‎واجہ قاضی، من ءُ کیچ

‎جی ایم بلوچ

‎من چہ در کسانیءَ بلوچ نیشنلسٹ شائر  واجہ قاضیءَ گوں آشنا اتاں ءُ شائرءِ آشوبءَ کئے آشنا نہ بیت قاضی مئے اھدءِ مسترین توار ات کہ ھر دلاں درک ات۔ منی جندءِ ھیال انت کہ سید ھاشمیءَ پد بلوچی زبانءِ مستریں نام قاضی ات۔

 

‎‘ شائرءِ آشوب” پہ بلوچاں مھترے ات، جہگیریں دردانی مھتر ات۔ پُرّیں ھپتاد ءُ پنچ سالءِ ایردستیءِ دردءَ ابیدء قاضیءِ ند ءُ زبانءَ دگہ مردمے نیست کہ چوش نزّ بیار ایت پمیشکا بلوچ ایردستیءِ مھتر ءُ جہگیر ات۔  آئی ءِ شائری پہ بلوچاں پاکیں آیاتانی وڑءَ رھشون اتنت اینچو وھد گوزان ات شائرءِ آشوبِ شئیریءِ ازم ھمینچو تامدار بیان اَت کہ آئیءِ شئیری ءُ ساچشتی بود ھجبر  نہ کُٹیت من وتی زندءَ شائرءِ آشوب بزاں مبارک قاضی، گلزار ءُ غالبءَ چہ سک متاثر بیتگ آں۔ ھمے دوئیں شائرانی شئیر بس منءَ یات بنت دگہ منءَ وتی شئیر ھم پہ دل یات نہ بنت۔

‎منی دلءِ یک واھگ ءُ مرادے بیتگ کہ من شائرءِ آشوبءَ  دیم پہ دیم دیدارءَ بہ کناں، ھمے واھگ ءُ مراد دلءَ ات کہ یک رندے ھال ات کہ پِشُکانءَ شائرءِ آشوب مشاعرہ ءَ آھگءَ انت اے ساھتءَ من  گْوادرءَ  وانگ اتاں ، من ھمے شئیری دیوانءَ بھر زرت من اتکاں داں بابا قاضی ساڑی نہ ات من ھال گپت سنگتیءَ گشت کہ بابا نئیت ادءَ منی اے واھگ سرجم نہ بیت

‎وھد گوزان ات من کیچءَ تُربَت شاہ دربرجاہءَ داخلہ زرت سئے سال سرجم بیت یک روچے ھالے شِنگ بیت کہ واجہ مبارک قاضی تُربَت شاہ دربرجاہءَ آھگءَ اِنت من کلاس یلہ دات ءُ ھمے دیوانءَ بھر زرت اے اولی رند ات کہ من شائرءِ آشوب دیم پہ دیم دیست آئیءِ مبارکیں دیم ،آئیءِ وشُکیں بچکند، شیرکیں توار گوں جندءِ شئیراں پدا  گپ ءُ تران  منی دلءِ یک مزنیں مرادے سرجم بیت ، من شتاں کازی ساھبءِ نزیکءَ دلءَ گشت کہ مبارکءَ بگلءَ بکن  بلے رش ات اے واھگ سرجم  نہ بیت  کہ من بس دست دات ءُ قاضیءِ پشتی نیمگءَ اوشتات آں  ءُ گوں آئی ءَ جنزان بیتاں پدا داں رخصتی وھدءَ من قاضی ءِ کش ءُ کِرءَ گون بیتاں

‎ مرچی بزاں کہ 16 ستمبرءَ  من کیچءَ وتی سنگت جمیل کریمءِ مہمان اتاں من سہبءِ چہ وابءَ بست کت یکشیگیں وڑءَ من موبائل دستءَ کت وٹسپ پچ کت  داں گروپاں ھالے شِنگ ات  کہ شائرءِ آشوبءَ مارا یلہ کُت پورا گش ئے آزمان سرءَ کپت.......

‎اے روچ پہ کل بلوچاں یک دردناکیں روچے بیت.... اے روچ مدامی پہ ناوشیں روچےءِ نامءَ یات کنگ بیت.... 

‎واجہ تو مدام زندگ ءُ ابدمان ئے تو مدام نمیران ئے تو مئے دلاں  زندگ ئے آ کہ دلاں زندگ بنت آ ھچبر نہ مر 

‎انت داں بلوچی زبان است تو نمیران ئے