عبدالحلیم حیاتان
اکبر ءِ سیادی چہ لیاری کراچی ءَ اِنت۔ بلے دیر اِنت کہ اکبر وتی اِزم ءَ گْوادر ءَ پیش دارَگ ءَ اِنت۔ اکبر ءِ برات شہزاد ھم سازندہ یے۔ دوئیں برات چہ دَرکسانی ءَ وتی چماں ھاجِز بیتَگ آں۔ بلے اے دوئیناں وتی ھاجزی وتی لاپ نہ کُرتگ بلکیں اِزم ءِ پِڑ ءَ وتارا ھور کتگ۔ اکبر بینجو جَنت ءُ بینجو جَنگ ءَ ابید تبلہ ھم جَنت۔ اکبر ءِ کستریں برات شہزاد تبلہ ماسٹرے۔
اے تامر (ویڈیو) ءِ تہ ءَ کہ اکبر یک زیمری اسبابے ءَ گوں سَاز جَنگ اِنت اِشی ءِ نام "Melodica" اِنت کہ اے گوں دپے گواتاں گوں ساز بیت۔ اکبر ءِ اے اِزم لکھ ستا کَرزیت۔ سازاں اَنچُش جَنگ ءَ اِنت کہ گِیمُرتَگیں دِل بُود کَن اَنت۔
اکبر ءُ آئی ءِ برات شہزاد اے وھد ءَ نعیم اللہ وسایا ءِ سازِندہ ٹولی ءِ باسک اَنت۔ گْوادر ءَ کہ آروسی مراگَش بَنت اکبر ءُ آئی ءِ برات وتی اِزم ءَ پہ جوانی ءَ پیش دارَنت۔ اے دوئیں برات نعیم ءِ گور ءَ نعیم ءِ لوگ ءَ اَنت۔ نعیم اِشانی ھیال داری ءَ کَنگ اِنت۔
گوں ھاجزی ءَ اکبر ءُ آئی برات ءِ بلوچی زیمر ءِ ھزمت ءُ دیم ءَ بَرگ ءِ جُھد ءَ آپرین اِنت۔ پہ بلوچی زیمر ءِ دیمرئی کارکَنُوکیں گَل یا اِدارگ الم ءَ اکبر ءُ آئی ءِ برات ءِ پلہ مَرزی ءُ دَست گِیری ءَ بَکن اَنت۔
اے تَامُر چہ زاھد بلوچ ءِ مِنت ءَ شِنگ کَنگ بُوتگ۔ زاھد گْوادر ءِ یَک جوانیں گُشِندہ ءُ تَرز نگارے۔
No comments:
Post a Comment