بلوچ ءَ ”وتی مُلّا“ سک دوست بنت

جاوید بلوچ

بلوچ ءِ گوْر ءَ لاھور ءُ رائیونڈ ءِ مُلاھی کلچر ءِ آیگ ءَ پیسر مُلّا یک شرپی ایں لبزے بوتگ۔ مُلّا پہ زانتکار، وانندہ ءُ پھلواناں (ائدی شائر ءُ گُشندیاں) کارمرز بوتگ۔ سید گنج ءَ ھم مُلّا ءِ اولی مانا ”ونتگیں مردم“ اِنت۔ 

بلوچ گُلزمین ءَ جاھمنندیں ھمک مذھب ءِ منوک ءَ بلوچ شرپی ایں نگایاں چاریت۔ آ بلوچستان ءِ بکال ءُ گَور بہ بنت یا دگہ۔ گڑا اے چون بوت کنت کہ بلوچ نود ءُ نوہ درسد ءَ گیش مسلمان بوھگ ءَ وتی اے دین ءُ دین ءِ زانتکاراں چہ کینگ بہ دار اَنت؟ 

تُربَت ءِ شھید فدا چار راہ ءَ گھگیری ءِ یک جوانتریں ندارگے ھمیش اَت کہ بلوچ کُل تپاکی ءَ گوں ھور شھید بالاچ ءِ میت ءَ وتی وتی سِتک ءِ رِد ءَ گوں دینی شرپ ءَ گُڈی رسم ءَ ادا کنگ ءَ اِتاں۔ اے اکس بلوچ ءَ وتی دل ءُ چمّاں داشتگ۔ 

اسل جیڑہ اِش انت کہ بلوچ ءِ کاؤنٹر کنگ ءَ امینچو کہ مذھب ءُ مُلا ریاست ءَ کارمرز کُتگ انت دگہ امینچو بلوچ ءِ تہ ءَ ھستیں یک درسدے ءَ چہ کمتر حادثاتی لبرل ھم مُلا ءِ بگیری ءَ یا مُلا ءِ ھست بوھگ ءَ نہ منّگ ءُ پہ زور بلوچ ءَ لبرل ثابت کنوک ھم زمہ وار اَنت۔ اے آرت ءِ تہ ءَ واد ءَ چہ کمتریں مردماں دائم مُلا ءُ بلوچ ءِ نود ءُ نوہ درسد دین ءَ چَٹ یک کِرّ دارگ ءِ ھاتر ءَ پہ زور ھما سرھال ءُ بُنگپ دیم ءَ آرتگ انت کہ چہ اشیی ءَ ناں ایوک وتگڑیں مُلّا برانز گپتگ انت بلکیں لس بلوچ ھم پہ زور مُلّا ءِ ھمتپاک کُرتگ انت۔ 

راستی ھمیش انت کہ بلوچ وتی زمین، وتی پجار ءُ وتیگ ءَ گوں بے کساس مھر کنت بلے اگاں آ بلوچ بہ بیت۔ بلوچ ءِ مُلا کہ وت ءَ گوں بلوچ ءِ درد ءَ شریک کنت، بلوچ آئی ءَ وتی دل ءَ جاگہ دنت۔ بلوچ ءِ ھمے مُلا کہ ریاست اشانی پُشت بوتگ، ءُ آیاں ریاست ءِ مفادانی رکینگ ءِ ھاتر ءَ بلوچ ءِ چُکچینی ءِ سر ءَ وت ءَ کرّ، کور ءُ گُنگ کُتگ۔ آیانی درور ءُ درآمدیں زوراک ءِ درور یک بوتگ بلے ھردیں کہ یک مُلایے ءَ بلوچ ءِ درداں وت ءَ شریک کُتگ بلوچ ءَ آ وتی کُتگ۔ 

ابید چہ مُلاھی یاں کہ دائم ریاست ءِ ووٹ مشین ءَ ووٹرانی کچ ءَ گیش پیشدارگ ءِ کار ءَ کاینت ءُ وتی یک مُشتیں ووٹ ءَ گِر انت ءُ پد ءَ پہ وت ءَ نپ زور اَنت بلوچ ءَ مُلاہ ءِ سیاست کبول نہ کُتگ۔ مُلا بلوچستان ءِ بلوچ دمگاں ریاستی زوراکیں پالیسیانی سر ءَ ھاموش بوتگ، اوگانستان، کشمیر ءُ پلستین ءِ بابت ءَ دروگیں ارس ئے ریتکگ۔ بلوچ ءَ وتی نہ کُتگ بلے ھردیں کہ بلوچ ءِ درد ءَ گوں ھوار بوتگ مرچی بلوچ ءَ یک اکسے وتی پھر ءُ شان کُرتگ۔ 

بلوچ ءِ مُلا زندگ ءُ بلوچ باتاں۔