بلوچستان ءِ پجار انت، بلوچستان ءِ۔۔۔۔

نبشتہ کار: جاوید بلوچ

گْوادر یک تیاب دپی شھرے، ازم، لبزانک ءُ ھُنر  ءَ سرچکاریں زمینے۔ اد ءِ مردم گوں ازم ءُ لبزانک ءَ مھر داروک انت۔ بلے ادا زالبولانی واستا ائید ءِ دومی روچ ءَ باتیل ءِ کوہ ءَ میڑہ ءِ رزا نیست۔ نی تو ھئیران بئے کہ اے چونیں گپے کہ لبزانک، ازم  ءُ ھُنر ءِ شھر ءَ زالبولانی واستا میڑہ  ءِ رزا نیست، اے وَ انتہاپسندی یے۔ گڑا گْوادر ءِ مردم انتہا پسند اَنت؟ اِناں۔ گڑا میڑہ بوت؟ انّاں۔ 

ھما مردم کہ میڑہ ءِ بگیری ءَ اَنت، آ چنچوک اَنت؟ کے انت؟  ءُ آیانی لاجک چی انت؟

آ کساس دو درزن مُلا اَنت۔ آ گُش انت کہ آ چہ، آ دگہ سے لک مردماں گیش بلوچ ءُ اسلام ءِ نمائندگ اَنت، چُشکہ آ میڑہ ءَ نہ رو اَنت پمشکہ زالبولانی میڑہ ءِ چارگ کُفرے، اے بلوچ ءُ اسلامی ربیتانی بگیری ءَ اِنت، پمشکہ اشیی ءِ رزا دیگ مہ بیت۔ چُشیں ھرچ کارے ءِ کنگ ءَ پیسر آ جُست کنگ بہ بنت اگاں آیاں دوست نہ بوت۔ گڑا ھچ وڑ ءَ مہ بیت۔

“مکُران یک سیکولر دمگے، ادا مذھبی آجوھی ھست، ادا مردین  ءُ جنیاں یکیں ھساب ءَ وانگ ءِ رزا ھست۔ مکُران ءِ مردم وانندہ اَنت۔ مکُران بلوچ سیاست، لبزانک ءُ دیمرھی دوستی  ءِ چیدگ انت۔ بلے پَنجگُور، بلیدہ  ءُ کیچ  ءِ بازیں دمگاں جنکانی اسکول  ءِ پچ کنگ ءِ رزا نیست، اگاں کسے ءَ پچ کُت گڑا سوچگ بنت۔ سوچوک کے اَنت؟ چنچوک انت ءُ چے گُش انت؟ لھتیں ٹولی انت، آ گُش انت آ گیشتر بلوچ ءِ نماھندگ انت ءُ آیاں وش نہ بیت کہ بلوچ جنک انگریزی بہ وان انت پمشکہ آ اے چیز ءِ رزا دات نہ کن انت۔  ءُ اگاں مکُران ءَ کسے ءَ مذھب  ءِ سر ءَ گپے کُت(اگاں گپ دروگے ھم بہ بیت) آ توری بلے وانندہ ایں ورناہ یے بیت آ سرعام کُشگ بیت۔ 

بلوچ یک سیکولرے راجے، ادا مردین  ءُ زالبول ءِ ارزشت یک انت۔ گوں ادب ءُ لبزانک ءَ مھر داریت۔ پمشکہ تُربَت ءَ بلوچستان سرکار  ءِ کروڈانی زر ءِ کمک ءَ برجم بوتگیں اتا شاد لبزانکی مراگاہ  ءَ پنجاہ لک  ءُ گْوادر ءَ سرکار ءِ کمکی فنڈ ءَ برجم بوتگیں لبزانکی مراگاہ  ءَ سی لکھ  ءِ کتاب زور ایت بلے اگاں شال  ءَ کسے ھمے مراگاہ  ءَ شُت آ لالچی ءُ غدارے۔ اگاں آ، اے آر داد بیت شر یا سرفراز  بگٹی بہ بیت شر، دو ایں یک لیکگ بنت۔ البتہ گْوادر ءُ کیچ ءِ مراگشانی بنداتی پیتاں ھم ایف سی ءِ میجرے بُریت پرک نہ کنت۔ 

گْوادر، مکُران ءُ بلوچستان ءِ پجار ھمے ٹولی بوت کناں کہ اگاں آیانی رزا  ءَ ابید کارے کنگ بہ بیت آ پہ دھمکی، بیھار، تُرسینگ  ءُ کُشگ آ کار ءَ داشت کناں بلے بلوچستان ءِ یوٹیوبر بوت نہ کناں۔  ءُ اے شاعر ءَ کئی کرا اے رزا گپتگ کہ اے وڑیں شعر لک ایت؟ اے گُشندیاں بلوچستان  ءِ لوگ لوگ ٹُک اِتگ؟ یا ھر بلوچ ءِ سوشل میڈیا اکاؤنٹ  ءَ میسج داتگ  ءُ جُست کُتگ کہ کجام سوت ءَ بہ جناں  ءُ کجامی ءَ انّاں؟ 

یک لبزے ھست آئی  ءَ گُش انت ”انتہا پسندی“ اے نادراھی  ءِ آماچ چاگرد ءِ گیشتر ھما مردم بنت کہ پہ وت ءَ اسپیس پٹّگ ءَ دھمکی، بیھار یا مرچاں آن لائن ٹرولنگ ءِ سہارہ  ءَ زور انت۔ اشانی وتی کرد ھچ نیست۔ اے وت ھچ کُت نہ کناں، پمشکہ اشانی سوبمندی دگر  ءَ چیزے کنگ  ءَ دارگ انت۔ اے چندیں ٹولی انت، گیشتر کرپٹ، دُز، سفارشی  ءُ ذھنی نادراہ اَنت۔ اے وتی زور  ءُ زبردستی  ءِ لیکہ ءَ راجی لیکہ یا اکثریتی لیکہ ثابت کنگ ءِ واستا کُکار کن انت، دھمکی دینت، سرٹیفکٹ دینت اگاں اشانی ٹولی  ءَ چیروکاھی مزنیں طاقتے کمک بہ کنت اے مردم ءِ کُشگ  ءَ ھم آسرہ نہ کن انت۔

اے انتہا پسندیں ٹولی بے برداشت، مذھب یا راجے  ءِ وسر  ءُ وتگڑیں ٹیکھدار بنت۔ اے اگاں ھمے گپّاں ساکمی  ءُ لاجک، دلیل  ءُ انسانانی وڑ  ءَ شھید فدا چار راہ یا شھدائے جیمڑی چار راہ  ءَ بہ کناں اشانی گوشدارگ  ءَ ھمیشانی وتی درزنے مردم ھم نئیت پمشکہ اے دگرانی ھیالانی دارگ، زبان بندی  ءُ وتی وڑ ءَ پہ زور جیڑگ پرمائگ  ءَ سینسرشپ جن انت۔ اے کرپٹیں ٹولی ھر وھد  ءَ وت بے دلیل، بے لاجک، کرپٹ، دو تل  ءُ دو پوست بنت،

 ھو اشانی تہ  ءَ یک سکّیں کسانیں ٹولی یے سادگیں مردمانی بیت کہ آ تھنا کُکار ءُ شور  ءِ پُشت  ءَ تچوک بنت۔ 

اے انتہا پسندیں ٹولی ءِ جُنز تھنا لھتیں روچانی بنت۔ بلے اگاں اے وتی انتہا پسندی  ءَ سوبین بوت آں گڑا وت ءَ وت سلیبریٹ کناں، اے وَ سکیں کسانیں ”فتویٰ“ یے کہ بلوچستان  ءِ پجار بلوچستان ءِ یوٹیوبر نہ انت، اے پد ءَ دیمتر ءَ اے کن انت کہ کے وتی نام ءِ دیم ءَ بلوچ نبشتہ کُت کنت ءُ کے نہ کنت۔۔۔۔۔ اے انتہا پسندیں ٹولی ھمے سوت ءِ بگیری ءَ تھنا اے بکن انت کہ یک شعرے نبشتہ بہ کناں کہ ”بلوچستان  ءِ پجار بلوچستان ءِ یوٹیوبر نہ اَنت“ پد ءَ امینچو گُشدہ آیانی سوت  ءَ بہ جنت۔ گپ  ءِ جند ھلاس بلے چُش کنگ  ءَ کار لوٹیت۔ کار گران انت بلے وکّگ ارزان۔ 

ہاں البتہ ادا یک گپے اِش کہ اگاں یوٹیوبرے بیت شر، یا اھوالکار، گُشندہ، راجکار  ءُ لس مردمے بیت شر، اگاں آ یک کارے گوں دل ءِ ستک پرے ھاتر ءَ کنگ ءَ انت کہ آئی  ءِ شوک انت، گڑا تھنا ھما کار ءَ بہ کنت۔ آ کار ءَ مہ کنت کہ مشہور وَ بیت، زر ئے ھم رسیت، وش وشیں دبوج  پارٹی  ءُ اسپنسر ٹرپ ءُ ٹور ھم جنت بلے پد ءَ آئی ءَ وضاحت دیگ بہ کپت کہ من بلوچستان ءِ پجار آں۔۔۔۔۔

من  ءَ ذاتی دروشم  ءَ ودار انت کہ ھمے سوت بئیت، منی نزّ  ءَ  اے سوت اینچو نامی ایں بلوچ گُشندیاں جَتَگ شوکیں چیزے بیت۔۔۔۔ چہ اشیی ءِ آیگ  ءَ ناں بلوچستان ءِ یوٹیوبرانی پُنز بُرز بیت ناں آ چہ بلوچیت  ءَ کشگ بنت۔ اے انتہا پسندیں ٹولیانی ٹرولنگ، سینسر جَنَگ، سرٹیفکٹ  ءُ بلوچستان  ءِ وتگڑیں ٹیکھداری کنگ  ءِ حق پچگرگ بیت۔