جہانی زالبولانی روچ ءُ بلوچ زالبول

 جہانی زالبولانی روچ ءُ بلوچ زالبول

جاوید بلوچ         

            سرجمیں جہانءَ 8مارچ ھمک سال جنیانی جہانی روچ دارگ بیت۔ اے روچ ءِ مولءُ مراد جنیانی ھکانی بابتءَ سرپدی دیگ، آہانی ھکانی مننگ ءُ آہاں اوں بروبریءِ ھسابءَ ھکانی دیگ انت۔ اے روچءِ دارگ ءِ مولءُ مراد ھمیش انت کہ مردینانی چیر دستی ءُ سروکیءَ مردیناں پہ وتءَ کہ وتساچیں چاگردے جوڑ کتگ آئیءِ ھلاپءَ مزاحمت کنگ ءُ نا وانندئیں زالبولاں سرپد کنگ کہ شما ھم انسان اِت ءُ وتی ھکاں پجا بیار ات۔ انچش کہ یک مردینے وانیت، ڈنءَ در کیت، وت ایوک پیسلہ زوریت ھمے وڑ ءَ درستیں ھما کار ءُ ھک کہ مردیناں رسگءَ آں، زالبولاں ھم ھمے کُلیں ھک ھست انت ءُ دیگ بہ بنت۔

اے وَ پدریں گپے کہ مئے چاگرد ءَ ھمک ھما گپ ءَ چاگرد اوپار نہ کنت ءُ نہ سَگیت ھما کہ نوک، یا ھمروچی ایں سرھالاں چہ جُتا بہ بیت۔ ھمے وڑءَ مئے انوگیں چاگردءَ زالبولانی ڈنءَ در آئگ ءُ ھکانی گپ جنگ یک اجیبیں گپے ءُ ھچ وڑءَ منگی نہ انت۔

اولی برءَ نیویارکءَ 28 پروری 1909 ءَ کہ سوشل پارٹی امریکہءَ زالبولانی راجی روچءِ جم دارگءِ جار جت اے ھم یک اجیبیں گپے ات۔ گُشگ بیت کہ اے روچءِ بُن اسل اش ات کہ مزنیں کساسےءَ زالبولاں وتی پگارءِ گیش کنگءِ ھاترءَ زہرشانی کنگءَ گوں بندات کت بلے زوراکیں ھاکماں اے زہرشانی کنوکیں زالبولانی سرا اسپ تاچینت ءُ آ لگت داتاں۔ پدا یک مزنیں جھدےءَ پد بلائیں وھدےءِ گوزگءَ رند جہانی سندءَ اے روچ ھر سال دارگ بوت ءُ میان استمانی گل 1996 ءَ چہ ھر سال گوں یک نوکیں سرھالے  اے روچءَ جم دارگءَ اِنت۔ ھمے وڑءَ اے سال ءَ 2021 ءَ میان استمانی گلءِ نیمءَ چہ اے زالبولانی روچءِ سرھال اِنت "راہشونیں زالبول، ءُ کرونا ویلءِ وھدءَ یک بروریں بانداتےءِ ھاترءَ جھد" بلے مئے کش ءُ گوراں گیشتر ھمے سما بیت کہ اے روچءِ مستریں سرھال "میرا جسم میری مرضی" انت۔ اے سرھالءِ تہا ھم ھچ ھرابی نیست چیاکہ زالبول ءَ یا ھر انسان ءَ وتی جان ءُ مالءِ سرا ایوک وتی ھک ھست انت۔ زالبول ایوک یک گوشتےءِ چُنڈے نہ انت ءُ ناں ایوک آئی ءَ مات، گوہار، لوگ بانک ءُ جنکیں چُک زانگ بہ بیت بلکیں آ یک انچیں انسانے  ھمے وڑ مردین آدم۔

بلے ادا لہتیں چیز الم گیشنگی انت۔ انچو کہ مئے چاگردءَ زالبولاں وتی زندءِ، وتی وانگءِ، سور ءُ سانگ کنگءِ، سروکی کنگءِ ءُ دگہ بازیں ھکانی سرءَ واکداری نیست ھمے وڑءَ مئے پوریاگریں دریاوردءَ زاناں ھست؟ مئے نودربرءَ ھست؟ مئے نامی ایں سردار ءُ واجہ کار گلہ کن انت کہ آہاں آہانی ھک نہ رسگءَ آں گڑا زالبولانی جاور چون بیت۔۔۔۔۔۔

بلے انگت اوں ادا چندیں کار ءُ گپاں ما سرپد نہ انت ءُ چندیناں پہ زور سرپد بوئگءِ جھد نہ کن انت یا و جزباتیءَ اشاں کمار نہ کن انت۔ چوش کہ اگاں ادا من اے گپ ءَ بکناں کہ بلوچ چاگردءَ زالبولءَ مرچیءَ چہ سداں سال پیسر زالبولانی ھکءِ ءُ وجودءِ سربُرزیءَ پہ چاگردءِ تہا آ دہرءِ ھاکم ءُ سردار (زائریں گپے کہ آ دہرءِ ھسابءَ سردار ھم ریاست بوتگ یا ریاستءِ کدءَ سردارءَ زور جتگ) ءِ دیمءَ وتی جنین بوئگءِ پجار ءُ بستار مھکم داشتگ ءُ گُشتگ کہ "من ھما انجیرءِ پتن تاکاں کہ سر منی ھچ گواتءَ نہ چنڑینتگ" ادا انجیرءِ پتن تاک بوئگءِ دیمءَ کسے من نزاناں چون "میرا جسم میری مرضی" ءَ ایر کنت ءُ دوئینانی میانءَ تپاوت کنت یا دوئیناں تور کنت۔

بلے ھئیر اے وھدی گپاں اے دہرءَ دائم ھمے یکیں درور ءُ یکیں گپءِ سرءَ ما ناں و پھر بست کن انت کہ بلوچاں چوش ءُ چُش سداں سال پیسر فیمینزم ءِ گپ کتگ چیاکہ انوگیں جاور دگر انت۔ گڑا انوگیں جاور انسانی تب ءُ زمینی ھد ءُ اویلانی ھسابءَ ھم دگر انت۔ چوش کہ ڈاکٹر ماہ رنگ وتی یک گشتانکےءَ گُشیت کہ 'سرجمیں جہان کہ مردءَ چہ آجوئی گرگءِ گپءَ کنگءَ انت، من بلوچ زالبول وتی مردینانی آجوئیءِ لوٹءَ کنگءَ آں۔ من لوگءَ چہ ڈنءَ در آئگءِ لوٹ نہ کنگءَ آں بلکیں گِسءِ رکینگءِ لوٹ کنگءَ آں' بیت کنت کہ من یک مرینے آں پمیشکہ منءَ اے مردینی چاگردءَ ایوک ھما گپ دوست بنت کہ آہانی تہا مردینءِ بابتءَ گپ کنگ بہ بیت پمیشکہ من کامریڈ ماہ رنگءِ گپاں ادا ایر کنگءَ آں بلے منءَ خلیل الرحمن قمرءِ گپ ھچ دوست نہ بوتگ انت ءُ من ھردیں آئیءَ گپءَ گنداں منءَ آ یک ھرءِ وڑءَ سرنب چاریں مردمے سما بیت یک نیم ساریں مردمے۔

میان استمانی گل ھوریں راجی گل یونائیٹڈ نیشنءِ اے سالءِ زالبولانی روچءِ درگت ءِ سرھالءَ بچار ءُ جہانءَ زالبولیں راہشونانی نیمءَ چمے بجن گڑا دنیا ءِ گیشتر انسانی ھکانی ھاترءَ توار چست کنوک، نودربر، زالبول، بیگوائیں مردمانی آجوئی، ھئیالانی درشانیءِ آجوئیءَ پہ کے ترا گندگ کیت؟  باور بکن اگاں من مہناز ءُ بانڑیءَ بے ھال بکن آں بلے اے کہریں دہرے زوراکیانی دیمءَ میلانکیں شیر زال ھر وڑءَ وتی ھست بوئگءَ سما کنائین آں۔ گڑا اے گپءَ من پہ پھر گُشت کناں کہ بہ گندئے مئے کش ءُ گوراں دگہ کوم ءُ راج کہ آہاں سرکار، توار، میڈیا ءُ ادارگ ھست انگت آہانی بُن گپ ءُ سرھالاں چہ باز دیمءَ تر بلوچ زالبول، راہشون، انسانی ءُ چاگردی کارانی کار گشاد 2021 ءِ یو این او ءِ داتگیں سرھالءِ سرءَ سرجمیءَ ایر کپگءَ آں۔ بلکیں منءَ اے وش پہمی ھم بوئگءَ اِنت  کہ یو این او ءَ اے سرھال بلوچ زالبول چار اتگ انت ءُ ایر کُتگ۔