نبشتہ کار: ایسپ بلوچ
تو اگاں وتی پس ءَ بھا کن ئے گڑا اے ھما زوروک ءِ مرزی انت کہ تومی یے کنت ئے، کُشیت ئے یا گیشتریں نھادے ءَ بھا ءِ کنت۔ اگاں تئی پس تئی رزا ءَ ابید زورانسری برگ بوتگ تہ تو آئی ءِ پچگرگ ءِ واستہ بروک ءِ ھمراہ بوت نہ کن ئے۔ المّیں آئی ءِ ھمراھی ءَ وَ پس تئی نہ بیت۔
ارزان تریں درور ایش انت تئی ڈگار اگاں برگ بوتگ تہ آ کشاراں کڑب ءِ نام ءَ رون کنت، ماش یا فرماش ئے۔ اے آئی ءِ جیڑہ انت تئی کار انت وتی ڈگار ءَ پچبگر ئے۔ ڈگار تئی بیت کشار تئی بنت ءُ کشارانی ناماں تئو گچین کن ئے۔
من نہ زاناں مئے نابودی ایں یا بودناکی کہ ما اے درستیں کاراں بروک ءِ ھمراہ انت ھم ءُ لوٹیں مرزی مئے بہ بیت۔
لاھور ءَ گوادر ءِ نام ءَ شھدربرجاہ یے اڈ کنگ بوھگ ءَ انت، ما ایشی ءِ سرا پمشکہ زھرشانی کنگ ءَ انت کہ مئے ڈگار ءِ نام چیا کارمرز بوھگ ءَ انت۔ ما کدی اے نہ گشیں کہ مئے دریا برگ بوتگ۔ ما لوٹ ایں استان مئے دریا ءِ سرا کار بہ کنت بس شھدربرجاہ ءِ نام ءَ مزور ایت۔ اگاں دگہ جاھاں مئے زمین ءِ زرّاں چہ اورنج لائن ءُ میٹرو بس کار ایت ھچ جیڑہ یے نہ انت بس نام مئے مہ بیت۔
ما پدا ھما پارلیمنٹ ءَ نند ایں ءُ زھرشانی کن ایں کہ آئی ءِ تھا مئے چمّانی دیما ھمے بل پاس کنگ بوتگ۔
(اشیی ءَ بہ وان اِت کہ بلوچستان ءِ روبرکتی بھر ءِ نام چُنڈ چُنڈ کنگ ءُ گجرانی پندل)
اگاں جاگہ ءِ نام ءِ مٹ کنگ ءَ زمین برگ بوتیں تہ شال باریں کد کئی بوتگ ات، برٹش بلوچستان ءِ دگہ ھند باریں مرچی کئی وابجاہ ءُ لئیب جاہ بوتگ اتنت۔
مئے بودناکی ءَ سلام انت کہ ما اوں وتی زمین ءَ ھما نام ءَ توار پِر جنیں کہ آ نام زورگر ءَ زمانگے ءَ داتگ۔ شالکوٹ ءَ کوئٹہ ما درست گش ایں تہ نام ءِ سرا گوں زورگر ءَ ھمکوپگی زورگر ءِ باج نہ انت؟
ما یکبرے وتی زمین ءَ، زمین ءِ ھکّی ایں نام ءَ توار پِر بجن انت وتی بہ کن ایں۔
باز جاگہ ءَ باز براں نام مٹ کنگ ءِ زلورت نہ کپ ایت تہ ما اوں بے سما بنت۔ ایشی ءَ چہ مستریں پندل چی انت۔ گْوادر ءِ ھما شھدگ ءُ ماڈی جوڈ کنگ بوتگ ءُ وتی نام دئیگ بوتگ انت کہ آ زورگر ءِ نپّاں ھوار انت۔ شما کدی اِش کتگ کہ ملا پازل چوک ءِ نام ءَ کسے لاھور چارراہ بہ کنت یا ملا پازل ءِ نام لاھور ءَ چارراہ یے ءِ نام بہ بیت۔ نام ءِ زورگ بلاھیں گپّے یکبرے یک بلوچ راجکارے پازل چوک ءِ گٹراں ساپ بہ کنت۔
زلورت نہ انت، ملاّ پازل چارراہ ءُ دگ گوادر ءِ دریاورد ءُ پوریاگر ءِ کِشک انت ءُ سی پیک ءَ گوں تئی دریا ورد ءَ ھچ واستہ نیست۔
گْوادر بلوچ نودربر ءُ لس مھلوک ءِ واستہ ترس ناکیں ھندے کنگ بوتگ۔ ورنا زورانسری بیگواہ بوھگ ءَ انت، دریاورد ءِ نان ٹرالر آں دئیگ بوتگ، لس مھلوک ءِ زمین برگ بوتگ، چاریں آتراپاں تُرس ئے ءَ انگیر کتگ بلے مئے جیڑہ ءُ ھیال پہ یک نامے ءَ بندات ءُ ھلاس بیت۔
تئی راجی پجّار اگاں زندگ بوت تہ تئی تخلیق اوں پشت کپ ایت ءُ پہ نامے ءَ تئو نہ کپ ئے بلے چارگ کرزیت کہ تئی نام اگاں جاگہ یے ءَ کارمرز بوھگ ءَ انت ترا سما بہ بیت چیا بوھگ ءَ انت۔ ترا مارگی انت کہ تھنا تئی نام پشت کپتگ یا تئی زمینی نپ اوں ھست انت۔
تئی نام ءِ برگ جیڑہ یے نہ انت تئی زمین ءِ برگ مستریں جیڑہ ایں کہ آئی لاپ ءَ چہ بازیں جیڑہ ءِ در اتکگ ءُ درکئیت۔ تئی زمین ٹٹ کنگ بیت، ویزا ءِ سرا بیت، تئو برگ بئے، تئی پجاّر ءُ مجگ ایردست بنت تہ ھما وھد ءَ کہ تئی زمین تئی نہ بیت۔
No comments:
Post a Comment