گوادر ءِ گُڈی کسہ گُش بابل غلام قادر رُخصت بوت

خیرجان خیرول

گوادر ڈوریا ءِ گُڈی کسہ گش غلام قادر بابل گوادر ءَ کماڑی واڑ یا ملا کریم بخش وارڑ ءِ نندوک بیتگ کہ مرچاں کوہ بن ءَ آئی ءِ لوگ انت ۔

غلام قادر واجہ اسحاق بلوچ ءِ برات انت ۔واجہ بابل ءَ وتی بچکی ءُ جوانی دریاوردی ءَ گوں گوازینتگ داں کہ چماں ھاجز بیتگ ۔ 

غلام قادر مشہور بیتگ بابل کسہ والا ءِ نام ءَ چہ ۔

گوادر ڈوریا تیاب ءَ ھرچ وڑیں دیوان ءُ مجلسانی جاگہ  بیتگ ، ھمے مجلسانی تہا کسہ ئی مجلس ھم بیتگ انت ۔

 منی ھیال ءَ مشہور ترین کسہ گش مغل چل چاپ یا مغل  کسہ ئی بیتگ مغل ءَ گونڈ گوْنڈیں کسہ آرتگ ۔ مغل ءِ کسہ کامیڈی ھم بیتگ انت بلے گیشتر +18 بیتگ انت ۔

دومی  رمضان گرنا گولو بیتگ ۔ رمضان یک مزنیں ایکٹرے بیتگ رمضان یک ناچی یے ھم بیتگ۔ وھداں یدار کہ دیمی زر ءَ چہ پدی زر یا پدی زر ءَ چہ دیمی زر ءَ برگ ءُ آرگ ءَ مردماں گوں ڈھلاں برتگ ءُ آرتگ انت ۔ گڑا ھمے جلوس ءِ سروکی رمضان ءَ کتگ ۔ گوں وتی ناچ ءُ ھمبا یاں مردم گرم کتگ انت آھاں ھمت داتگ ۔ رمضان ءَ دیوان ءُ مجلساں گپ ءُ وازگاں گوں مردم وش مولما کتگ انت ۔ رمضان ءَ وتی کسہ آنی تہا درائیں کارستانی جتا جتائیں آواز کشتگ جنین مردین پیر ءُ ورناہ، بلوکانی داں جناورانی ھم آواز کشتگ ۔ مغل ءُ رمضان ءِ مجلس سک وش بیتگ انت اشانی مجلس سک بز بیتگ انت اشاں گیشتر شاہی بازار ءَ ھوٹلانی سرا ءُ ڈوریا ءَ کسہ گوشتگ ۔

دگہ کسہ گوش داؤد ، خدابخش سُنڈو ، حسن ملو ءّ بیتگ انت اشانی ھرکسی وتی وتی انداز ے بیتگ اشانی کسہ سادائیں اخلاقی ءُ ادبی بیتگ انت ۔

ڈوریا ءِ  درستاں چہ کستریں کسی گش غلام قادر بابل بیتگ کہ مرچی  فجر نماز ءَ پد مئے میتگ ءِ درائیں میتگ ءِ مسیتاں آئی ءِ مرگ ءِ اعلان دئیگ بیتگ ۔ 

اللہ پاک غلام قادر ءَ بہشت ءَ بہ کنت ۔

 غلام قادر بابل ءِکسہ ئی مجلس مدام عصر ءِ نماز ءَ پد داں مغرب ءِ نماز ڈوریا تیاب ءَ لالو ھوٹل ءِ کاپر ءِ دیم ءَ برجم  بیتگ انت ۔ من درستاں ساری نیشتگ بابل ءِ وادر کتگ کدی نماز ھلاس بیت بابل بیئت ۔ 

بابل ءِ باروا مشہور بیتگ کہ اے کتابی کسہ کاریت ۔

بابل ءِ مستریں کسہ داستان ءِ امیر حمزہ طلسم ھوش ربا بیتگ کہ کساس داں سال  ءَ گیش دو گھنٹہ ءَ کمو گیش ڈوریا تیاب ءَ آرتگ ئے ۔

من ءَ کساس سالے بیت کہ من بابل ءَ گوں گوْنڈیں دیوانے کتگ ، دل ءَ بیت کہ یک روچے آئی ءِ ویڈیوے جوڑ کناں بلے منی نگیگی باز بیتگ انت یا کہ نزوری نہ زاناں ۔۔۔

بابل گوشیت کہ من چہ دین محمد دینُک ءِ پت ملا کریم بخش ءَ چہ کسہ اش کتگ۔ ملا کماشے بیتگ آئی ءَ  طلسم ھوش ربا ونتگ مئے دیما بلوچی ءَ بیان کتگ گڑا من یات کتگ ءُ پدا ڈوریا ءَ مردمانی دیما گوشتگ ۔ 

منی ناھدا ءَ وھدے گُشتگ کہ مرچی مغرب ءَ یا عشاءَ دریا ءَ روئیں من گشتگ کہ من گڑا مرچی نیایاں کہ من شپ ءَ رواں کسہ اش کناں ، بانگوا ءَ دریا ءَ رو ایں گڑا من کایاں ۔

بابل گوشیت کہ من وھدے کہ کسہ شروع کتگ گڑا درائیں کش ءُ گور ءِ مردم منی دیوان ءَ اتکگ انت ، منی کسہ اے دگرانی کسہاں چہ جتا ءُ وش تر بیتگ انت اے واستا کہ منی کسہ  طلسمی ءُ جادوئی داستان بیتگ انت ۔

 من اسلامی کسہ ھم گشتگ چو کہ حضرت موسیٰ ءُ فرعون ءِ کسہ ۔ 

منی ھیالاں بابل ءِ کسہانی یک وشیے اے بیتگ گوشداروکاں درائیں کارست پجہ آرتگ انت بابل ءَ  ھرچ کارست ءِ نام ءُ کردار ءُ آئی دروشم ھم گشتگ  گوں ۔ 

بادشاہ کیکباد ، ساحر ءُ  جادوگر آفراسیاب ء ھیرو، امیرحمزہ ءُ درستاں چہ وشتریں کردار جاسوس عمرو عیار بیتگ ۔

داستان امیر حمزہ  جنگی ، جاسوسی ، جادوئی ، مہم جوئی کسہ ے بیتگ انت ۔

بابل گوشیت کہ وھدے ٹی وی ، وی سی آر ءِ زمانگ اتکگ گڑا مئے کسہ ئی مجلسانی مردم کم بیان بیتگ انت ،بس گڑا کم کم ءَ اے مجلس ھم ھلاس بیان بیتگ انت بلے لہتیں مردم آنچیں ھم بیتگ انت کہ آھاں لوگ ءَ آتکگ ءُ من ءَ  منت کتگ کہ تو بیا پدا وتی مجلس ءَ بلے من  چارتگ کہ نہ بیت چیا کہ آ وھد ءَ مئے مجلسانی مردم پنجاہ شست ءَ گیش بیتگ انت ءُ پدا پنچ ءُ شش ءَ رستگ انت گڑا چون مجلس بیت ۔ 

آ زمانگ ءَ کسہ گش مردماں وتی لوگاں ھم برتگ اَنت زمستانی شپاں پہ کسہ آرگ ءَ ۔ کپتوکانی شِشگاناں ھم کسہ بیتگ ۔

وھد ءِ ھمرائی ءَ انچو کسہ ئی دیوان گلاس بیان بیت انت ھمے وڑا کسہ گش ھم چہ اے جہان ءَ روان بیان بیتگ انت داں مرچی مئے ڈوریا ءِ گڈی کسہ گش واجہ غلام قادر بابل ءَ اے جہان یلس کت ءُ آ جہان ءَ شت ۔

بہشت ءَ بات ئے تو منی استاد ۔

منتوار: گواددر ءُ ڈوریا