءُ دو ھزار ءِ بنداتی سالاں بلوچ جھد ءُ بلوچ ءِ تھا اتکگیں آگاھی ءِ سرا پھر بستگ ءُ گشتگ ئے " اے نوکیں دور ءَ یک انچیں جاورے پیداک بوتگ، آ جاور ءَ ثابت کتگ کہ بلوچ زندگ بوھگ ءِ واستہ ھُدا ءَ پیداک کتگ"۔

سبا ءَ مدام گشتگ داں تو مہ وان ئے تو ھچ نہ زان ئے ءُ ھردیں تو نہ زان ئے تو ھچ کت نہ کن ئے۔

مدام گشتگ ئے کہ راج ءِ ادیب، زانتکار ءُ لس مھلوک آں وانگی انت۔ روشن پگر بوھگی انت۔

سبا گشیت" بلوچ ءِ  تھا آگاھی یے پیداک بوتگ کہ آئی ءِ ھچ مٹ نیست بلے بلوچ ءَ سکین لوٹ ایت آ زرمبش انت، زرمبش یک علمی ءُ اکیڈمک رویہ ءِ لوٹ ایت۔ ادیب ءُ لس مھلوک ءَ باسواد(وانندہ) بوھگی انت، روشن پگر بوھگی انت، سرپد بوھگی انت"۔

مئے بد بھتی ایں کہ مئے ادیب اوں بے سواد(بے وانندہ) آں، لس مھلوک ءِ ھمراھی ءَ ادیب آں اوں باسواد بوھگی انت۔

سبا ءَ ھرچی ونتگ پہ ستک ونتگ ئے ءُ ھرچی گشتگ پہ ستک گشتگ ئے چاھے آ بلوچ راجدپتر ءِ دروشم ءَ بہ بیت، فلسفہ، لبزانک ءُ نیکراھی ئے دروشم۔ ممکن ایں اے پنت سبا ءَ چہ وتی آئیڈیل واجہ سید ھاشمی ءَ دربرتگ انت پرچا کہ سبا جاھے گش ایت"سید ءَ ھرچ کارے کتگ آئی ءَ چہ پیسر ھما علم ءُ کار دربرتگ انت پدا عمل اِش کتگ چاھے تئی لبزانک ءِ کجام اوں تک ءُ پھنات بِہ باں"۔

من سبا ءَ اے واستہ نہ واناں کہ سبا مَیل (Trend) ئے بھر انت من ھمے واستہ سبا ءَ وان آں کہ سبا ءَ منا ءُ ترا یک مَیل (trend) ئے داتگ۔

سبا راجی جنز، راجی مڈّی ءُ گلزمین ءِ باروا سیدؔ ءِ یک شئیرے گشیت

مئے زری ڈنّ ءُ دمگ کوہ ءُ کپن میراس آں

نرمزانی پد ءَ شلّیں وکابانی پدا

سبا اوں یک جون 2011 ءَ ھمے شئیر ءِ رند پداں شُت ءُ آئی ءِ کپن پہ بلوچ ءَ میراسے بوت۔

چاردہ ءِ درپشوکیں ماہ ءَ سد سلام

دَشْتیاری ایں سبا ءَ سد سلام