منزل گام دو گام، شھید بالاچ ءِ کاروان

جاوید بلوچ

مئے اسکول ءِ زمانگ ءَ گْوادر ءَ روانکانی بُنجاہ یا اولسر مئے اسکول ”جدید“ بوتگ اَت۔ اے ھما دھر اِنت کہ ھردیں دومی یا سیمی پریڈ ءَ باز گھنٹی لگ اِت گڑا ما زانتگ اَت کہ مرچی روانکے یا ہڑتال اِنت۔ پد ءَ زردوکیں گُداں گوں ما دراجی ءَ روان اِت انت دیم پہ ماڈل اسکول۔ پد ءَ گڑا شھر ءِ دمک ءُ دگّانی سر ءَ کُکار ءُ نعرہ ۔۔۔۔ اے میان ءَ ما مدام گَل اِت انت کہ بچار زرد، سبز ءُ اسپتیں گُدانی تہ ءَ زرد گیشتر اَنت۔ مئے وشی ءُ وتی منّاں پھر ءُ شان ھمیش اَت کہ مئے اسکول ءِ چُک گیشتر انت۔ مرچیگیں جاوراں گندئے زانگ بیت انگت ما ھما ھوش ءُ جوش ءِ وارس اِنت۔ اشیی ءِ یک مانا یے ھمیش بوت کنت کہ وھد گوستگ بلے ما اجتماعی دروشم ءَ ھم نہ رُستگ اِنت ءُ راجی دروشم ءَ ھم۔ ما انگت زرمبشے بیت کہ جُنزے، آئی ءَ ھمے وتی نزیکی کچ ءُ کساس ءَ چار اِنت۔ کیچ ءِ شھید فدا چار راہ چُشکہ مئے یات ءُ نزیکیاں بندوک انت پمشکہ مئے دل ءَ بلوچ ھمد ءَ شوک انت۔ گنداوا، بیلہ، اوستامھمد ءُ بارکھان ءَ بِل شالکوٹ ھم وتی دل ءُ سِتک ءَ چہ کشتگ۔ اے مھمود خان اچکزئی ءِ منت اِنت کہ آ برے برے مارا یاتاں پِرین ایت کہ شال مئیگ اِنت۔ 

اسلام آباد ءَ دیریں کہ تہران ءِ سرکار ءِ وڑ ءَ یک پندلے ءَ پروپیگیٹ کنگ ءِ جھد ءَ اِنت کہ ”زِرباری بلوچستان“ ۔ اشیی ءِ ھاتر ءَ باز بر ءَ ھامد میر ءِ وڑیں اھوالکار ھم سرکاری ھرچ ءُ درچ ءَ آرگ بوتگ انت۔ آواران، کیچ ءُ گْوادر ءِ تر ءُ تاب کنائینتگ انت۔ ءُ مرچی باندہ آ وتی نبشتانک ءُ مراگشانی تہ ءَ لبز ”جنوبی بلوچستان“ کارمرز کن انت۔ سیستان و بلوچستان ءِ وڑ ءَ رودراتکی بلوچستان ءِ بھر ءُ بانک ءُ اے تاسر ءِ دیگ کہ بلوچ زرمبش تھنا جنوبی بلوچستان ءَ اِنت، وڑ وڑیں پروجیکٹ ءُ وتگڑیں دیمرھی ءِ منصوبہ تیار کنگ بوتگ انت۔ بلوچ مرچی میان استمانی تَک ءَ بِگر داں بلوچستان (رودارتکی ءُ روبرکتی) ءَ بھر بھر بوھگ ءِ خطرہ ءَ دُچار اِنت۔ مکُران ءِ غم مکُران ئیگ اِنت ءُ سیوی ءُ بارکھان ءِ ھمایانی۔ چُشیں گَلے ناں میان اُستمانی تَک ءَ سرجم ءَ بلوچ ءُ بلوچستان ءِ (ڈیرہ غازی خان داں بندرعباس) نماھندگی کت کنگ ءَ اِنت ناں بلوچستان ءَ۔ بلوچ یکجھتی کیمیٹی ءِ نام ءَ یک گلّے دیم ءَ اتک کہ آ بلوچ ءِ ایشوزاں سیاسی رنگ ءَ دیم ءَ برگ ءَ اَت بلے پد ءَ اشیی ءَ وتی نزوریں کوپگاں ھار جَتیں بلوچانی کمبل ءُ آرت ءِ ڈُبہ ھم زُرت۔ اے چندہ والا کلچر اے وھد ءَ بلوچستان ءِ ھما ایشو اِنت کہ اشیی ءِ واستا ناں ایوک سرکار تئی دلبڑی ءَ کنت بلکیں الخدمت ءُ شاہد آفریدی ءَ ھم تئی ھمراہ دنت۔ ضلعی سطح ءَ ڈسٹرکٹ انتظامیہ کمک کنت۔ چُشکہ بلوچ یکجھتی کمیٹی ءَ چار کمبل پہ بلوچاں یک جاہ کُت ءُ حدیقہ کیانی ءَ چارسد۔ ۔۔۔ بلے شکر انت کہ بلوچ یکجھتی کمیٹی پد ءَ وتی اسل جوڑ بوھگ ءِ نیم ءَ اتک۔

تُربَت ءِ شھید فدا چار راہ ءَ بیگواھیں مردمانی کھولانی سروکی کنان ءَ بلوچ یکجھتی کمیٹی، بلوچ ویمن فورم، حق دو تحریک، سول سوسائیٹی ءُ ھم ھیالیں گَلّاں اے پیسلہ کُتگ، ءُ ھاس وائس فار بلوچ مسنگ پرسن ءَ کہ ھما فیملی تُرس ءُ بیم ءِ سبب ءَ دیم ءَ نیا اَنت۔ آیانی دلبڑی ءُ سرپدی دیگ ءِ ھاتر ءَ بلوچستان ءِ ھمک شھر ءَ اے جُنز دیم ءَ برگی اِنت تاکہ بیگواھیں مردمانی کھول ھماکہ شال ءَ اتک نہ کن انت۔ اے جُنز ءِ بھر بہ بنت۔ وتی توار ءَ بُرز بہ کن انت۔ ءُ چو برمش، ھیات، ملکناز، ھوشاپ ءُ بارکھان ویل ءِ وڑ ءَ بالاچ ءِ کوش ءَ پد بنا بوتگیں تحریک شھید فدا چار راہ ءَ مہ کُٹیت پمشکہ اے بلوچستان ءِ ھمک شھر بلکیں داں اسلام آباد ءَ برگی اِنت۔ اشیی ءِ تہ ءَ پشتون، سندھی ءُ آ دگہ مظلوم ھم ھوار کنگی انت۔ پمے ھاتر ءَ باندہ اے تحریک ”منزل گام پہ گام، بالاچ ءِ کاروان“ وتی اولی فیز ءَ تُربَت داں شال ءَ درکیت، باندہ پَنجگُور ءَ روت۔ اود ءَ بیگواھیں مردمانی کھول اشیی ءَ وش آتک کن انت۔ پجگور وتی کنٹریبیوشن ءَ ھوار کنت ءُ شھید بالاچ ءِ علامتی تابوت ءَ کُوپگ دنت۔ ھمے وڑ ءَ پد ءَ روان روان داں سوراب، کلات ءُ مستونگ دیم پہ شال ءَ روت۔

کیچ ءَ کے اِنت کہ بلوچ زرمبش، بلوچ چُکچینی، بلوچ ءِ سر ءَ بووکیں زوراکیاں سرپد نہ اِنت؟ بلے ھؤ بوت کنت کہ جھل مگسی، ڈیرہ مراد جمالی ءُ سیوی ءَ چُشیں باز دربئیت کہ سرپد نہ انت۔ چُشیں بازیں کھول چو ناکو میار ءِ وڑ ءَ بہ بنت کہ آیانی ھیسکارگ ءُ اُپار انگت اِشکُنگ نہ بوتگ انت۔ پمشکہ اگاں بندرعباس داں ھب چوکی اگاں بوت نہ کنت بلے جیمڑی داں رکنی اے کاروان ءِ روگ وھد ءِ لوٹ انت۔ کیچ ءَ ٹائر سوچگ، دربند کنگ ءُ شھید فدا چار راہ ءِ گدان ”جنوبی بلوچستان“ ءَ اناں بلکیں مکُران ءَ ھم ھیلدار کنگ ءَ اِنت، انچوش کہ شال پریس کلب ءِ دیم ءَ ماما کدیر ءِ گدان ءَ شال ءِ مردم ھیلدار کُتگ انت کہ اے وَ ھمروچیگیں گدانے۔ پمشکہ سُرگ المی اِنت۔ 

بالاچ ءِ علامتی تابوت ءِ بَرَگ المی اِنت دانکہ اے مزاحمت ءِ نشانی آ دگہ کھولاں، بلوچستان ءِ ھمک کوچگ ءُ شھر ءَ سکین دات بہ کنت کہ اگاں شُما ھچ نہ گُشت گڑا اے تابوت ھمک بیگواھیں بلوچ ءِ (ھدا مہ کنت) بیت۔ 

شھید فدا چار راہ ءِ اکس، تُربَت ءِ دمک ءُ مکُران ءِ میتگ چو اسکول ءِ زردیں گُداں بوت کنت مئے جند ءِ وابستگی ءِ سبب ءَ مارا دوست تِر بہ بنت کہ اے اکس ءُ ویڈیوزاں ما بہ گندیں کہ بچار مئے ھلک اِنت، مئے میتگ انت۔ بلے گڑا آ سر داں رودراتکی بلوچستان، پد ءَ ریاست ءِ کلات، پد ءَ جنوبی بلوچستان داں تُربَت ءِ شھید فدا چار راہ ءَ کیت ءُ لُک بیت۔