کُنٹانی یک ٹٹ اِتگیں بُن گپے

نبشتہ کار: جاوید بلوچ

یکیں وھد ءَ کُنٹانی یک نیوز ٹرنڈے ھم ءُ یک رازے ھم۔ کنٹانی پہ ریسرچ  ءَ کسانیں کساسے ءَ بلوچستان ءُ مزنیں کساسے ءَ اے ریجن بزاں میان ایشیاء  ءُ زرباری ایشاء  ءِ میان ءَ لینڈ لاک دمگاں بگر داں جُھل  ءُ گرمیں آپانی دمگاں  سرپد بوھگ ءِ ھاتر ءَ یک کیس اسٹیڈی یے۔ اگاں کُنٹانی  ءَ  سرپد بوت ئے گڑا اے دمگ ءِ تہ ءَ جھانی سُپر پاورانی انٹرسٹ، شَپُکی ءِ کار، سی پیک، دمگ ءِ سیاست، مڈل ایسٹ  ءُ کرایہ والا مُلکانی پہ مزنیں پاوراں دائم ساڑی بوھگ ءِ سیاست سمج  ءَ کاینت۔ بلے ھئیر آ کسہ سر ءَ سک دور ءُ دراج کشیت، بیا اے زانیں کہ کُنٹانی یکیں وھد ءَ چتور یک رازے ھم ءُ یک ٹرینڈے ھم؟

رازے پرے ھاتر ءَ کہ کُنٹانی  ءِ بابت ءَ لھتیں مردمانی گُشگ ھمیش انت چُشکہ اے کار چیروکائی  ءُ بے کانودی بوھگ ءَ اِنت پمشکہ کنٹانی  ءَ اگاں ھر وڈیں زِری تاوانے بیت یاکہ ڈن  ءَ دگ کزاہ یے، سرکاری رشوت ءُ بھتہ  ءِ جیڑہ یا تیل کشوکیں گاڑیانی ھمروچی ایں ایکسیڈنٹ۔ ھچ گُشگی نہ انت کہ چر ایشیی ءَ اے کار ءِ بند کنگ ءِ امکان پیداگ بیت  ءُ اے کار ءِ بندی پہ بلوچ ءَ تاوانے۔ پرچاکہ سدانی کساس بلوچ چہ ھمے کار ءَ لاپ گِرگ  ءُ ورگ ءَ اَنت۔

دومی نمیگ ءَ کُنٹانی یک نیوز ٹرینڈے۔ ھمک دو روچ ءَ پد ادا کھوسٹ گارڈ  ءِ دست ءَ یا بلوچے لٹ ورگ ءَ اِنت یا کّکڑ کنگ ءُ سزا دیگ بئیگ ءَ اِنت۔ ھمے لٹ ورگ ءِ ویڈیو ءِ جوڑ کنوک ھم پد ءَ ھمے بلوچ انت کہ گُشیت باھد کُنٹانی ءِ ویڈیو  ءُ ھال شنگ کنگ مہ بنت کہ اے کار ءَ تاوان دنت۔ کُنٹانی گْوادر ءِ سیاست ءِ ھم بنّام تریں  ءُ ارزان تریں سرھالے جوڑ بوتگ۔ 

کُنٹانی  ءِ بابت ءَ گُشگ بیت کہ اے بے کانودی کارے بلے اشیی ءِ پچ  ءُ بندی ءِ نوٹیفکشن چہ سرکار ءِ نیم ءَ کیت۔۔۔۔ کُنٹانی ءَ کار کنوکیں سیٹھ میر حمل کلمتی ءِ مردم انت  ءُ پوریاگر  ءُ ڈرائیور مولانا ہدایت الرحمن ءِ ۔ کُنٹانی یک انچیں ٹَٹ اِتگیں  ءُ مان گیش اِتگیں جیڑہ یے کہ گْوادر ءِ لس مھلوک گُشیت کُنٹانی  ءِ تیل ڈن ءَ مہ روت دانکہ ضلع ءِ تہ ءَ تیل ارزان بہ بیت بلے کُنٹانی  ءَ کار کنوکیں سیٹھ گُش انت چُش آیاں نقصان انت اگاں تیل دیم  ءَ مہ روت گڑا ریٹ کپیت۔ گْوادر داں کراچی ءَ کوسٹل ہائی وے ءَ درزنانی ھساب ءَ چیک پوسٹ روچے کروڈانی زَر بھتہ  ءِ ھساب ءَ گِر انت، اے ھم وش انت کہ تیل بہ روت بلے بسانی تہ  ءَ سپر کنوکیں مساپر گُش انت تیل کشگ مہ بیت۔

ھندی پیک اپ گاڑی والا گُش انت کُنٹانی داں گْوادر تیل کشگ ءَ زمباد میا اَنت چیاکہ پک اپ ءِ دو ٹرپ ءَ زمباد یکیں ٹرپ ءَ بارت بلے زمباد  ءُ کُنٹانی ءِ سیٹھانی واستہ زمباد پائدہ اَنت۔ کُنٹانی  ءِ سیٹھ حمل کلمتی  ءِ منوگر انت  ءُ آیانی رِد ءَ حمل  ءِ تعلقات گوں کھوسٹ گارڈ ءُ واکداراں شرتر انت پمشکہ کُنٹانی ءِ نام ءَ سیاست ءِ نپ حمل کلمتی ءَ  ءُ قدوس بزنجو ءَ بہ رسیت بلے پک اپ ڈرائیور  ءُ کسانیں کائک والا گُشاں انّاں مولانا ھدایت الرحمن شرتر انت پمشکہ کُنٹانی  ءِ نام ءَ سیاست ءِ نپ مولانا ءَ بہ رسیت چیاکہ مولانا اگاں آیانی یک کائکے یا پک اپے گرگ بیت روڈ ءِ سر ءَ کیت دھرنہ دنت، کُکار کنت، زھرشانی کنت  ءُ گاڑی یا کائک  ءَ کشیت بلے حمل چُش کُت نہ کنت۔ کنٹانی ءِ سیٹھ حمل کلمتی ءَ الیکشن کمپیئن  ءَ کروڈانی زر ءِ کمک کن انت ءُ وتی وتی پولنگ اسٹیشناں کٹائین انت بلے کسانیں کائک  ءُ پک اپ والا مولانا ءِ دو دو ماہ ءِ دھرنہ یاں ٹک ٹاک اسپونسر کناں، الیکشن  یا روانک  ءُ زھرشانیانی وھد ءَ یومن رسورسز بزاں مردم  ءُ پک اپ ٹیک ٹاک کار انت۔ مسئلہ اِش انت کہ کُنٹانی  ءِ سیٹھانی کرّ ءَ سیاست ءِ واستا زر وَ کروڈاں بلکیں اربانی کساس ءَ ھست بلے مردمی تعداد جھل  ءِ کسانیں کار کنوک  ءُ پیک اپ والایانی کر ءَ اِنت۔ بُرزی تعلقات خاص کھوسٹ گارڈ ءِ گوم سیٹھانی شر انت، اگاں لھتیں روچاں کُنٹانی بند ھم بہ بیت بلے سیٹھانی تیل جیونی، دران دانکہ پدی زِر ءَ ھم گوں کھوسٹ گارڈ ءَ لین ءِ ھساب ءَ  لائینگ بنت بلے ڈاہ  ءُ شور، زھرشانی  ءُ کُکار چہ کسانیں کائک والایانی  ءُ جھل  ءِ طبقہ  ءِ بزاں پوریاگر  ءُ ڈرائیور، جانشو  ءُ ناھدایانی نیم گیشتر بیت پمشکہ کھوسٹ بیت شر ضلعی انتظامیہ شر، ھر دو ایں چہ عوامی زھرشانی ءَ تُرس انت۔ 

کُنٹانی ءِ بند  ءُ پچ، پچ  ءُ بند، ھمے وڑ ءَ برے جھل  ءُ برے بُرز کُنٹانی  ءِ سیٹھ، ضلعی انتظامیہ، کھوسٹ گارڈ، حق دو تحریک ءُ حمل کلمتی ءِ واستا پائدگ انت بلے چہ اشیی ءَ کسانیں پوریاگر  ءُ پک اپ والایاں تاوان انت بلے اے دگّانی سر ءَ سپر کنوکانی واستہ پد ءَ ھراب نہ انت۔ 

کُنٹانی، کاروبار  ءَ بگر داں سیاست ءِ بھرے جوڑ بوتگ۔ اشیی ءِ  دائمی بند بوھگ ایران، پاکستان، کُنٹانی  ءِ سیٹھ، گْوادر ءِ سیاست  ءُ بازیں پوریاگرانی واستا تاوان اِنت۔ چہ کُنٹانی  ءِ سبب ءَ جیونی ءَ بگر داں ھب چوکی  ءَ روچے کروڈانی زر سرکاری ادارگاں بھتہ  ءِ دروشم ءَ رسیت، سرکاری گاڑیانی تیل، پوج  ءِ گشت دُرس چہ ھمد ءَ پورا بنت۔ روچے سیٹھانی کروڈانی کاروبار بیت، ڈرائیور  ءُ پوریاگر لاپ گِر انت۔  ءُ گْوادر ءِ سیاست ھم چلیت۔ کُنٹانی ءَ بازیں دریاورد ھم برسرِ روزگار کُتگ انت، ھماکہ ٹرالراں دلسیاہ کُتگ بوتگ اَنت۔ چر ایشیی ءَ واڑوانی کار ءِ ربیت وَ کم کم ءَ گار بوان اِنت بلے کائک  ءَ سپر ارزان کُتگ۔ چہ سی پیک پروجیکٹ ءَ ھزارانی کساس سرکاری روزگار دیگ  ءِ حق چہ بلوچ ءَ پچ گپتگ بلے بازیں بلوچے ءَ روزگار ھم داتگ ۔ بلوچ زِر  ءَ نشہ ءِ  باپار ءِ روٹ ارزان بوتگ بلے تیل  ءِ آسراتی مرچی ھرچ سد فُٹ ءِ سر ءَ رسیت۔ ڈی جی خان داں بندر عباس بلوچستان  ءِ جار جنوک  ءَ مرچی لاشعوری یا مجبوری ءِ دروشم  ءَ اے من اِتگ کہ ”اس سرحد پر بلوچ صدیوں سے کاروبار کرتا آرہا ہے اور یہ بلوچ کا اقوام متحدہ کے اصولوں کے مطابق بارڈر ٹریڈ ہے“ ۔ 

کُنٹانی ھما راز انت کہ اشیی ءِ تامُر ترا ٹک ٹاک  ءَ گیشتر رَس انت، ھما غیر قانونی کار انت کہ اشیی ءِ نوٹیفکشن چہ سرکار ءِ نیم ءَ کیت، ھما بزگیں بلوچ ءِ لاپ انت کہ اشیی ءِ بند کنگ  ءُ تیل ءِ اسٹور کنگ ءَ سیٹھ وت اشیی ءَ بند کنائین اَنت  ءُ پد  ءَ دران  ءُ دگہ جاگہ یاں وت تیل لائین انت، اے روزگار ءِ ھما حق انت کہ یکیں سیٹھ پک اپ والا  ءَ ھم تیل دنت گُشیت زوت برو پد ءَ زوت بیا  ءُ زمباد والا  ءَ ھم دنت، ھما کار اِنت اشیی  ءِ سیاست  ءَ وٹساپ گروپ  ءُ فیس بک  ءَ بلوچ مشکول کُتگ انت۔ ھما سرحد انت کہ بلوچ اشیی ءِ ھست بوھگ ءِ دعا  ءَ ھم کنت بلے اشیی ءِ منّگ  ءَ ھم تیار نہ انت۔ کُنٹانی چی یے؟ یک ٹٹ اِتگیں  ءُ اڈ اِتگیں بُنگپے یا بلوچ  ءَ را اڈینگ  ءِ ۔۔۔۔۔۔۔۔