دوسد کلدار اللہ ءِ نام ءَ

 نبشتہ کار: جاوید بلوچ

من دپتر ءَ اوشتاتگ آں یک ورناہ یے اتک۔ آ چوکیدارے ءِ واستہ وتی کاگداں جم کنگ ءَ اِنت۔ ورناہ ءَ دپتر ءِ سائب ءِ کّر ءَ یک کاگدے لوٹ اِت۔ سائب ءَ جُست کُت تؤ کئی مردم ئے؟ اے کاگد ءِ دوسد کلدار بنت۔۔۔۔ ورناہ ءَ گْوَشت منی مردم اللہ اِنت۔ سائب ءِ گوشاں کپت مُلا اِنت، "مُلا گڑا تئی سفارش ءَ کنت؟ بلے  آ وَ بلدیہ ءِ مستر اِنت، دگہ میر ءُ مسترے گپتگ یا مُپت ءَ دوسد کلدار گوازین ئے؟ ورناہ ءَ پد ءَ گْوَشت منی مردم اللہ اِنت۔

چُشکہ اے سائب بلوچے اشیی ءَ راستی دیم ءَ گْوَشت ءُ پد ءَ وت ورناہ ءِ کاگد ءِ پُر کنگ ءَ آئی ءِ کمک ئے ھم کُت۔ بلے ادا اے پدّر بوت کہ مذھب پہ زوراک ءِ زوراکی ءُ نزور ءِ بزگی ءُ بے وسی ءَ چنچوکیں بلاھ ایں آسراہ یے۔ زوراک وتی دُزی ءُ ناجائزیں کارانی چیر دئیگ ءَ دین ءِ پوشاک ءَ پوشیت ءُ بے وس ءُ بزگ ھمے امیت ءَ دین ءِ دامن ءَ داریت کہ مرچی انّاں باندہ، باندہ اِنّاں محشر ءَ گوں آئی ءَ روچے ناں روچے انساپ بیت۔ 

سنگت گپ ءَ اِتاں کہ گْوادر ءَ اجتماع ءِ واستہ کار بئیگ ءَ اِنت۔ پِلاں ٹیکھدار حاجی ءَ بلاک داتگ، اے ھمے حاجی اِنت سرکاری اسکول ءِ ٹیکہ ئے گون انت کہ آئی بستگیں بلاک دست جَنَگ نہ سَگ انت پرچاکہ ھُشکیں ریکی ڈِک انت۔ شھر ءِ ھما تاجر کہ سَنگ ءَ مُک جنگ ءَ بنّام اِنت آ ھم ثواب ءِ کار ءَ دُرساں دیم ءَ اِنت ماشاء اللہ۔ یک روچے روز ءِ سر ءَ کارکنوکیں پوریاگِر اِشاں گپتگ انت ءُ پہ ھدا ءِ ءُ ثواب ءِ کار ءَ دو سے روچیں مُپت ءَ کار کنگ ءَ اَنت۔ دین ءِ نام ءَ ثواب انچش چو ھؤر ءَ رِچگ ءَ اِنت کہ کسے ءِ  دُزی ءُ کرپشن ءِ چِل شودگ بئیگ ءَ اَنت ءُ کسے ءِ دستانی تراول ءُ آبلہ گیش بوھان آں۔ 

یک سنگتے چہ درمُلک ءَ پوریاگری ءَ اتکگ ات، گُشیت من کُتگ مزوری ءُ زر دیم داتگ ادا اِشاں چار پاچن آپ کاہ ءُ کدیم کُتگ کہ بچ کئیت گڑا اے پاچناں زور ایں رو ایں ملاھی واجہ پلانی ءَ دئیں، بچک گُشیت بزگی اود ءَ من کُتگ، ادا شُد لاپ اے وپتگ آں پاچناں مُلاھی بہ وَر انت گڑا من نہ منّ اِتگ۔ مات ءُ پِت زھر بیتگ آں کہ تؤ برگِشتگ ئے۔ آخر من ھمد ءَ دو پاچن کُشتگ ءُ چوگان یے کُتگ۔ اے سنگت چُشکہ وانندگ ءُ سرپد انت پمشکہ اشیی ءَ وتی پاچن پہ مُپت ءَ دگرے ءَ دئیگ ءَ شات نہ بوت آں بلے اے اوں راستی یے کہ ھما دینی ٹیکھدار، مُلا ءُ ملاھی ءَ بزگ ءُ نزوریں مردمانی دل ءَ دین یک امیتے ءِ دروشم ءَ ایرگیج کُتگ کہ بے وسیں مھلوک ھمے یکے آسراہ ءَ وت ءَ زندگ داریت۔ بلکیں وانندگ ءُ رُژناہ پگریں سنگت ھم لاپ ءُ دین ءِ سِتک ءَ امینچو لاچار کُتگ انت سوشلزم آشوب وَ آرگ لوٹاں بلے ھمے دینی ءُ راج کاری ٹیکھدارانی چمپلانی سیدھا کنوک آں۔

گپ نوکری ءِ بئیگ ءَ اَت۔ نوکری ءِ سْیادی چُشکہ لاپ ءَ گوں بندوک انت پمشکہ مئے دینی ٹیکھدار بہ بنت یا سْیاسی، آیانی جندئے لاپ اوں ھمیش انت ءُ بزگیں مھلوک ھم ھمے لاپ ءِ گَماں جَتگ کہ ھر دوئیں نیماں امیت وار انت۔ ھماکہ آئی ءَ پُشتے ھست آ دوسد کلدار ءَ فارم ھم نہ زیر ایت بلے نوکری ھم گپت۔ ھما کہ آئی ءَ کس نیست آ دوسد کلدار پہ اللہ ءِ نام ءَ دنت۔ 

گْوادر ءِ ھمے وڑیں جاورانی سر ءَ گپ ءُ تران بئیگ ءَ اَت گڑا وانگ ءُ زانگ ءِ پڑ ءَ گوں سْیادی داروکیں واجہ کارے ءَ وشیں گپے جت۔ گُشیت اے "ہر دل عزیز لیڈر" اسل ءَ "ہر لاپ عزیز لیڈر" اَنت۔ ھرکسی کہ لاپ ءِ جیڑہ آئی ءَ گیش ءُ گیوار کُتگ ھما واجہ ءَ لیڈر، پِت ءُ باریں چے چے گُش انت۔ آ دگہ بلوچیں لس گْوادری وَ اے جاوراں انچش کُتگ کہ کسّی دل لاپ ءَ نہ اِنت، نی واجہ کجام دلانی لیڈر اِنت؟ اے دُرس "ہر پیٹ عزیز" لیڈر انت۔ اشانی گوں اشانی منوگر ءُ ھمراہ آں سْیادی ایوک لاپ ئیگ اِنت۔ ءُ اے وڑیں "ہر پیٹ لیڈر" بہ گندئے پُرتگیزیانی دھر ءَ ھم بوتگ، والی ءِ دھر ءَ کھدہ یانی دروشم ءَ ھم بوتگ ءُ انّی ھم ھست۔ اے تیاب دپ ءِ گواستانک ءُ راجدپتر کوھن انت بلے دل ءُ دماغانی تہ ءَ ھملِ جیھند، سید ھاشمی، مجید گْوادری ءُ کامریڈ کیوم ءُ ھمے وڑیں دگہ چہ لاپ ءَ شُدیگ بوتگ انت ھمے تھنا دلانی توک ءَ زِندگ آں۔۔۔۔ آ دگہ "ہر پیٹ عزیز" چُشکہ لاپانی لیڈر بوتگ آں پمشکہ زوت ہضم بوتگ آں ءُ دگہ دُرشمے ءَ سمات بوتگ آں۔۔۔۔۔ 

نوکری کاینت، بھر ھم بنت، مُلا ءُ "ہر پیٹ عزیز" وتی وتی بھر ءَ ھم زور اَنت بلے داں بزگ ءُ بے وسیں بلوچ ھست آں اے نوکریانی بھر ءُ بانک ءِ وھد ءَ چُشیں مردم ھم دَر کئیت کہ دو سد کلدار پہ ھُدا ءَ ھم جم کنت ءُ یک امیتے ءَ زندگ بیت۔