21 فروری ڈھاکہ داں جیمڑی (جیونی) ءَ ھون ریچی ءِ روچ

جاوید بلوچ

21 فروری ءِ روچ ڈھاکہ ءَ بگر داں جیونی ءَ ھون ریچی ءِ روچ اِنت۔ بانکیں یاسمین، ازگل ءُ گلام نبی ءِ تیراں سرپتگیں لاش بلوچ زِر ءِ دلبند ءَ ایر اَنت ءُ ڈھاکہ شھدربرجاہ ءِ دیم ءَ زبان پھازیں بنگالی ورناہ گوں ھوناں جان شوداں۔ مرچی جھان بنگالیانی ندریگاں یات کنگ ءَ اِنت۔ سرجمیں جھان ءَ ماتی زبانانی روچ اِنت۔ دومی نیمگ ءَ جیمڑی ءِ شھید تھنا ووٹ پنڈگ ءِ ھاتر ءَ پہ تران ءُ چاپ یات کنگ بنت۔ جیمڑی مرچی ھم تُنیگ اِنت۔

شھید یاسمین ءِ برات احسان محمدی 21 فروری 2019 ءَ گوادر پریس کلب ءَ بی ایس او ءِ برجم داشتگیں پُرسی مراگش ءَ تران کنت ءُ گُشیت

”جیونی ءِ نُک هُشک اِنت انگت ءَ 

نشتگاں کہ یاسمین آپ ءَ شُتہ 

بلوچ سیاسی پاٹیز اے روچ ءَ وڈ وڈیں مراگش برجم دارنت - آ دگہ گپے کہ پہ بلوچ مخلوق ءَ تیوگیں روچ 21 فروری اَنت 

   اگاں کسے بزانت 21 فروری زند لوٹگ ءُ زندگ بوگ ءِ جنگ اِنت - 

   جنگ کُجا ........... ؟ 

تو بُگش دزبندی یے، اگاں ما رد آں گڈاں سرجمیں کتاب ءُ سائنس گشیت پہ سہدار ءِ زندگ بوگ ءَ آپ هژدری اِنت - 

21 فروری یک انچیں تُن یے کہ انگت نہ پُرشتگ ءُ بہ گندئے اے وڈیں شہسوار من انگہ ندیستگ کہ 21 فروری ءِ تُن ءَ بہ پُروشیت ءُ اے وڈیں مراگش تُنّیگانی نازینگ ءَ برجم دارگ بنت - 

   منی چم نہ گند اَنت کہ اے مراگشانی تہا تن ءِ پُروشگ ءِ بوه است پرچہ کہ 32 سال ءَ چہ پد من ءَ دانکہ یات کنت همک 21 ‌فروری ءَ جیونی ءِ بازار گوں جنڈهاں بانور اِنت همے سیاسی پاٹیانی برکت ءَ یک روچگیں بانور جیونی پہ ترمپے آپ ءَ هینار اِنت 

چے گلگ بکناں ..... ؟ 

چے بُگش آں .......... ؟ “

1987 ءَ جیونی شھر ءَ بی ایس او ءِ چیردستی ءَ پہ ترنپے آپ ءِ لوٹ ءَ زھرشانی روانکے در کیت۔ سرکاری کارمند چو ڈھاکہ ءِ وڑ ءَ وتی توپکانی دپاں پچ کن اَنت۔ بلوچ زِر ءِ لمب ءَ آبادیں جیمڑی ءِ تُنیگیں شھر وَ پیسر ءَ کربلا ءِ جاوراں بیت بلے اے روچ ءَ کربلا ءُ ڈھاکہ ھردو جیمڑی ءَ ھور بنت۔ بازیں مردم ٹپی بنت۔ ریاستی زوراکی ءِ ھال گْوادر ءُ مکُران ءِ کُنڈ کُنڈ ءَ شنگ بیت۔ گْوادر ءِ شھر چہ دستاں درکیت۔ ریاستی زوراکی ءِ بگیری ءَ مردم زھرشانی کن انت۔ بلے وائے بلوچ ءِ بدبھتی

بقول شاعر

”دست مان انت مئے جند ئے پہ بربادی ءُ در پہ در بوھگ ءَ“

اے ھون ریچی ءُ ھون شانی پہ بلوچ ووٹ زوراں یک نوکیں موقع پرستی یے بیت۔ ھمیشی ءِ سر ءَ نوکیں تران ءُ اوگام جوڑ بنت۔ بی ایس او ءِ طاقت پروشت ءُ پروش ءِ آماچ بیت۔ ءُ بلوچ ءِ جاور انگت ھما اَنت۔۔۔۔