نبشتہ کار: ایسپ بلوچ
ساجد ھسین شھید کنگ بوتگ ات تہ بانک کریمہ ءَ نبشتہ کتگ ات ما مردگ پرست نہ ایں بلے موقع پرست ایں۔
مرچی ھانی گل ءِ کنٹ روبرکتی بلوچستان ءَ کپتگ،مارا ھمینچو ھال ریستگ کہ ھانی گل جنگ بوتگ،انچش کہ چیزے روچ پیش گپ اتکگ ات ھانی گل وتی لوگواجہ ءِ ھمراھی ءَ برگ بوتگ۔
ما ھانی گل رئوف ءِ نام ءَ پجّار کت کہ رئوف ءِ نشار انت ءُ رئوف ءِ کوش ءَ پد برگ بوتگ۔ مرچی اوں ما آئی ءَ رئوف ءِ نام ءَ پجّار کنگ ءَ انت۔
چار بلوچ ءَ رسانکدراں بژن درشان کتگ۔ بلوچ چکچینی اِیر جتگ بلے ھمے میان ءَ ھانی گل ءِ وتی پجّار بیگواہ انت۔
من داں پٹ ءُ پول کت تہ دیست ھانی 2021 ءَ وتی دِشتار ءِ ھمراھی ءَ زورانسری بیگواہ کنگ بوتگ،سئے ماہ ءِ زندان ءَ پد یل کنگ بوتگ ءُ پدا ھانی گل ءَ وتی دِشتار ”نسیم“ءِ واستہ گھگیری بندات کتگ ءُ سرپیس سیاست ءِ بھر بوتگ۔
مرچی ھانی ءِ پجّار گار بوت۔ ھانی اگاں زندگ بہ بیت تہ رئوف ءِ نشار ءَ زندگ بیت،جھدکارے یا بیگواھ بوتگیں بلوچ زالے ءِ نام ءَ زندگ نہ بیت۔
سما بوھگ ءَ انت،اگاں رئوف شھید کنگ مہ بوتیں ءُ بلے انگت ھانی برگ بوتیں،کُشگ بوتیں تہ ما کجام نام ءَ ھانی ءَ پجّار کت؟
ما پجّارے دات اوں کتگ ات یا بے ھال کتگ ات،چوں ھم بوت کنت ما ھانی ءَ رئوف ءِ وجہ ءَ پجّار دئیگ ءَ انت، وتی کنگ ءَ انت؟
زیّکیں روچ ءَ بلوچ ءِ دردوارے پولیس ءَ دزگیر کتگ ات، پوراھیں میڈیا مئے ٹھیکہ ءَ اتکگ ات,بلوچ کوکار ءَ ات ایمان مزاری یل کنگ بہ بیت، ایمان مرچی ضمانت ءِ سرا یلا انت، سلامت انت بلے ھانی گل کُشگ بوتگ، مردگیں بلوچے۔ مئے کوکار گار انت۔
ھانی یکیں روچ ءَ چیا دنزانی مجاّ بار دات؟ اگاں گپ جھدیگ انت تہ منی ھیالاں ایمان ءَ پیش ھانی بلوچ ءَ زانت، بلوچ ءِ جھد ءِ ھمراہ انت، زمین ءِ سرا متاثریں بلوچے۔
ممکن ایں ایمان یک ایلیٹ ءُ اسلام آباد ءِ جاھمنند انت ءُ ما نام پرست انت۔
ھانی ءَ پارلیمانی راجکار مہ زان انت دردے پہ دو بلے ھانی ءَ آ دگہ بلوچ راجکار اوں وتی کنگ ءَ ساڈی نہ انت، ھانی سرپیس جھدکاراں اوں بے ھال کتگ۔
مرچی ءَ پد اگاں ھانی ءَ چہ متاثر بوتگیں بلوچ زالے شھدگ ءِ سرا چیہانٹ کنت تہ المّ سما بہ کنت کہ منی مرگ ءَ پد منی چیہانٹ اوں مِرنت۔ اگاں کسے پجّار کنت تہ آ مناں۔ اگاں جنگ بوتاں تہ وتی کوش ءِ بگیری ءَ ہیش ٹیگ، روانک ءُ زھرشانی ءِ اوست ءَ نبا بہ کنت کہ بہ نند ایت۔
ھانی ءِ کوش ءَ پد من سما کنگ ءَ آں ما موقع پرست ءُ مردگ پرست ھردو نہ ایں بلے ما رنگ، ذات ءُ نام پرست ایں۔
No comments:
Post a Comment