نبشتہ کار: چندن ساچ
ما کہ یکرندے چہ دنیا ءَ شتیں
مارا بیاریت اے زمانگ چہ کجا؟
لہتیں مردم انچین بنت کہ تو سر ءَ چست کن ئے آ وڑیں ناں وڑے ءَ تئی ہمراہ اَنت ءُ پدا آیانی ہمراہ داری یک انچیں ہمراہ داری یے بیت کہ آ ترا ھچبر یلہ نہ دئے اَنت ءُ نہ رؤ اَنت۔ ھمے مردماں تو چو وتی نزینکیں مردمانی وڑ ءَ دوست دارئے۔ اے مہرے ءُ اے مہر انچیں مہرے کہ ایشی ءَ زوال نہ بیت۔ میاں استمانی لبزانک ءَ لہتیں انچیں نام گومن ہمراہ اِنت کہ من ءَ گمان بیت آیانی ساہگ ہر وھد ءَ منی سرا ساھیل انت۔ ہمے گاٹ ءَ بلوچی لبزانک ءُ سیاست ءِ دنیا ءَ لہتیں انچیں نام است کہ آیاں من مدام چو نزینکیں مردمے ءَ ماراں۔ چہ آیاں بگندئے لہتیں اِے دنیا ءَ نہ انت بلئے ہمراہ اَنت۔ نورخان بزنجو چمیشاں یکے۔
من سر چِست کرتگ نورخان ءِ توار منی ہمراہ انت ءُ اِے وھد ءَ کہ من اے چاریں کِشکاں رندگ ءَ یاں، انوں ھم نورخان ءَ گوش دارگ ءَ یان ءُ نبیسگ ءَ یاں۔
ھون بند بند ءَ دل ءِ زھچان بیت
کُنٹگے وھدے گل ءِ مہمان بیت
من نورخان اولی رند ءَ پسنی ءَ نہادی ءَ استاد اعجاز علی پلپ ءِ کلب ءَ دیستگ ات۔ اودا برے نیمروچاں ءُ برے بیگہاں سوت ءُ ساز بوتگ ات۔ من کسان اتاں مدام شت ءُ کلب ءِ دروازگ ءِ دپ ءَ اوشتات ءُ سوت گوش داشت۔ استاد اعجاز چماں آجز ات ءُ پاگے بستگ ات ئے، تھتے ءِ سرا نندوک ات۔ نورخان برے برے اتک ءُ ھمود ءَ سوت ئے جت۔
نورخان ءِ دگہ جاھے، وتی جند ءِ پاڑہ ءَ ذگرانہ ءِ دپی ءَ پانے کسانیں دکانے است ات، ھمود ءَ ڈِکّی ءِ سر ات۔ من ءُ کماش کہ ھمد ءَ گوستگ اتیں گڑا نورخان ءَ مدام مارا مانتر اتگ ات ءُ پہ لوگ ءَ آیگ ءَ مِنّت ئے کتگ ات۔
نور خان ءِ رپتن ءَ پد ھم نورخان ءَ اے ہمراہ داری انگت برجاہ انت۔ پسنی ءَ کہ ریکپشت ءَ رواں گڑا دو جاہ ءَ الم رواں۔ یکے جُڈی ءُ دومی نورخان بزنجو ءِ کبر ءِ سرا۔ انوں مارچ 2023 ءَ شتگ اتاں گڑا من ءُ حیات شاہ نور خان ءِ کبر ءِ چارگ ءَ شتاں۔ اودا کہ من ھر وھدے رواں گڑا ابیتکی ءُ تہنائی من ءَ چاگرد کنت۔
اگاں نورخان بزنجو ءِ ازم ءِ گپ ءَ بکناں گڑا آئی ءِ ازم ءِ ابدمانی ءِ یک نشانی یے ایش انت کہ نور خان ءِ رپتن ءَ بیست سال سرجم بوتگ، اے تیز رواجیں وھد ءَ آ انگت گیشتریں مردمانی دل دوستیں گُشندہ انت ءُ مروچی ھم پہ ھر کس ءَ نوک انت۔ نور خان ءِ دگہ کمال ایش انت کہ آئی ءِ گوشتگیں سوت ھر گُشندھے ءَ کہ جتگ اَنت آیانی دپ ءَ بے تام بوتگ انت۔ بلئے نورخان ءَ اگاں دگہ گشندھے ءِ سوت گوشتگ پدا ھمے سوت نورخان ءِ جند ءِ نام ءَ یاتگار بوتگ۔
نورخان ءِ جند بلوچی ءِ مزنیں وانوکے ھم بوتگ۔ آئی ءَ ماھتاک بلوچی، بلوچی لبزانک ءُ اے دگہ تاک ءُ ماھتاک مدام زرتگ ءُ ونتگ انت۔
بیدئے شراب ءُ بھنگ نہ بیت
ءُ
ھزار بہشت بہا پہ گل ءِ گلابیں چم
اے دوئیں شئیر ماھتاک بلوچی ءِ ٹائیٹل تاک ءَ چاپ بوتگ انت ءُ نورخان ءَ گچین کرتگ ءُ گوشتگ انت۔ اے آئی ءِ کمال بوتگ کہ آئی ءَ چیزانی گچین کنگ زانتگ ءُ گوشتگ انت۔
گشندھے ءَ ابید نورخان بزنجو ءَ شئیر ھم نبیس اتگ ءُ آئی ءِ شئیرانی یک کتابے چاپ بوتگ ءُ دومی ءِ چاپ ءِ جار دیری شنگ بوتگ بلئے انگت چاپ نہ بوتگ۔
نور خان ءِ شئیرے کہ
بیا روچ شپ ءَ لیٹین مئے گم جتیں پاسانی
نوں واب کجا کیت انت سرجاہ پُلگ بوتگ
اگاں ازم کارے گوں وتی ازم ءَ ایمان دار بہ بیت۔ آ وتی رپتن ءَ پد ھم مردمانی ہمراہ بیت ءُ اے کار نور خان بزنجو ءَ کرتگ ءُ پیش داشتگ۔ پمیشکا مروچی ھم مئے ہمراہ انت۔
No comments:
Post a Comment