گُشان سرسوبی ءِ بیرک: بلوچ زالبولانی گھیگیری ءِ کاروان

جاوید بلوچ

چہ کوفہ ءَ زینب ءِ سروکی ءَ حسینی کاروان دیم پہ مدینہ ءَ کیت گڑا یزید ءِ زوراکی ءُ اہل کوفہ ءِ مناپکی دائمی راجدپتر ءِ دلبند ءَ نکش بیت۔ اے گوْستانک نہ ایوک ءَ یزید ءِ زوراکی ءُ ظلم ءِ نشاناں ایر کنت بلکیں کوفہ شھر ءِ مناپکی ءَ ھم۔ ءُ آؤکیں وھدانی واستہ اشی ءَ راجدپتر ءِ بھر کنت کہ حسین ءِ سربّرزی ءِ داستان ءَ جھان ءَ سر کنوک زینب ءِ واتر بوتگیں کاروان اِنت۔ 

باندہ ماہ رنگ ءِ کاروان اے دھر ءِ یزید ءِ بادشاھت ءَ چہ دیم پہ وتی ڈگار ءَ رھادگ بیت۔ اے کاروان ءِ ھمک گام وتی پُشت ءَ ھزاراں درد ءُ رنجانی پَداں ایر کنان، اے ائد ءِ یزید ءِ ظلم ءُ آئی ءِ عدالت، میڈیا ءُ جاھمنندانی مناپکی ءِ راستیں دروشم ءَ جھان ءَ پیش داران دیم پہ بلوچستان ءَ کیت۔ جھان ءِ راج داپتر ءَ بلوچ زالبولانی گھگیری ءِ نام ءَ گوں مھکمی ءَ نکش کنت۔ 

اے کاروان ءِ مستریں سرسوبی ھمیش اِنت کہ اشاں رَد نہ وارتگ ءُ پیداگ اَنت۔ بلوچ ءِ دل، مجگ ءُ شعور ءِ تہ ءَ زوراک ءِ زوراکی ءُ مناپکی ءِ اکس دنزین نہ بوتگ۔ ھمے اسلام آباد ءَ سرکاری سردارانی پاگ جھلاد بوتگ اَنت، آیاں پہ وزیری، زَر ءُ لب وتی پاگانی بستار دَور داتگ بلے بلوچ ءِ گُشان گھگیری ءِ بیرک بوتگ۔ اے زرمبشت ءَ بلوچ گیشتر مھکم کُتگ۔ بلوچ شعور ءِ حفاظت کُتگ۔

چیاکہ اسلام آباد چالاکی ءَ نامدار اِنت۔ اشیی ءِ ھُنر ءُ چالاکیاں بلوچ ءِ نامی ایں سرگ رَد داتگ انت ءُ چہ آیاں وتی دل ءِ تب ءِ کار گپتگ، پد ءَ پشومانی ءَ ابید ھچ نہ داتگ انت بلے اے شیرزالیں بلوچانی گور ءَ آئی ءِ ھچ ھُنر ھیلہ یاں کار نہ کُت۔ بلوچ زالبولانی اے کاروان ءَ بلوچ ءِ سِتک ءُ باور گیشتر مھکم کُتگ۔ ءُ ھمے سِتک ءُ شعور ءِ مھکمی اے کاروان ءِ سوبمندی اِنت۔