چندریان 3

 نبشتہ کار: فیصل داؔد

مروچی ئیں روچ پہ انڈیا ءَ مزنیں روچے ءِ بستار ءَ داریت۔ 23 اگست ءَ آئی ءِ مشن ماہ ءِ سر ءَ پہ سوبینی ایر کپت۔ چندریان 3 ءِ ماں ماہ ءِ سر ءَ پہ سوب مندی ایر نندگ ھما واب انت کہ انڈیا آئی ءَ سی سال ءِ مُدّت ءَ ھم گیشتر انت کہ گندان ءُ پیداک اِنت۔ ھر سائنس ءِ نودربر ءُ ھر سائنس ءِ واستار آئی ءِ کامیابی ءَ ساڑائیت ءُ مبارکی دنت۔  

ھر راج، ھر مردم ھما وھداں دیمروی کنت ءُ سوبین بیت کہ آ وتی وابانی پشت ءَ سپر بہ کنت۔ آئی ءَ منزلے بہ بیت کہ من ءَ کج ءَ سر بوگی انت۔ آئی ءَ منزل ھما ساھتاں رسیت کہ وھدے آ وتی دیم ءَ اڑاند بیوکیں جنجال ءُ بے سوبیانی دیم ءَ چو کلات ءَ پہ مھکمی بہ اوشیت۔ چوشیں ھزاراں درور مئے دیم ءَ چو روچ ءَ پدّر انت۔

انڈیا ءَ 2008 ءَ اولی رند ءَ وتی مشن ”چندریان 1“ دیم پہ ماہ ءَ دیم دات۔ سوبین نہ بوت بلے گوشت اش کہ جیڑہ نہ اِنت۔ چکّاس کاری ءِ مات نہ مُرتگ۔ یازدہ سال ءِ سرجم بوگ ءَ پد 2019 ءَ وتی دومی مشن ئِے دیم پہ ماہ ءَ دیم دات۔ اے ھم سوبین نہ بوت۔ چنچو مردم انڈیا ءِ سائنس زانتکار ءُ سرمستراں کلاگ بندگ ءَ ات انت۔ پُرّیں چار سال ءِ پر گوزگ ءَ پد انڈیا چہ وتی واب ءَ شموشکار نہ بوت۔ 14 جولائی  2023 ءَ وتی سیمی مشن ئِے دیم دات۔ ایشی ءِ نام ”چندریان 3“ ات۔ چل روچ ءِ سپر ءَ پد آ ماہ ءِ نزّیک ءَ رسگی ات۔ دنیا ءِ مردمانی چم ھمائی ءَ سکّ ات انت۔ لھتیں مردم گوشگ ءَ ات کہ اے ھم پرشیت، تباہ بیت بلے سوبین نہ بیت۔ انڈیا ءِ زانتکار بچکندگ ءَ ات انت کہ گوش ئے آیاں وتی سوبینی ءِ ھال پیسر ءَ سر بوتگ ات۔ 05:33 ءَ چاپانی توارے چست بوت۔ ”چندریان 3“ سوب مند بوتگ ات۔ ھما کہ انڈیا ءَ کلاگ بندگ ءَ ات انت، گار بوت انت۔ گوش ئے آیاں ھم انڈیا ءَ ”مبارک باتی“ دیگ ءِ شور کتگ ات۔

انڈیا مروچی دنیا ءِ اولی ڈیھ انت کہ آئی ءَ ماہ ءِ کتبی دمگاں وتی مشنے پہ سوبینی سرجم کتگ۔ آ چارُمی ڈیھ انت کہ ماہ ءِ سر ءَ رپتگ۔ مروچی سرجمیں دنیا نشتگ ءُ انڈیا ءَ مبارکی دیگ ءَ انت کہ آ چہ مبارکی ءَ گیشتر کرزیت۔ 

پاکستان ءَ سپارکو نامیں پراھگی ادارگے ھست ات۔ 19 سدی ءِ گُڈسری سے چار دھکّاں ایشی ءِ نام اسپیس لسٹ ءَ ھوار ات۔ مروچی ھلال کمیٹی ءِ دست ءَ انت کہ ھچ درد ءِ درمان نہ انت۔ اسل ھبر ایش انت کہ پاکستان ءِ مردماں چو انڈیا ءِ پیم ءَ وتی منزل ءِ واب نہ دیستگ۔ ایشی ءَ منزل نیست ءُ اگاں منزل ئِے ھست، آ سائنسی یے نہ انت۔ ھما مردم کہ پاکستان ءَ ماں سائنس ءِ پڑ ءَ دیمروی دیگ بہ لوٹ انت، آیانی وس نہ روت۔ اگاں کسے ءِ وس ءَ بہ بیت، بزانکہ آئی ءَ وت ءَ وت بُرت ءُ کورچات ءَ دور دات۔ ھمے بزانکہ ڈیھ کور ءِ مھار ءَ انت۔

👈 اے نبشتانک چہ سائنس ءُ شھزانتی ءِ گروپ ءَ زورگ بوتگ، بلوچی ءِ تہ ءَ سائنسی نبشتانکانی وانگ ءِ ھاتر ءَ گروپ ءِ لنک 📎👇

https://www.facebook.com/groups/1923869131308184/?ref=share&mibextid=NSMWBT

____

 داتگیں اکس ناسا ءَ نوکی گپتگ۔ چندریان 3 ءِ نوکیں اکس انت۔