پِت، نمیرانیں واجہ مبارک قاضی

تارک پیشُکانی

تیوگیں بلوچ قوم ءَ واجہ مبارک قاضی ءِ درگت ءَ چیزے ناں چیزے نبشتہ کتگ، بلے تئی نبشتانکاں من گندگ ءَ نہ آں-،،

من چے نبشتہ بکن آں؟

من ءَ ھمے وڑ سما بوھگ ءَ انت کہ پورہ منی جند ءِ پت مُرتگ؟ یکے ءِ پت کہ بہ مریت گڑا آ چے نبشتہ بہ کنت؟ تو من ءَ بگُش من نبشتہ کن آں،،

( اے منی ءُ سنگتے ءِ میسنجر ءَ گپ ءَ تران ات انت)- 

منی پت وتی گُڈّی روچاں سلطانی نادراہ جاہ ءَ داخل ات کہ آئی دوھیں کڈنی پیل بیتگ اتنت- 

اے مئے ھمے پت ات کہ وھدے آ دو سالانی سر ءَ ملک ءَ کہ آتکگ ات- گڑا ما دوھیں برات آئی ترس ءَ چہ دلاپ اتیں کہ کدی اے مردکُو ءِ موکل ھلاس بہ بنت ءُ پد ءَ وتی ملک بزاں مشکت ءَ برؤت-

بلے ھردے کہ ما (دوھین برات ءُ مات) مشکت ءَ شتیں- گڑا من ءَ گوں وتی کماش ءَ گیشتر مھر ءُ مھبت بیت، بزاں من چہ ایندگہ براتاں گیشتر پت ءِ گون ءَ ھور ءُ تور بیتاں-

دیر نہ گوست کساس ششت ءُ سئے سال ءِ عمر ءَ کماش ءِ دوھیں کڈی پیل بیتگ انت- ءُ آ نادراہ جاہ ءَ داخل بیت-،،

ھمے زمانگ ءَ پت ءُ مات کسان کسانیں ھبرانی سر ءَ وت ماں وت جنگ ءُ داوا بیتگ ات انت-

پت نادراہ جاہ ءَ وتی گُڈّی روچاں گوازینگ ءَ ات- من گوں مات ءَ زھر بیت آں منی گشگ ات کہ ماتی! تئی بازیں جنگ ءُ چوپاں چہ منی پت نادْراہ بیتگ، گند ئے منی پت ءَ چیزے بہ بیت من داں زندگ آں گوں تو ھبر نہ کن آں،

دیر نہ گوست یک شپے ماسی مئے لوگ ءَ اتک ءُ مارا ھال ئےِ دات کہ شُمئے پت ءَ وفات کتگ-،، منی جند ھُشک ءُ ھیران بیت- من بزاں نفسیاتی مریض بیت آں، نزانت چے بگش آں ، نزانت چے بہ کن آں ، باریں چے وڑ ما براتاں وتی پت ءِ کپن ءُ کسارت کت-

بیست سال ءَ پد واجہ مبارک قاضی ءِ مَرگ ءَ ھم من انچیں جاورے ءِ آماچ اتاں، پمیشکا دماگ کار ءَ نہ ات کہ چے بہ کن آں ، چے بگش آں یا چے نبشتہ بکن آں، پرچا کہ من گوں واجہ ءَ دیم پہ دیم دچار نہ کپتگ آں ءُ نیکہ منی گوں واجہ ءَ عکسے ھست کہ شنگ ئےِ بکن آں ، یک ءُ دو رند ءَ واجہ عبدالمجيد ءِ برکت ءَ واجہ ءَ گوں گپ ءُ ھال بیتگ ات- واجہ ءَ من ءَ لھتے کتابانی نام ھم داتگ کہ اے کتاب لھتے دریا ودی ءُ لھتے تژن ءُ بچکندی بیتگ ات انت- 

من گوں واجہ ءِ ارواہ پھیلی لوٹ آں کہ من آئی ءِ بابت ءَ ھچ نبشتہ کت نہ کت-