کمانچر بلوچ ءَ دائمی سپر کُت۔
گلام سرور پنام کمانچر بلوچ کہ آ 1998 ءَ واجہ انور جیئند ءِ لوگ ءَ ماں میران گوٹھ ملیر ءَ ودی بوتگ۔ بُنکی چہ جلال آباد مَھیر مند ءِ بوتگ۔
کمانچر بلوچ ءَ وتی بُنکی وانگ ءُ زانگ وتی ھند ءَ مند ءَ سرجم کُتگ ءَ پدا ماں کراچی ءِ شہر ءَ بینظیر بھٹو شہید شہدربرجاہ لیاری ءَ انگلش لِٹریچر وانگ ءَ اَت کہ مدام بلوچستان ءِ زیبائی ءَ اکس ءِ دروشم ءَ بلوچ راج ءَ سوگات کنگ اَت، ھمے تچ ءُ تاگانی ءُ بلوچستان ءِ ندارگانی پیش دارگ ءَ انچوش ایر بُک اِتگ اَت کہ وتی وانگے سرجم کُت نہ کُت.
کمانچر بلوچ ءَ 2020 ءَ بے نظیر بھٹو شہید یونیورسٹی ءَ ماں انگلش ڈپارٹمنٹ ءَ وتی بی ایس ءِ وانگ بندات کُت ءُ اولی سال ءَ گوں بی ایس سی لیاری ءَ بندوک بوت ءُ کورڈینیٹر ءِ ذمہ واری یے وتی کوپگ ءَ زُرت ءُ شریں رنگے ءَ کارے کُت.
بی ایس ءَ دو سال وانگ ءَ پد بلوچستان ءِ سپراں گوں وتی چکاسے ھم دات نہ کُتاں ءُ دو سالے وانگ ءَ پد وتی وانگے یلہ دات.
کمانچر بلوچ کہ مدام سپر ءَ اَت ءُ آئی ءِ واھگ تھنا ھمیش اَت کہ من بلوچستان ءِ زیبائی، بزّگی ءُ ھرچ ھما ساھدار کہ بلوچستاں ءَ زندگی کنگ ءَ اِنت من آیاں وتی کیمرہ ءِ تہا ایر بہ گیجاں۔
کمانچر بلوچ ءَ شرو ءَ Nokia 6720 مباھلے ءَ چہ اکسکاری بندات کُتگ۔
کمانچر بلوچ ءَ اوّلی اکس کہ سوشل میڈیا ءَ دیم داتگ مردماں دوست داشتگ، آ اکس آئی یے میتگ ءِ اکسے بوتگ پرچا کہ بندات چہ آئی ءَ وتی میتگ ءَ کُتگ۔
کمانچر بلوچ ءِ اکسانی تہا گیشتر بلوچستان ءِ دَرچک ءُ دار، پُل، تَل، کئور، شیپ ءُ دلکشّیں زید ءُ کہچر ندارَگ اَنت۔
دومی نیمگ ءَ دِرتہ پُچّیں راج ءِ بزّگی اِنت۔ پاد شپادیں زَھگ اَنت چہ وانگ ءُ زانگ ءَ پشت کپتگیں ورنا اَنت۔ نیزگار ءُ تنگدستیں کماش اَنت کہ پہ چُنڈے نان ءَ در پہ در اَنت۔
آئیءَ اکسکاری کہ بندات کُتگ گڑا وتی اولی اکس آئی ءَ سوشل میڈیا ءَ 2008 ءَ پیسبُک ءَ ایر کُتگ۔
آئی ءِ ھمے کار مردماں دوست بوتگ ھمے اکس مردماں دوست داشتگ اَنت۔ آئی ءِ کار کَنگ ءِ وڈ ءُ پیم مردماں دوست داشتگ۔
مردمانی دوست دارگ ءُ دلبڈّیاں چے آئی ءِ ھُب ءُ واھگ گیشتر وَدّ اِتگ۔ زند ءِ ھر پڑا گوں سیادی داروکیں مردماں وانِندہ ، نا وانِندہ ، گشندہ ، شائر ، ادیب ، ءُ لبزانتاں شرّیں وَڑے ءَ آئی را ءَ ساڑاتگ۔ ایشانی تہا بازینے ءَ کمانچر ءِ جند ءِ ءُ آئی ءِ اِزم ءِ سرا نبشتہ ھم کُتگ کہ آئیءِ ریکارڈ ءَ ایر اَنت،
2008 ءَ بِگر داں 2015 ءَ کمانچر بلوچ ءَ مباھل ءِ سرا اکس کشّی کتگ۔
کمانچر بلوچءِ گور ءَ کہ اکسانی ریکارڈ سرجمیں گپتگیں اکس کساس 8 ھزار ءَ چہ گیش اَنت کہ درست بلوچستان ئیگ اَنت۔ اے اکسانی تہا بلوچستان ءِ بازیں ھَند ءُ دَمگانی اکس ھوار اَنت ۔
کمانچر ءَ وتی تَب ءِ ندارگ بلوچستان ءِ ھَر کُنڈ ءَ کہ دست کپتگ اَنت. آئی ءَ وتی کیمرہے تہا کید کُتگ اَنت۔ آئی ءِ کش اِتگیں بازیں اکس اُستمانی کتاب، تاکبند، نیوزکاسٹنگ ایجنسی ءُ میان استمانی ادارہاں کارمرز کُتگ اَنت۔
کمانچر بلوچءَ بازیں جاہاں وتی اکسانی نمائش کتگ، اشانی تہا ملیر کراچی، کوئٹہ، گوادر ءُ تربت ھوار اَنت۔
کمانچر بلوچ ناں تھنا یک یک اکس کارے بوتگ بلکیں یک بلائیں راجی کردے بوتگ کہ آئی ءِ کسانیں مدتے یے کار پہ بلوچ راج ءُ بلوچ ءِ زمین ءَ یک گوھر کیمتی ءَ کم نہ اِنت۔
کمانچر بلوچ ءِ وڈیں کارست ہزاراں سالاں پد پیداک بنت ءُ ھاموشی ءَ وتی کِرد ءَ شریں رنگے ءَ پیلو کن انت ءُ سَپَر کن اَنت۔
بازیں مُدتے یے نادرہی ءَ پَد کمانچر بلوچ شومیں شَکَر، ءُ میدہ ءَ سک باز تاوان دات ءُ آئی ءَ یک مائے ءَ نادرہ جاہ ءَ درد کش اِت ءُ مرچی 16 اپریل 2024 ءَ اے کوڈھیں دنیا یلا دات ءُ پہ دائمی شُت ءُ بلوچستان ءِ اکسانی تہا زندگ بوت۔
ما کمانچر بلوچ ءِ اناگتیں مرگ ءَ سک کُھتیگ اِنت ءُ آئی ءِ لوگ ءِ مردمانی گماں شریدار اِنت۔ دوا اِنت کہ واجہ ھُدا ناکو کمانچر ءَ بھشت ءِ سارتیں ساھگاں جاہ بہ دنت۔ انچوش بات
منتوار : بلوچ اسٹوڈنٹس کونسل لیاری
No comments:
Post a Comment