محمد حنیف، بی بی سی اردو 01 جون 2024
رجانک: تاج بلوچ
مردم که پیر بیت، کَسانی ءَ کتگیں رَدیاں هم انچو چاریت پورا بلاهیں کارنامَهے اَنجام ئےِ داتگ. نامداریں اَداکار، سَداکار، ءُ اُستاد واجه طلعت حُسین ءِ بیرانی ءَ رند آئی ءِ زند ءُ اِزم ءِ سرا بوتگیں نبشته که ونتنت، منا وتی ورنائی ءِ دؤر ءِ کراچی یاد اَتک.
من تاکّاری چه شؤبِز ءِ هؤالکاری ءَ شرو کُتگ، ءُ آ زَمانگ ءَ شؤبِز تهنا ٹی وی ڈرامه اَتنت، یا سالے یک ءُ دو رندا بࢨوکیں اِسٹیج ڈرامه. ڈرامهانی سرا وتی دانِشوَری کنگی اَت، ءُ پدا اَداکار ءُ ڈائرِکٹر انٹرو کنگی اَتنت.
اسٹوڈنٹی ءِ زمانگ ءَ لهتیں کتاب وَنتگ اَت ءُ دُنیا ءِ دو چار نبشته کار ءِ نام اِشکتگ اَت. آ زمانگ ءَ په دانِشور بوّگا همینچو بَسّ اَت. من ایڈیٹر مشؤره دات که شؤبِز ءِ مردمانی، کتابانی بارؤا اِنٹروانی سیریزے کنگی اِنت.
ایڈیٹرءَ جَت ٹوٹلے ءُ گُشی واجه طلعت حُسین باز کتاب وانیت. وتی لائبریری ءِ هم مُدام نام ءَ گیپت. چه همائی ءَ شرو کن.
منی زندگی ءِ منزل اَت که من شؤبِز ءِ پُلنگیں اهوالکارے بباں، بلے من ٹی وی ءِ چارَگا چو شؤک شؤک نه اَتاں، ءُ منا گوں مشوریں اداکاراں هبر کنگ تُرسِت. یک اِنٹرویے ءَ مُعین اختر ءِ دست ءَ من هبر هم وارتگ اَت. من جُست کت که ترا وتی پوشاک ءِ هࢨال سَکّ گوَر اِنت، گرانیں سوٹ گوَرا کنئے. گُشی بادشاهی پوشاک پوشئے، باتِن ءَ وتا بادشاهے مارئے، ءُ پدا منی ململیں پَشک ءُ شلوارانی نیمگا چارِت ئےِ، گُشی پنڈوکی پوشاک پوشئے، باتِن ءَ وتا پِنڈوکے مارئے.
من ایڈیٹر جُست کت که واجه طلعت چونیں مردمے؟ آئی ءَ منی دل جم کت که سَکّیں شریفیں اِنسانے. جَت مَن پْریشتَگے. من ایڈیٹر هال دات که اَسلی کراچی ءَ، چه شؤبِز ءَ ڈَنّ ءِ کراچی ءَ، شریف ءِ مانا دگرے.
کراچی آ وهدی الطاف حسین والا اَسلی ایم کیو ایم ءِ دست ءَ اَت. بچکّاں راهِ رؤاجی ترا اوشارینت ءُ موٹرسࢨکل ءِ چابی در کتنت. تانکه تؤ ”جیئے مهاجر“ ءُ پدا چه دل ءِ جُهلانکی ءَ ”جیئے مهاجر“ءِ ناره نجَت، چابی اِش نداتنت.
ایم کیو ایم ءَ وتی کَمانڈ ءُ کنٹرول ءِ نِزام پؤج ءِ نِزام ءِ پࢨما جوڑ کتگ اَت، سࢨکٹر کمانڈر ءُ یونِٹ اِنچارج اِش هست اَت، بلے کراچی ءِ چُکّ زانَگا اَتنت که کئی لاش گونی ءَ بیت ءُ کࢨت، ءُ کئی کونڈ درُشگ بنت. اے پࢨسله دگه جاگهے بوّگا اَتنت ءُ مردماں همیشان ءَ ، باز ءَ په مَسکرا ءُ باز ءَ چه تُرس ءَ ”شریف کمیٹی“ گُشت. اے کمیٹی هر سࢨکٹر ءُ هر یونِٹ ءَ هست اَت.
ایڈیٹر ءَ منا دلے لاپ ءَ دات که واجه طلعت اے کِسم ءِ شریفیں مردمے نه اِنت، سَکّیں گَریب و نا آزارے.
طلعت ءِ اِنٹرو، آئی ءِ لوگ ءِ لائبریری ءَ بوت. بندات چه هما کوَهنیں سوال ءَ، که تئی پسندیده نبشته کار کئے اِنت؟ گُشی کُجام زُبان ءِ نبشته کارانی تها؟
منی ونتگین کتاب اردو ءَ چار دانَگ اَتنت ءُ اِنگریزی ءَ شَش. من سر اے دیم ءُ آ دیما تاب دات ءُ جُست کت که، متلب، مرچاں چے وانَگا ئے؟ مِهرَبانیں گالوارے ءَ گُشی مرچاں فرانسی ناوَل نگارے وانَگا آں. تؤ کئے وَنته؟ منا تهنا البرٹ کامیو ءِ نام یاد اَت، من گِپت. سَکّیں شَرّیں نبشته کارے، بلے تؤ باید اِنت آندرے گائیڈ ءَ بوانئے. پاد اَتک ءُ چه شࢨلف ءَ کتابے در کت ءُ پیش ئےِ داشت.
نوں اے انٹرو کلاسے بوت. منا گُشت ئےِ گوں که مَگرب ءِ ادبی تهریک، افریکی ادب ءُ لاطینی امریکه ءِ لبزانک چیا فیشن ءَ اَنت. سجّهیں انٹرو ءَ منا، منی ناوانِندگی ءِ اهساس ئےِ ندات، ءُ من هَم دمانُکے ءَ رند وتی ادب پرستی ءِ ناٹک بند کت، ءُ انچو که نبشتهکارے ءِ نام ئےِ گِپت یا ادبی گالبندے گُشت ئےِ، من چو مِهنَتی ئیں اسٹوڈنٹے ءِ پࢨما دلگوش گوَر کت. 90 منٹ ءِ اے انٹرو ءَ منی همینچو ادبی تربیت بوت که کالج ءَ وانَگ ءِ دراهیں زمانگ ءَ نبوتگ اَت. شؤبِز ءِ مردماں، وانَگ ءِ بارؤا انٹرو کنگ ءِ دراهیں سلسله چه همدا شرو بوت ءُ همدا هلاس.
انٹرو ءِ وهدا من هࢨران اَتاں که چُشیں مشوریں اَداکارے، اے آخر اینچو کتاب چیا وانیت؟ من جُست کت که تؤ وت نبشته هم کنئے؟ کَمّے په نادلکَشّی گُشی که من ناوَلے ءِ سرا کار شرو کته، بلے تنینگه اِشی ءِ ریسرچ ءِ سرا کار ءَ آں. من نَزانتگ اَت که په ناوَلے ءِ نبشته کنگا هم ریسرچے لوٹیت. چونیں ریسرچ؟
گُشی ناوَل ءِ مستریں کارست سرمَد اِنت، نوں، من آ دؤر ءِ مختلفیں مزهَبانی تها سوفی اِزم ءِ تهریکاں وانَگا آں. منی هࢨرانی ئےِ شُبه کُت، گُشی سوفی تهنا اِسلام ءَ پیدا نبوته، مسیهی ءُ یهودی سوفی هم هست.
واجه طلعت حُسین ءَ اے دگه سنگتانی کرّا هم نام گِپته که کتابے ءِ سرا کار ءَ آں. مئے نبشته کاریں سنگتے مُدام مارا نسیهَت کنت که چِد ءُ پیسر که تئی سرا کتاب نبشته کنگ ببیت، کتاب نبشته کن.
واجه طلعت، چه شریفانی هما پدریچ ءَ اَت که گُشی پیسرا مردم کَمّے وانیت، نبشته رندا کنت.
No comments:
Post a Comment