'من سید رنگ ءِ پدگراں کازی"

اے آر داد

من سید رنگ ءِ  پدگراں کازی

ھانل ءِ  راز دار باں بلکیں

۔۔

مبارک  کازی ھما کارست انت کہ ھر کس ءَ  گوں آئی ءِ  چندیں کسّہ ءُ عکس الم بنت۔ چاگردی رسانک در ءَ  ھر نیمگ ءَ  کہ چم کپ انت مبارک انت ءُ  مردمانی جوزہ ءُ  جبزگ انت۔ اے مزنیں گپے کہ بلوچ وتی مزنیں مردماں اے رنگ ءَ  دوست دار ایت پد ءَ  کارست مبارک بہ بیت وَ چد ءُ  گیش۔  اگاں راج رند ءَ  آیاں پراموش مہ کنت ءُ  آیانی کار ءَ  دیم ءَ  ببارت گُڑا جْوان انت۔ اگاں نا ایوک چندیں جبزگ بنت ءُ  چندیں روچ ءَ  پد کپّ انت ءُ  ایرماد بنت  پد ءَ  کسّہ ھلاس بیت ،گُڑا مارا کمیں جیڑگ لوٹ ایت۔

من مرچی بیگاہ  ءَ قدیر لقمان ءَ  کال کت ءُ  گْوشت کہ تو مبارک ءِ  ھمے گُڈی سپر ءَ  رپورتاژے ءِ  دروشم ءَ  نبشتگ بکن کہ چوشیں کارستے اود ءَ  ھست ات کہ مَرگ ءَ  زانگ ءَ  نہ ات ،دوستی ءُ  سنگتی  ءَ  ھم زانگ ءَ  نہ ات، سیاست ءَ  ھم زانگ ءَ  نہ ات۔ گوش ایت ھو مبارک ءَ  کہ کبر ءَ  ایردیگ  بیگ ءَ  ات نزیک ءَ  گونڈیں زھگے گوں وتی کروس ءَ  نشتگ ات ،من جست کت تو اد ءَ گوں وتی کروس ءَ  اتکگ ئے۔ من ءَ  گُوشت ئے " واجہ ابا مرتگ من چون نیایاں۔"

گوں من وَ ھمنچو کسّہ ھست انت کہ انی وَ گوشگ نہ بنت بلے یکے آرگ لوٹاں۔ دو مردم چہ اشاں یکے اتاشات کہ من نہ دیستگ ات بلے گوشداشتگ ات۔ یک زمانگے آئی ءِ  دیوانے "سچکان" ءِ  نام  ءَ  ھست ات نہ ایوک من گوشداشت بلکیں پیت بند ھم کت دومی مبارک انت کہ نزیک ءَ  نشتگ ات ءُ  گوشداشتگ ات۔ برے برے کہ اتا ءِ  سر ءَ  گپ کناں ھمے توار ءُ  رنگ منی تہ ءَ  جاگہ کن انت۔من گْوشے اتا باں۔" مئے لبزانک ءَ  یک دورے من اتوں امان ات  ءُ  ھکیم چو ٹو ات۔" مبارک وَ من اَنچو گیگان کت کہ آئی ءَ  کند ات ءُ  ھِٹ دات ءُ  کمینہ گْوشت۔ چو بیت کہ یک روچے من ءَ  گوش ایت زینت سَنا ءِ  نمبر  ءَ  بدئے من نمبر دات بلے من آئی ءِ  موبائل پچ گپت  ءُ  وت ھمائی ءِ  داب ءَ  جست۔ "زینت کجائے من شال ءَ  یاں۔پجہ آرگ ءَ  ئے۔ " زینت ھچ نزانت کہ من ءَ گوں داد گپ ءَ  انت ۔

اے درائیں گپّانی گْوشگ ءِ  بزانت ایش انت کہ مبارک کازی شئیر  ءُ  ازم ، ھنر ءِ  رِد ءَ  نوں چارگ لوٹ ایت، چکاسگ لوٹ ایت کہ آئی ءِ  مستریں پجار ھمیش انت۔

بلکیں منی جند آئی ءَ  جْوانیں ردانکے نویسے ھم سرپد بیت، کمیں لبزانی  ءَ  تژنی رھبند ءَ  ردانک نویسی  ءِ  اے رھبند اردو ءَ  جون ءِ  گور ءَ  کہ گندگ بیت مبارک ءِ " منی تاک"  ءِ  چندیں نبشتانکانی تہ  ءَھم  گندگ بیت۔

یک رندے مزنیں گپ ءُ  ترانے بوت کہ مبارک چونیں شئیر نبیسگ ءَ  انت

جمبر کہ مان شاننت جمبر شراب نوش انت

گُڑا کازی ءَ  نبشتانکے نبشت کہ ما "دْرد ءَ  چاپ ءُ  شنگ کت۔ آئی  ءَ  وتی ھمے شئیر ءِ  پلامرزی ءَ  پروین شاکر ءُ  بشیر بدر ءِ  درور ءُ  مسال دات انت۔ 

"زرنوشت"  کہ نوک چہ انجمن پٹ ءُ  پولی کمیٹی ءِ  نیمگ ءَ  چاپ ءُ  شنگ بیتگ ات ما کازی چہ پسنی ءَ  لوٹائینت  ءُ  آزاد فٹبال کلب ءَ  دیوانے کت۔ من ءُ  امبر ،عثمان توکل ، اسلم طابش اتیں۔ من جارچین اتاں گپ ءَ  اتاں باریں چی چی گوشتگ ات ۔کازی کہ دیوان ءِ  دیم ءَ  اوشتات ،ھمے گوشت ئے " نزاناں منی کتاب ءِ  دیمدرائی بیگ ءَ  انت کہ کندرائی ۔"

نوں وھد اتکگ کہ ما مبارک کازی ءَ  آئی ءِ  شاعری ءِ  ازم ءُ  بستار ءِ  رِد ءَ  زانگ ءِ  جھد بہ کنیں کہ نہ ایوک مبارک ءِ  واھگاں چہ یکے ات بلکیں ازم ءِ  لوٹاں چہ مستریں لوٹ ھمیش انت۔

مروچی گُوات ءِ  نیتّ جھل ءُ  برز انت

شپی ھَورے پد ءَ  گوار ایت چراگاں